ބުރުކީނާ ފާސޯގެ ޒައީމް ކެޕްޓަން އިބްރާހީމް ތަރައުރޭ، އީރާނަށް އަސްކަރީ އެހީތެރިކަން ފޯރުކޮށްދިނުމަށް ތައްޔާރަށް ހުންނެވި ކަމަށް ވިދާޅުވެ، ހުޅަނގުގެ ބާރުތަކަށް ވަރުގަދަ އިންޒާރެއް ދެއްވައިފިއެވެ. ތަރައުރޭ ވިދާޅުވި ގޮތުގައި، އީރާނުން އެދިއްޖެ ކޮންމެ ހިނދެއްގައި ބުރުކީނާ ފާސޯގެ ފަޚުރުވެރި އަސްކަރިއްޔާ އޮތީ އެ ގައުމުގެ ދިފާއުގައި ކޮނޑާއި ކޮނޑު ޖައްސައިގެން ނުކުތުމަށް ފުރިހަމައަށް ތައްޔާރަށެވެ.
މިކަމާ ގުޅޭގޮތުން ވާހަކަދައްކަވަމުން ތަރައުރޭ ވަނީ އެމެރިކާ ފަދަ އިސްތިއުމާރީ ބާރުތަކަށް ވަރަށް ބޮޑަށް ފާޑުވިދާޅުވެފައެވެ. އޭނާ ވިދާޅުވީ، އެމެރިކާ ފަދަ ބޮޑެތި ބާރުތަކުން ދުނިޔޭގެ އެކި ކަންކޮޅުތަކުގައި އެއްވެސް ޖެހިލުމެއް ނެތި، އަމިއްލަ އެދުމަށްޓަކައި ހިންގަމުންދާ އުދުވާނީ އަމަލުތަކުގެ ވަގުތު މިހާރު ފާއިތުވެފައިވާ ކަމަށެވެ. އަދި ދުނިޔޭގެ މައްޗަށް އެމެރިކާގެ ނުފޫޒު ހިނގި ދުވަސްތައް މިހާރު ނިމުމަކަށް އައިސްފައިވާ ކަމަށްވެސް އޭނާ ފާހަގަކުރެއްވިއެވެ.
ތަރައުރޭގެ މި ހަރުދަނާ ބަޔާނަކީ ދާދި ފަހުން ބުރުކީނާ ފާސޯ އާއި އީރާނާ ދެމެދު އުފެދެމުންދާ ގާތް އަޚުވަންތަ ގުޅުމުގެ ތެރެއިން އައިސްފައިވާ ވާހަކައެކެވެ. މި ގުޅުން އިތުރަށް ބަދަހިކުރުމުގެ ގޮތުން، ދާދި ފަހުން ބުރުކީނާ ފާސޯގެ ޑިފެންސް މިނިސްޓަރު ވަނީ އީރާނަށް ރަސްމީ ދަތުރުފުޅެއް ކުރައްވާފައެވެ. އެ ދަތުރުފުޅުގައި ދެ ގައުމުގެ ދެމެދުގައި އަސްކަރީ އަދި އިގްތިސާދީ ދާއިރާއިން އެއްބާރުލުން ދިނުމާ ބެހޭގޮތުން ވަނީ މުހިންމު މަޝްވަރާތަކެއް ކުރެވިފައެވެ.
ބުރުކީނާ ފާސޯ އަކީ މިހާރު ފްރާންސާއި އެމެރިކާގެ އަސްކަރީ ނުފޫޒުން ބޭރުވެ، އަމިއްލަ މިނިވަންކަމާއި ސިޔާދަތު ރައްކާތެރިކުރުމަށް ވަރުގަދަ މަސައްކަތްތަކެއް ކުރަމުންދާ ގައުމެކެވެ. މަސްރަހު ދިރާސާކުރާ ފަރާތްތަކުން ދެކޭ ގޮތުގައި، ތަރައުރޭގެ މި ވާހަކަތަކަކީ ބައިނަލްއަގުވާމީ ސިޔާސީ މަސްރަހުގައި ހުޅަނގުގެ ބާރު ކެނޑި، އާ ބާރުތަކެއް އުފެދެމުންދާ ކަމުގެ ހެތްކެކެވެ. އަދި މިއީ އީރާނާއި އެކުވެރި ގައުމުތަކުން ހުޅަނގުގެ ނުފޫޒާ ދެކޮޅަށް ކުރަމުންދާ މަސައްކަތަށް ލިބުނު އިތުރު ހިތްވަރެއްގެ ގޮތުގައިވެސް ވަނީ ސިފަކޮށްފައެވެ.
