އީރާނުގެ ރޫހާނީ އެންމެ މަތީ ވެރިޔާ އާޔަތުﷲ އަލީ ޚާމަނާއީ އަވަހާރަކޮށްލުމާ ގުޅިގެން، އެގައުމުގެ އާ ސުޕްރީމް ލީޑަރަކަށް އެމަނިކުފާނުގެ ދަރިކަލުން މޮޖްތާބާ ޚާމަނާއީ މިއަދު އިންތިޚާބުކޮށްފިއެވެ.
އިސްލާމީ ތާރީޚުގައި ފާހަގަކޮށްލެވޭ ފަދަ މަތިވެރި ޝަހީދެއްގެ ގޮތުގައި ސިފަކުރެވޭ އާޔަތުﷲ އަލީ ޚާމަނާއީ ޝަހީދުކޮށްލާފައިވަނީ، އެމެރިކާއާއި ޔަހޫދީ ޒަޔަނިސްޓް އިސްރާއީލުން ގުޅިގެން ދިން ވަރުގަދަ ހަމަލާތަކެއްގައެވެ. މި ހަމަލާގައި އެތައް ސަތޭކަ ޖެޓްތަކަކާއި ކަނޑުމަގުން ފޮނުވާލި ގިނަ އަދަދެއްގެ މިސައިލްތައް ބޭނުންކޮށްފައިވާ ކަމަށް ރިޕޯޓްތައް ބުނެއެވެ.
އީރާނުގެ އާ ސުޕްރީމް ލީޑަރުގެ މަގާމާ ހަވާލުވެވަޑައިގަތުމަށްފަހު މޮޖްތާބާ ޚާމަނާއީ ދެއްވި ފުރަތަމަ ބަޔާނުގައި ވިދާޅުވީ، އެމަނިކުފާނުގެ އެންމެ އިސް އަމާޒަކީ ބައްޕާފުޅު އަދި އިސްލާމީ އުންމަތުގެ ލޯތްބާއި އިހުތިރާމް ލިބިވަޑައިގެން ހުންނެވި އާޔަތުﷲ އަލީ ޚާމަނާއީ ޝަހީދުކޮށްލުމުގެ ފަހަތުގައި ތިބި ގައްދާރު ޚާއިނުން އިންސާފުގެ ކުރިމައްޗަށް ގެނެސް، އެކަމުގެ ބަދަލު ހިފުން ކަމަށެވެ.
މީގެ އިތުރުން، ދެވަނަ ކަމެއްގެ ގޮތުގައި އެމަނިކުފާނު ފާހަގަކުރެއްވީ ފަލަސްތީނުގެ ބިން މިނިވަންކުރުމެވެ. އެގޮތުން ފަލަސްތީނަށް ގަދަބާރުން ވެރިވެގަނެގެން އުޅޭ އިސްތިއުމާރީ އިސްރާއީލު ދުނިޔޭގެ ޗާޓުން ފޮހެލައި، ފަލަސްތީނުގެ މިނިވަން ދައުލަތެއް ގާއިމުކުރެއްވުމަށް ކުރެވެން ހުރި ހުރިހާ މަސައްކަތެއް ކުރައްވާނެ ކަމަށް މޮޖްތާބާ ޚާމަނާއީ ވިދާޅުވިއެވެ.
އީރާނުގެ ރައްޔިތުންނާއި އިސްލާމީ އުންމަތުން ދަނީ އާ ސުޕްރީމް ލީޑަރަށް ކާމިޔާބީއަށް އެދި ދުއާކުރަމުންނެވެ. އަދި މާތްﷲގެ ރަސޫލުންނާއި ނަބީބޭކަލުން އުފަންވެވަޑައިގަތް ބިން ކަމުގައިވާ ފަލަސްތީނުގެ މާތް ބިން ރައްކާތެރިކުރައްވައި، އިސްލާމީ އުންމަތުގެ ދުޝްމަނުންގެ ކިބައިން އެ ބިން ސަލާމަތްކުރެއްވުމުގެ ހެޔޮ ތައުފީގު އާ ލީޑަރަށް ދެއްވުމަށް އެދި ގިނަ ބަޔަކު ދަނީ ދުއާ ކުރަމުންނެވެ.
