މޫނު މަތީގައި އޮތް މާސްކުރ ނެގުމުން ހަގީގީ ޑރ މުހައްމަދު މުއިއްޒު ފެންނާނެ ކަމަށް ވިދާޅުވެ ކުރިގެ ނައިބު ރައީސް ޑރ މުހައްމަދު ޖަމީލު އަހުމަދުގެ ފާޑުވިދާޅުވުމާ ނުރުހުން އަމާޒުކުރައްވައިފިއެވެ.
ޑރ ޖަމީލު މިފަދަ ބަސްތަކެއް ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.
އެމަނިކުފާނު ވަނީ، އެމެރިކާގެ ސެނެޓަރެއް އެގައުމުން ހިނގަމުންދާ ޖަރީމާތަކާ ގުޅިގެން ނުރުހުން ފާޅުކޮށް ދެއްކި ވާހަކަ ހިއްސާކުރައްވާފައެވެ. އެގޮތުން އެ ސެނެޓަރު ވަނީ އެމެރިކާގެ ރައްޔިތުން ނިމުމެއް ނެތް ހަނގުރާމައެއް ބޭނުން ނޫން ކަމަށާ އަބަދުވެސް ކޮންމެވެސް ގައުމެއްގެ ކަންކަން ފެންމަތި ކުރުވައިގެން އެމެރިކާއިން އެކަން ކަމުގެ ތެރެއަށް ވަނުމުގެ ބަދަލުގައި ގައުމުގައި ހުރި ކަންކަމަށް ފޯކަސްކޮށް އެކަންކަން ރަގަޅު ކުރުން މާ މުހިއްމު ކަަމށް އޭނާ ވަނީ ބުނެފައެވެ.
ޑރ ޖަމީލު ވިދާޅުވީ، ގަބޫލް ކުރަންޖެހޭ ޙަގީގަތަކީ އެމެރިކާ އަދި އިޒްރޭލުން ތަކުރާރުކޮށް އީރާނަށް ދެމުން ގެންދާ އުދުވާނީ ޙަމަލާތަކުގެ ފަހަތުގައި ފޮރުވިފައި އޮތީ އިސްލާމް ދީނަށާ މުސްލިމު ގައުމުތަކަށް ކުރާ ނަފުރަތު ކަމަށެވެ. އެ ދެ ގައުމުގެ ވާހަކަތައް އެކި ފަހަރު ބަދަލުވަމުން ދަނީ އެހެންވެ ކަމަށަް ވިދާޅުވެ ޑރ ޖަމީލު ވިދާޅުވީ، އެމެރިކާގެ ފަރާތުން ހިންގާ އިންސާނީ ޙައްގުތަކާ އަދި ރޫލް ބޭސްޑް އޯޑަރގެ އެކި ސެމިނާރ ވޯކްޝޮޕްތަކަކީ އެއްވެސް މާނައެއް ހުރިކަމެއް ނޫން ކަމަށެވެ. އެ ކަންތައް ހިންގުން ހުއްޓާލަންޖެހޭ ކަމަށް ވެސް ޑރ ޖަމީލު ވަނީ ވިދާޅުވެފައެވެ.
ދިވެހިރާއްޖޭގައި ޑރ. މުއިއްޒުގެ ސަބަބުން މިވަރުގެ ކަމެއްގައި އީރާނުގެ ލީޑަރ ޝަހީދުކޮށްލުމުންވެސް ޒަމާނުއްސުރެ ހިފަހައްޓަމުންދިޔަ ޕްރްޓޮކޯލު ބޭރުން މިފަހަރު އަމަލު ކުރުމަކީ ދުަސްތޫރީ ޒިންމާއާ ޚިލާފަށް ކުރިކަމެއް ކަން ފާހަގަކުރައްވާފައެވެ.
މީގެ އިތުރުން ޑރ ޖަމީލު ވަނީ ސްޕެއިންގައި ހުރި އެމެރިކާގެ އަސްކަރީ ބޭސްތައް އިރާނަށް ހަމަލާދޭން ހުއްދަ ނުދިމުން ސްޕެއިންއާ އެކު އޮތް ވިޔަފާރީގެ ގުޅުން ކަނޑާލަން ޑޮނަލްޑް ޓްރަމްޕު ނިންމި ނިންމުމަށްވެސް އިޝާރާތްކުރައްވާފައެވެ.
އެމަނިކުފާނު ވިދާޅުވީ، ފެނިގެން މިދަނީ އިރާނާ ދެކޮޅަށް އެމެރިކާ އަދި އިޒްރޭލުގެ ޔަހޫދީން ފަށާފައި ހަނގުރާމައަކީ އެއްވެސް ގޮތަކުން ގާނޫނީ އިމުގެ ތެރެއަށް ގެނެވޭނެ ކަމެއް ނޫން ދުނިޔެ ގަބޫލް ކުރަމުންދާކަން ކަމަށެވެ. ޙައްގެއް ނެތި އީރާނުގެ އިސްތިގްލާލަށް އެމެރިކާ އެރުމުން ސްޕެއިން ފަދަ ޣައިރު މުސްލިމް ގައުމުތަކުން ދައްކަމުންދާ ނަމޫނާ ދައްކަން ދީނީ ތާކިހާ ތުރުކުރައްވައިގެން ހުރި ރަައީސް މުއިއްޒަށް އަކަށް ނުކެރުނު ކަމަށް ވިދާޅުވެ ޑރ ޖަމީލު ވަނީ، ހިފެހެއްޓުމެއް ނެތި ޑރ މުއިއްޒު ހަމްދަރުދީ ފާޅުކުރީ އަނިޔާގައި ބައިވެރިވި މީހުންނަށް ކަމަށެވެ.
ޝަހީދުވެ ދިޔައީ އިސްލާމީ އުއްމަތުގެ ވަރުގަދަ ލީޑަރެއް ކަމަށާ ޝަހީދުކޮށްލީ މަޢްސޫމް އެތައް ބަޔަކުކަން ފާހަގަކުރައްވާ ޑރ ޖަމީލު ވަނީ ޝަހީދުކޮށްލީ ސްކޫލް ކުދިންތައް ކަމަށާ އެއީ މުސްލިމުން ކަމަށްވެސް ވިދާޅުވެފައެވެ. މިކަން ދަނެގަންނަން އަދި މިކަން ކުށްވެރި ކުރަން ޑރ. މުއިއްޒަށް ފަތުވާއަކަށް ބޭނުން ނުވާނެ ކަމަށާ ބޭނުންވަނީ މޫނުގައި އަޅާފައި އޮތް މާސްކު ނެގުން ކަމަށް ވިދާޅުވެ ޑރ ޖަމީލު ވަނީ އޭރުން ޙަގީގީ މުއިއްޒު ދިވެހިންނަށް ފެންނާނެ ކަމަށްވެސް ވިދާޅުވެފައެވެ.
ޑރ ޖަމީލު މިފަދައިން ވިދާޅުވެފައިވާއިރު ރައީސް މުއިއްޒުގެ ސަރުކާރުން އާޔަތުﷲ ޚަމާނާއީ ޝަހީދުކޮށްލުމުގެ ހިތާމައިގައި ބައިވެރިވެ ތައުޒިޔާވެސް އިރާނަށް ކިޔާފައިނުވާތީ ގިނަ ބައެއްގެ ފާޑުކިޔުން އަމާުޒުވެފައިވެއެވެ.
