އިސްރޭލާއި އެމެރިކާ ގުޅިގެން އިރާނަށް ދެމުންދާ ލާއިންސާނީ އުދުވާނީ ހަމަލާތަކުގައި، އިރާނުގެ ރޫޙާނީ ލީޑަރު އަޔަތުﷲ ޢަލީ ޚާމަނާއީ ޝަހީދުވެވަޑައިގަތީ، އެމަނިކުފާނަށް އަމާޒުކޮށް ނުރައްކާތެރި ހަމަލާއެއް އަންނަން އުޅޭކަމުގެ އިންޒާރު ސިފައިން ދީފައިވަނިކޮށް، ރައްޔިތުންނަށްޓަކައި އެންމެ ފަހު ވަގުތާ ޖެހެންދެންވެސް ސާބިތުވެ ހުންނަވަނިކޮށް ކަމަށް ރިޕޯޓްތައް ބުނެފިއެވެ.
މައުލޫމާތު ލިބޭގޮތުގައި، ހަމަލާ ދިނުމުގެ ކުޑަވަގުތުކޮޅެއް ކުރިން އިރާނުގެ ސަލާމަތީ ބާރުތަކުން ވަނީ ޚާމަނާއީއަށް އެލާޓް ފޮނުވައި، ރައްކާތެރި ބަންކަރަކަށް ބަދަލުވެވަޑައިގަތުމަށް އެދިފައެވެ. ނަމަވެސް، ޚާމަނާއީ އެކަމަށް އިންކާރު ކުރެއްވިއެވެ. ޚާމަނާއީ ވިދާޅުވީ، އިރާނުގެ ހުރިހާ ރައްޔިތުންނަށް ވަދެވޭނެ ފަދަ ރައްކާތެރި ބަންކަރެއް ނެތް ހިނދަކު، ރައްޔިތުން ނުރައްކަލުގެ ތެރެއަށް ދޫކޮށްލުމަށްފަހު ޚާމަނާއީ އެކަނި ބިމުގެ އަޑިއަށް ވަދެ ފިލައިވަޑައިގަންނަވަން ބޭނުންފުޅު ނުވާ ކަމަށެވެ.
އިސްރޭލުގެ ޔަހޫދީންނާއި އެމެރިކާގެ އިސްތިއުމާރީ ބާރުތަކުން ދިން މި ފިނޑި ހަމަލާގައި ޚާމަނާއީ ޝަހީދުވެވަޑައިގެންނެވީ، އެމަނިކުފާނުގެ އަމިއްލަ ނަފްސަށްވުރެ ރައްޔިތުންނާއި ގައުމުގެ މިނިވަންކަން އިސްކުރައްވައިގެން ހުންނަވަނިކޮށެވެ. މިއީ އިސްލާމީ އުންމަތަށް ލިބުނު ބޮޑު ހިތާމައެއް ނަމަވެސް، ޚާމަނާއީ ދެއްކެވި ހިތްވަރާއި ގައުމީ ލޯބީގެ ސަބަބުން، އެމަނިކުފާނު މިއަދު ފާހަގަވެގެން ގޮސްފައިވަނީ ރައްޔިތުންގެ ޙައްޤުގައި ޤުރްބާންވި ބަތަލެއްގެ ގޮތުގައެވެ.
މި ހަމަލާއާ ގުޅިގެން މުޅި އިރާން މިހާރު އޮތީ ހިތާމައިގެ ތެރޭގައެވެ. ނަމަވެސް، ޚާމަނާއީގެ އެންމެ ފަހުގެ ނިންމެވުމުން އިރާނުގެ ރައްޔިތުންނަށް ލިބިފައިވަނީ އިތުރު ހިތްވަރެކެވެ. އެމަނިކުފާނު ދުނިޔެއަށް ސާބިތުކޮށްދެއްވީ، އަނިޔާވެރި ބާރުތަކުގެ ކުރިމަތީގައި ކަނޑައެޅިގެން މަރު ހުރިކަން އެނގިވަޑައިގަތް ނަމަވެސް، ރައްޔިތުންނާ ވަކިވެވަޑައިނުގެން ސާބިތުވެ ހުންނެވި ކަމެވެ. އިރާނުގެ އަސްކަރިއްޔާއިން ބުނެފައިވަނީ މި ލާއިންސާނީ އުދުވާނުގެ ބަދަލު ވަރުގަދައަށް ހިފާނެ ކަމަށެވެ.
