އިސްރާއީލުގެ އަނިޔާވެރި ބާރުތަކުން އީރާނުގެ ވެރިރަށް ތެހެރާނަށް ދިން ވަރުގަދަ ވައިގެ ހަމަލާތަކެއްގައި، އެ ގައުމުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަވުމާއި ގުޅިގެން މި ފިނޑި ހަމަލާއަށްފަހު އިސްރާއީލުގެ ޑިފެންސް މިނިސްޓަރު އިސްރާއީލް ކާޓްޒް ވަނީ ބައިނަލްއަގުވާމީ މިންގަނޑުތަކާ ޚިލާފު ނުރައްކާތެރި އިންޒާރެއް ދީފައެވެ. އޭނާ ވިދާޅުވީ އީރާނުގެ ރޫހާނީ ލީޑަރުގެ މަގާމާ ހަވާލުވާ ކޮންމެ މީހަކީ އިސްރާއީލުގެ އަމާޒަކަށް ވާނެ ކަމަށާއި، އެމީހަކު އަވަހާރަކޮށްލާނެ ކަމަށެވެ.
މިދިޔަ ހޮނިހިރު ދުވަހުން ފެށިގެން އެމެރިކާގެ އެހީތެރިކަމާއެކު އިސްރާއީލުން އީރާނަށް ދެމުންދާ ލާއިންސާނީ ހަމަލާތަކުގައި، ޚާމަނާއީ ދިރިއުޅުއްވާ ކޮމްޕައުންޑަށް އަމާޒުކޮށް ގިނަ އަދަދެއްގެ ބޮން ވަނީ އަޅާފައެވެ. މި ހަމަލާތަކުގައި އެ ސަރަހައްދުގެ އިމާރާތްތައް ބިމާހަމަވެފައިވާއިރު، ޚާމަނާއީގެ ހަށިކޮޅު ފެނިފައިވަނީ ވެއްޓިފައިވާ އިމާރާތްތަކުގެ ކުނިބުނިތަކުގެ ދަށުންނެވެ.
މި ނުތަނަވަސް ދަނޑިވަޅުގައި އީރާނުގެ ހަމަޖެހުން ހިފެހެއްޓުމަށްޓަކައި، ޚާމަނާއީގެ ދަރިކަލުން މުޖުތަބާ ޚާމަނާއީ ވަނީ އެ ގައުމުގެ އައު ރޫހާނީ ލީޑަރުގެ މަގާމަށް އައްޔަންކޮށްފައެވެ. ނަމަވެސް، އިސްރާއީލުން ދަނީ އީރާނުގެ ލީޑަރުންނަށް އަމާޒުކޮށް ބިރުދެއްކުމުގެ އަމަލުތައް ކުރިއަށް ގެންދަމުންނެވެ.
އިސްރާއީލުން މިފަދަ ހަމަލާތަކެއް ދެމުން މިދަނީ މެދުއިރުމަތީގައި އިސްލާމީ ގައުމުތަކުގެ ބާރު ކަނޑުވާލުމަށް ކުރާ މަސައްކަތުގެ ދަށުންނެވެ.
