ކުވައިތްގެ ވައިގެ ސަރަހައްދުން ދަތުރުކުރަމުންދިޔަ އެމެރިކާގެ އަސްކަރީ ޖެޓްތަކަކަށް، ކުވައިތްގެ އެއަރފޯސްގެ ޕައިލަޓަކު ގަސްތުގައި ހަމަލާދީ ވައްޓާލި ކަމަށް ބުނާ މައްސަލައެއް ފެންމަތިވެ، އެކަމުގެ ފުރިހަމަ ތަހުގީގެއް ކުވައިތާއި އެމެރިކާ ގުޅިގެން ފަށައިފިއެވެ.
މި ހާދިސާ ހިނގާފައިވަނީ މެދުއިރުމަތީގެ މަސްރަހު ނުހަނު ބޮޑަށް ގޯސްވެ، އިޒްރޭލާއި އިރާނާ ދެމެދު ހަނގުރާމައިގެ ބިރުވެރިކަން އުފެދިފައިވާ ދަނޑިވަޅެއްގައެވެ. މަސްދަރުތަކުން ބުނާ ގޮތުގައި، ކުވައިތްގެ ޕައިލަޓް މި ހަމަލާ ދީފައިވަނީ އެމެރިކާއިން އިޒްރޭލަށް ދެމުންދާ އެހީތެރިކަމާ މެދު ހިތްހަމަނުޖެހުން ފާޅުކުރުމުގެ ގޮތުން ކަމަށް ބެލެވެއެވެ.
އިޒްރޭލުން ފަލަސްތީނުގެ މުސްލިމުންނާ ދެކޮޅަށް ހިންގަމުންދާ ލާއިންސާނީ އަމަލުތަކާއި، އިރާނަށް ދެމުންދާ ހަމަލާތަކުގައި އެމެރިކާގެ ބައިވެރިވުން އޮންނަ ކަމަށް ބުނެ، އިސްލާމީ ގައުމުތަކުގެ އަސްކަރިއްޔާތަކުގައި މަސައްކަތްކުރާ ފަރާތްތަކުގެ މެދުގައި ވަނީ ނުރުހުން އިތުރުވެފައެވެ. މި ހާދިސާއަކީ އެ ނުރުހުމުގެ ނަތީޖާއެއް ކަމަށް ބައިނަލްއަގުވާމީ މުހައްލިލުން ލަފާކުރެއެވެ.
ކުވައިތްގެ ދިފާއީ ވުޒާރާއިން ނެރުނު ބަޔާނެއްގައި ބުނެފައިވަނީ، މިއީ ގައުމީ ސަލާމަތާ ގުޅުންހުރި ސީރިއަސް މައްސަލައެއްގެ ގޮތުގައި ބަލަމުންދާ ކަމަށެވެ. އަދި މި ހަމަލާދިން ޕައިލަޓް މިހާރު ވަނީ ހައްޔަރުކޮށް، ސުވާލުކުރުމަށްޓަކައި އަސްކަރީ ބަންދަށް ބަދަލުކުރެވިފައެވެ.
މި ހާދިސާއާ ގުޅިގެން މެދުއިރުމަތީގައި ތިބި އެމެރިކާގެ ސިފައިން ވަނީ އެލާޓަށް ގެނެސްފައެވެ. މިއީ އިޒްރޭލް-އިރާން ހަނގުރާމައިގެ އަސަރު މުޅި ސަރަހައްދަށް ފެތުރި، އަރަބި ގައުމުތަކުގެ ތެރޭގައިވެސް ހަމަނުޖެހުން އުފެދިދާނެ ކަމުގެ ބިރު އޮތް ކަމެއްގެ ގޮތުގައި މަސްރަހު ދިރާސާކުރާ ފަރާތްތަކުން ފާހަގަކުރެއެވެ.
