ދުނިޔޭގެ ކުރިމަތީގައި އަސްކަރީ ގޮތުންނާއި ޓެކްނޮލޮޖީގެ ގޮތުން ކުރިއަރާފައިވާ ބައެއް ކަމަށް ދައުވާކުރާ ސަހްޔޫނީ އިޒްރޭލަށް ނުހަނު ބޮޑު ލަދަކާ ކުރިމަތިލާން ޖެހިއްޖެއެވެ. އިޒްރޭލުގެ އަސްކަރިއްޔާއިން މިލިއަނަކަށްވުރެ ގިނަ ޑޮލަރު އަގުހުރި މިސައިލެއް ބޭނުންކޮށްގެން ގޮއްވާލެވުނީ، އީރާނުގެ އަސްކަރީ ހެލިކޮޕްޓަރެއް ކަމަށް ހީކޮށް، ބިމުގައި ކުރަހާފައި އޮތް ހެލިކޮޕްޓަރެއްގެ ކުރެހުމަކަށް ކަން މިހާރު ވަނީ ފަޅާއަރާފައެވެ.
މި ހާދިސާ ހިނގާފައިވަނީ އީރާނުގެ އަސްކަރީ މަރުކަޒަކަށް އަމާޒުކޮށް އިޒްރޭލުން ދިން ކަމަށް ބުނާ ހަމަލާއެއްގެ ތެރޭގައެވެ. އިޒްރޭލުގެ މީޑިއާތަކުންނާއި ސަހްޔޫނީ ސަޕޯޓަރުން ފުރަތަމަ ދިޔައީ އީރާނުގެ އަގުބޮޑު ހެލިކޮޕްޓަރެއް ނައްތާލެވުނު ކަމަށް ބުނެ ވަރަށް ބޮޑަށް ފޮނިކަނޑަމުންނެވެ. ނަމަވެސް، ސެޓެލައިޓް ފޮޓޯތަކާއި އަސްކަރީ ދިރާސާކުރާ ފަރާތްތަކުން ހާމަކުރި ގޮތުގައި، އެމީހުން "ގޮއްވާލި" ކަމަށް ބުނާ ހެލިކޮޕްޓަރަކީ ހަމައެކަނި ބިމުގައި ކުރަހާފައި އޮތް ފޭކް ކުރެހުމެކެވެ.
މިއީ ދުނިޔެއަށް އޮޅުވާލުމަށާއި، އަމިއްލަ ނަފްސަށް އިތުބާރު ހޯދުމަށް ސަހްޔޫނީން ކުރި ވަރަށް ދަށު ދަރަޖައިގެ މަސައްކަތެކެވެ. އީރާނުގެ އަސްކަރީ ގާބިލުކަމަށް ހުރަސްއެޅުނު ކަމަށް ދެއްކުމަށް ކުރި މި އަމަލުގެ ސަބަބުން، މިއަދު މުޅި ދުނިޔެ ދަނީ އިޒްރޭލަށް މަލާމާތް ކުރަމުންނެވެ. އަދި މިލިއަން ޑޮލަރުގެ މިސައިލެއް އެއްވެސް އަގެއް ނެތް ކުރެހުމަކަށް އަމާޒުކޮށް ބޭކާރު ކޮށްލުމަކީ އެމީހުންގެ އަސްކަރީ ޖާސޫސީ ނިޒާމު އޮތް ބަލިކަށި މިންވަރު ހާމަވެގެންދިޔަ ކަމެކެވެ.
އީރާނުގެ އަސްކަރީ މަރުކަޒުތަކުގައި ބޭނުންކުރާ "ޑެކޯއީ" ނުވަތަ އޮޅުވާލުމުގެ އުކުޅުތަކުގެ ކުރިމަތީގައި ސަހްޔޫނީން ވަނީ މުޅިން ކަކޫޖަހަން ޖެހިފައެވެ. އީރާނުގެ ހެލިކޮޕްޓަރެއް ގޮއްވާލި ކަމަށް ދައްކައިގެން ދުނިޔޭގެ ސަމާލުކަން ހޯދަން ކުރި ނާކާމިޔާބު މަސައްކަތް ފަޅާއެރުމުން، މިއަދު އިޒްރޭލުގެ އަސްކަރިއްޔާއަށް އޮތީ މުޅި ދުނިޔޭގެ ކުރިމަތީގައި ލަދުގަތުން ފިޔަވައި އިތުރު ކަމެއް ނޫނެވެ.
މި ހާދިސާއާ ގުޅިގެން ސޯޝަލް މީޑިއާގައި ގިނަ ބަޔަކު ދަނީ އިޒްރޭލަށް ޖެއްސުން ކުރަމުންނެވެ. ބައެއް ފަރާތްތަކުން ބުނާ ގޮތުގައި، "ދުނިޔޭގެ އެންމެ ވަރުގަދަ ޓެކްނޮލޮޖީ" ގެ ވެރިންނަށް ކަރުދާހުގައި ކުރަހާފައިވާ ކުރެހުމަކާއި އަސްލު ހެލިކޮޕްޓަރެއް ވަކިކުރަން ނޭނގުމަކީ އެމީހުންގެ "ނުކުޅެދުންތެރިކަން" ހާމަވާ އަލިގަދަ ހެއްކެއްކެވެ. ސަހްޔޫނީންގެ މި މޮޔަ އަމަލުގެ ސަބަބުން އެމީހުން ދައްކަމުން އައި ދޮގު ވާހަކަތަކުގެ މޫނުމަތީގައި ވަނީ ބޮޑު ތަފާލެއް ޖެހިފައެވެ.
