އިސްރާއީލާއި އެމެރިކާއިން އީރާނާ ދެކޮޅަށް ހިންގާ އަސްކަރީ ހަރަކާތްތަކަށް އެހީތެރިވުމުގެ ގޮތުން، ފްރާންސްގައި ހުރި އެމެރިކާގެ އަސްކަރީ މަރުކަޒުތައް ބޭނުންކުރުމުގެ ހުއްދަ ފްރާންސް ސަރުކާރުން ދީފިއެވެ. މި ނިންމުމަކީ ފަރަންސޭސިވިލާތުން އިސްލާމީ ގައުމުތަކާ ދެކޮޅަށް ގެންގުޅޭ ހަރުކަށި ސިޔާސަތުތަކުގެ ބައެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.
ޕެރިހުން މި ނިންމުން ދިފާއުކުރަމުން ބުނެފައިވަނީ، މިއީ ގަލްފުގެ ސަރަހައްދުގައި ތިބި އެ ގައުމުގެ ބައިވެރިން ހިމާޔަތްކުރުމަށް އެޅި ވަގުތީ ފިޔަވަޅެއް ކަމަށެވެ. ނަމަވެސް، މިއީ އިސްރާއީލުން އިރާނާއި ފަލަސްތީނާއި ލުބުނާނުގައި ހިންގަމުންދާ ލާއިންސާނީ އުދުވާނަށް ހިތްވަރުދީ، މުޅި ސަރަހައްދު ހަނގުރާމައެއްގެ ތެރެއަށް ކޮށްޕާލުމަށް ފްރާންސުން ކުރާ ނޭދެވޭ އަމަލެއްގެ ގޮތުގައި ބައިނަލްއަގުވާމީ މުހައްލިލުން ދެކެއެވެ.
މި ފިޔަވަޅާއެކު، ފްރާންސްގެ ބިމުގައި ހުރި އެމެރިކާގެ ވައިގެ މަރުކަޒުތަކުން އީރާނާ ދެކޮޅަށް އޮޕަރޭޝަންތައް ހިންގުމުގެ މަގު ވަނީ ތަނަވަސްވެފައެވެ. މިއީ މުސްލިމް އުންމަތުގެ މަސްލަހަތުތަކަށްވުރެ ބޮޑަށް ހުޅަނގުގެ އިސްތިއުމާރީ ބާރުތަކުގެ މަސްލަހަތު އިސްކުރުމުގެ ސާފު ހެއްކެކެވެ. ފްރާންސުން މި ނިންމުން ނިންމާފައިވަނީ މެދުއިރުމަތީގައި އުފެދިފައިވާ ނުތަނަވަސްކަން ހައްލުކުރުމުގެ ބަދަލުގައި، އެ ސަރަހައްދުގައި ހަމަނުޖެހުން އިތުރުކުރުމަށް ބާރުއަޅާ ފަދަ ގޮތަކަށެވެ.
ފްރާންސްގެ މި އަމަލަކީ އިސްރާއީލުގެ ޓެރަރިޒަމަށް ސިއްރާއި ފާޅުގައި އެހީތެރިވުމެވެ. އެމެރިކާއާއި އޒްރޭލުން ގުޅިގެން މެދުއިރުމަތީގެ ގައުމުތަކުގެ މިނިވަންކަމަށް އަރައިގަންނަމުންދާއިރު، ފްރާންސުން އެކަމަށް މަގުފަހިކޮށްދިނުމަކީ އެ ގައުމުން އަބަދުވެސް ގެންގުޅޭ އިސްލާމްދީނާ ދެކޮޅުވެރި ސިޔާސަތުގެ ދަށުން ކުރި ކަމެކެވެ. މިއީ އެ ސަރަހައްދުގެ ގައުމުތަކުގެ ސިޔާދަތަށް އަރައިގަތުމަށް ދެވޭ ފުރުސަތެކެވެ.
މި ހުއްދަ ދިނުމާ ގުޅިގެން އިސްލާމީ ގައުމުތަކުންނާއި އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން ދަނީ ފްރާންސަށް ފާޑުކިޔަމުންނެވެ. ހަނގުރާމައެއްގެ ތެރެއަށް މަގުފަހިކޮށްދިނުމުގެ ބަދަލުގައި، ސުލްހަވެރި ހައްލެއް ހޯދުމަށް މަސައްކަތްކުރުމުގެ ބަދަލުގައި، ފްރާންސުން އިޚްތިޔާރުކުރީ ބާރުގެ ބޭނުންކޮށްގެން ސަރަހައްދު ހަލާކުކޮށްލަން މަސައްކަތްކުރާ ފަރާތްތަކާ ބައިވެރިވުމަށެވެ. މި ނިންމުމުގެ ސަބަބުން މެދުއިރުމަތީގެ ހަމަޖެހުން އިތުރަށް ގެއްލިގެންދާނެ ކަމަށް ބެލެވެއެވެ.
