އީރާނުގެ ވެރިރަށް ތެހެރާންގެ ހުޅަނގު ދެކުނުގައި އޮންނަ ފަރަންދު އަވަށުގެ ދެ ސްކޫލަކަށް އެމެރިކާ އާއި އިސްރާއީލުން މިސައިލް ހަމަލާތަކެއް ދީފިކަމަށް، އީރާނުގެ ސަރުކާރީ ނޫސް އެޖެންސީ ފާރްސް ނިއުސް ރިޕޯޓްކޮށްފިއެވެ.
ފާރްސް ނިއުސް އެޖެންސީން ނެރެފައިވާ ފޮޓޯތަކުން ހާމަވާ ގޮތުގައި، ދިން ހަމަލާތަކުގެ ސަބަބުން ސްކޫލްތަކުގެ ކްލާސް ރޫމްތަކަށާއި ފަރަންދު އަވަށުގެ ގިނަ ގެތަކަކަށް ބޮޑެތި ގެއްލުންތަކެއް ލިބިފައިވެއެވެ. ހަމަލާތަކުން ލިބިފައިވާ ގެއްލުންތަކުގެ ފުރިހަމަ ތަފްސީލު ކަމާބެހޭ ފަރާތްތަކުން ދަނީ ބަލަމުންނެވެ.
މި ހަމަލާ ދިނީ، ހަ ދުވަސް ކުރިން އީރާނުގެ ދެކުނުގެ ސިޓީ ކަމަށްވާ މިނާބްގައި ހުންނަ އަންހެން ކުދިންގެ ސްކޫލަކަށް ދިން ހަމަލާއެއްގައި 165 ދަރިވަރުންނާއި ސްކޫލް މުވައްޒަފުން ޝަހީދުވި ހިތާމަވެރި ހާދިސާ ހިނގިތާ ކުޑަ ދުވަސްކޮޅެއްގެ ތެރޭގައެވެ.
މިނާބްގެ ސްކޫލަށް ދިން ހަމަލާ ދިފާއުކޮށް، އެމެރިކާ އާއި އިސްރާއީލުން ބުނެފައިވަނީ، ހަމަލާ ދިން ތަނަކީ ސްކޫލެއްކަން ނޭނގޭ ކަމަށާއި، ހަމަލާ ދިނީ އެ ތަނަކީ އަސްކަރީ ބޭނުންތަކަށް ބޭނުންކުރާ މަރުކަޒެއް ކަމަށް ބެލެވިގެން ކަމަށެވެ. ނަމަވެސް ގަތަރު ބޭސްޑް ނޫސް ވެރިކަމުގެ ނެޓްވޯކް، އަލްޖަޒީރާ އިން ހިންގި ތަހުގީގަކުން ދައްކާ ގޮތުގައި، ހަމަލާ ދިން ތަނަކީ ކައިރީގައި ހުންނަ އަސްކަރީ ފެސިލިޓީ އާ ވަކިން، ސިވިލިއަން ސްކޫލެއްކަން ފާއިތުވި ދިހަ އަހަރު ދުވަހު ވެސް ސާފުކޮށް ފެންނަން ހުރި ކަމެވެ.
ތެހެރާންގެ ސްކޫލްތަކަށް ދިން ހަމަލާތައް ކުށްވެރިކުރައްވައި، އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވީ، ސްކޫލް ކުދިންނާ ދެކޮޅަށް ދިން ހަމަލާތަކަކީ ކުށެއް ނެތް މައުސޫމް ކުދިންގެ ފުރާނަ ދުއްވާލުން ކަމަށެވެ. ހަމަ އެއާ އެކު ދުނިޔޭގެ ގިނަ ގައުމުތަކަކުން ވަނީ ސްކޫލްތަކަށް ދިން ހަމަލާތައް ހަރުކަށި ޢިބާރާތުން ކުށްވެރިކޮށްފައެވެ.
އދ. ގެ ސެކްރެޓަރީ ޖެނެރަލް ވ ވެސް ވަނީ ސްކޫލްތަކާއި ހޮސްޕިޓަލް ފަދަ ސިވިލިއަން ތަންތަނަށް ހަމަލާ ދިނުމަކީ ބައިނަލްއަގްވާމީ ގާނޫނުގެ ދަށުން ބަަލައިނުގަނެވޭ ކަމެއް ކަމަށް ވިދާޅުވެ، ހަމަލާތައް ވަގުތުން ހުއްޓާލުމަށް ގޮވާލައްވާފައެވެ. ހަމަ އެއާ އެކު، ބައިނަލްއަގްވާމީ ކްރިމިނަލް ކޯޓުން ވެސް ދަނީ ހަމަލާތަކާ ގުޅޭ ތަހުގީގެއް ހިންގުމާ ބެހޭ ގޮތުން މަޝްވަރާ ކުރަމުންނެވެ.
