އިސްރާއީލުން އިރާނާ ދެކޮޅަށް ހިންގަމުންދާ އުދުވާންތަކަށް ރައްދު ދިނުމުގެ ގޮތުން، އިރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން މިއަދުގެ ވަގުތެއްގައި އިސްރާއީލަށް އަމާޒުކޮށް ނުރައްކާތެރި ބެލިސްޓިކް މިސައިލް ހަމަލާތަކެއް ފޮނުވާލައިފިއެވެ. މި ހަމަލާގައި ބޭނުންކޮށްފައިވަނީ އެންމެ ފަހުގެ ޓެކްނޮލޮޖީ އެކުލެވޭ "ޚޯރަމްޝަހްރު-4" މޮޑެލްގެ މިސައިލްތަކެއް ކަމަށް ރިޕޯޓްތައް ބުނެއެވެ.
މި ހަމަލާގައި ފޮނުވާލި ކޮންމެ މިސައިލެއްގައި އެއް ޓަނުގެ ގޮވާތަކެތި (ވޯހެޑް) ހިމެނޭއިރު، މިއީ މިހާތަނަށް އިރާނުން ބޭނުންކުރި އެންމެ ބާރުގަދަ ހަތިޔާރުގެ ތެރޭގައި ހިމެނޭ އެއްޗެކެވެ. އައި.އާރު.ޖީ.ސީން ހާމަކުރި ގޮތުގައި، މި މިސައިލްތައް ވަނީ އިސްރާއީލުގެ ވައިގެ ދިފާއީ ނިޒާމުގެ ހަތް ފަށަލަ ފޫއަޅުވާލުމަށްފަހު އަމާޒުތަކަށް ވާސިލްވެފައެވެ. މިއީ އިސްރާއީލުގެ ދިފާއީ އައްޑަނަތަކަށް ދިން ބޮޑު ގޮންޖެހުމެއްގެ ގޮތުގައި މަސްރަހު ދިރާސާކުރާ ފަރާތްތަކުން ސިފަކުރެއެވެ.
އިރާނުން ބުނެފައިވަނީ މިއީ އެ ގައުމުގެ ސިޔާދަތަށް އިސްރާއީލުން އަރައިގަނެ، ހިންގަމުންދާ ލާއިންސާނީ އަމަލުތަކާއި އުދުވާންތަކަށް ދިން އެކަށީގެންވާ ރައްދެއް ކަމަށެވެ. މި ހަމަލާއާއެކު މުޅި މެދުއިރުމަތީގެ މަސްރަހު އިތުރަށް ހޫނުވެފައިވާއިރު، އިސްރާއީލުގެ އެކި ސަރަހައްދުތަކުގައި ނުރައްކަލުގެ ރަނގަބީލު ވަނީ އަޅަން ފަށާފައެވެ. އިރާނުން ބުނާ ގޮތުގައި އިސްރާއީލުން އިތުރު ހަމަލާއެއް ދީފިނަމަ، މިއަށްވުރެ ވަރުގަދަ ރައްދެއް ދިނުމަށް އެގައުމު އޮތީ ތައްޔާރަށެވެ.
މި ހަމަލާއާ ގުޅިގެން ބައިނަލްއަގުވާމީ މުޖުތަމައުގެ ސަމާލުކަން މިހާރު ވަނީ މި ސަރަހައްދަށް ހުއްޓިފައެވެ. އިސްރާއީލުން ފަލަސްތީނާއި ލުބުނާނުގައި ހިންގަމުންދާ ޖަރީމާތަކުގެ ސަބަބުން ސަރަހައްދީ ހަމަޖެހުން ގެއްލިފައިވާ މި ދަނޑިވަޅުގައި، އިރާނުގެ މި ހަމަލާއަކީ އިސްރާއީލަށް ދެވުނު ވަރުގަދަ އިންޒާރެއް ކަމަށް ބެލެވެއެވެ. މި ހާދިސާގެ ސަބަބުން ކުރިއަށް އޮތް ގަޑިތަކުގައި މަސްރަހަށް އަންނާނެ ބަދަލުތަކަށް ދުނިޔެ އޮތީ ކަންބޮޑުވުމާއެކު ބަލާށެވެ.
