އިންޑިއާ ކަނޑުގެ ސަރަހައްދުގައި ދަތުރުކުރަމުން ދިޔަ އީރާނުގެ ހަނގުރާމަމަތީ މަނަވަރަކަށް އެމެރިކާގެ ސަބްމެރީނަކުން ހަމަލާދީ ފައްތާލައި، 87 ސިފައިން މަރާލައިފިއެވެ.
މި ހާދިސާއާ ގުޅިގެން އިންޑިއާގެ ބޮޑުވަޒީރު ނަރެންދުރަ މޯދީއަށް ވަނީ ބޮޑެތި ފާޑުކިޔުންތަކެއް އަމާޒުވެފައެވެ. އީރާނުގެ މަނަވަރުތައް އިންޑިއާ ކަނޑަށް އައީ އިންޑިއާ ސަރުކާރުގެ ރަސްމީ ދައުވަތަކަށް ކަމަށްވާއިރު، އެ މަނަވަރުތަކުގެ ސަލާމަތާއި ރައްކާތެރިކަން ކަށަވަރުކޮށްނުދެވުމަކީ މޯދީގެ ނުކުޅެދުންތެރިކަން ކަމުގައި ގިނަ ބަޔަކު ސިފަކުރެއެވެ.
މީގެ އިތުރުން، މޯދީއަކީ އިޒްރޭލުގެ މަސްލަހަތު ހިމާޔަތްކުރުމަށްޓަކައި އީރާނާ ދެކޮޅަށް މަސައްކަތްކުރާ ފަރާތެއްގެ ގޮތުގައި ތުހުމަތުކޮށް، އޭނާއަކީ "ޣައްދާރެއް" ކަމުގެ އަޑުތައް ވަނީ ގަދަވެފައެވެ. އިންޑިއާގެ ދައުވަތަށް އައި މަނަވަރަކަށް ހަމަލާދިންއިރު، އެމެރިކާ އާއި އިޒްރޭލުގެ މަސްލަހަތު އިސްކޮށް، އީރާނަށް ދިން މި ހަމަލާގެ ފަހަތުގައި އިންޑިއާގެ އިހުމާލު އޮތް ކަމަށް ސިޔާސީ މަސްރަހު ދިރާސާކުރާ ފަރާތްތަކުން ބުނެއެވެ.
މި ނުރައްކާތެރި ހަމަލާ އަމާޒުވެފައިވަނީ އިންޑިއާގައި ބޭއްވި "މިލާން 2026" ކަނޑުގެ އަސްކަރީ ތަމްރީނުތަކުގައި ބައިވެރިވުމަށްފަހު އެނބުރި ގައުމަށް ދަތުރުކުރި އީރާނުގެ "އައިއާރްއައިއެސް ދޭނާ" އަށެވެ.
މައުޖް ކްލާހުގެ މި ފްރިގޭޓަށް ހަމަލާދީފައިވަނީ ސްރީލަންކާގެ އައްސޭރިފަށާ ދުރު ނޫން ސަރަހައްދަކުންނެވެ. ސްރީލަންކާގެ ކަނޑުގެ ސިފައިންނާ ހަވާލާދީ ލިބޭ އެންމެ ފަހުގެ މައުލޫމާތުތަކަށް ބަލާއިރު، މިހާތަނަށް 87 މީހެއްގެ ހަށިގަނޑު ވަނީ ފެނިފައެވެ. އަދި 32 މީހަކު ސަލާމަތްކުރެވިފައިވާއިރު، އިތުރު 61 ފަޅުވެރިއަކު އަދިވެސް ފެނިފައެއް ނުވެއެވެ.
