އުރުދުންގައި ގާއިމުކޮށްފައިވާ އެމެރިކާގެ އެންމެ ޒަމާނީ އެޑްވާންސް ރޭޑަރ ސިސްޓަމެއް، އިރާނުން ދިން ވަރުގަދަ ހަމަލާތަކެއްގައި ހަލާކުވެފައިވާ ކަމަށް ބައިނަލްއަގުވާމީ ޚަބަރު ފަތުރާ ވަސީލަތެއް ކަމަށްވާ ސީއެންއެން އިން ރިޕޯޓްކޮށްފިއެވެ.
ސީއެންއެންގެ ރިޕޯޓުގައިވާ ގޮތުން، އިރާނުން މި ހަމަލާ ދީފައިވަނީ އެމެރިކާއާއި އިޒްރޭލުން ގުޅިގެން އިރާނާ ދެކޮޅަށް ހިންގަމުންދާ އުދުވާނީ އަމަލުތަކަށް ރައްދު ދިނުމުގެ ގޮތުންނެވެ. މި ރޭޑަރ ސިސްޓަމަކީ އެ ސަރަހައްދުގައި އެމެރިކާއިން ބޭނުންކުރާ އެންމެ މުހިންމު އެއް ދިފާއީ ވަސީލަތެވެ.
އިރާނުން ބުނެފައިވާ ގޮތުގައި، މިއީ އެ ގައުމުގެ އިސްތިގުލާލަށް އަރައިގަނެ، އެމެރިކާއާއި އިޒްރޭލުން ދެމުންދާ ހަމަލާތަކަށް ދެވުނު އެކަށީގެންވާ ރައްދެކެވެ. މި ހަމަލާގެ ސަބަބުން އުރުދުންގައި ހުރި އެމެރިކާގެ އަސްކަރީ މަރުކަޒަކަށް ބޮޑެތި ގެއްލުންތަކެއް ލިބިފައިވާކަން ވެސް ރިޕޯޓްތައް ބުނެއެވެ. ސީއެންއެން އިން އިތުރަށް ހާމަކޮށްފައިވާ ގޮތުގައި، ސެޓްލައިޓް ފޮޓޯތަކުން ފެންނަ ގޮތުގައި މިފަދަ ރޭޑަރ ސިސްޓަމްތައް ގާއިމުކޮށްފައިވާ އިތުރު ދެ އިމާރާތަކަށް ޔުނައިޓެޑް އެރަބް އެމިރޭޓްސް (ޔޫއޭއީ) ގައި ވެސް ވަނީ ހަމަލާދީފައެވެ.
މި ހަމަލާއާ ގުޅިގެން އެމެރިކާގެ އަސްކަރިއްޔާއިން އަދި ރަސްމީކޮށް ވަކި އެއްޗެއް ބުނެފައެއް ނުވެއެވެ. ނަމަވެސް، މި ހާދިސާއާ ގުޅިގެން މެދުއިރުމަތީގެ ސަލާމަތީ މަސްރަހަށް ބޮޑެތި ބަދަލުތަކެއް އަތުވެދާނެ ކަމަށް މަސްރަހު ދިރާސާކުރާ ފަރާތްތަކުން ލަފާކުރެއެވެ.
