އިސްރާއީލާއި އެމެރިކާ ގުޅިގެން މެދުއިރުމަތީގައި ފަށާފައިވާ ހަނގުރާމަ މުޅި ސަރަހައްދަށް ފެތުރެމުންދާއިރު، އެމެރިކާގެ ސިފައިން އީރާނުގެ ބިމަށް އަރައިގަންނަން މަސައްކަތްކޮށްފިނަމަ އެކަމާ ސީދާ ކުރިމަތިލާން އެ ގައުމު އޮތީ ފުރިހަމައަށް ތައްޔާރަށް ކަމަށް އީރާނުގެ ފޮރިން މިނިސްޓަރު އައްބާސް އަރާޣޗީ ވިދާޅުވެއްޖެއެވެ.
އޭނާ ވިދާޅުވި ގޮތުގައި، އެމެރިކާގެ ސިފައިން އީރާނުގެ ސަރަހައްދަށް ވަދެގަތުމަކީ ކުރަން އުޅޭ ކަމެއްނަމަ، އޭގެ ނަތީޖާ ވަރަށް ހިތިވާނެއެވެ. އަދި އަމިއްލަ ދިފާއުގައި ކުރަންޖެހުނު ކޮންމެ ކަމެއް ކުރުމުގެ ގާބިލުކަން އީރާނުގެ ސިފައިންނަށް ލިބިގެންވާ ކަމަށްވެސް އޭނާ ބަޔާންކުރެއްވިއެވެ.
މި ހަނގުރާމައަކީ އެމެރިކާގެ މަދަދާއެކު އިސްރާއީލުން މުޅި ސަރަހައްދު ބިރުވެރިކަމެއްގެ ތެރެއަށް ވައްޓާލުމަށް ކުރަމުންދާ މަސައްކަތެއްގެ ގޮތުގައި އީރާނުން ސިފަކުރެއެވެ. އަރާޣޗީ އިތުރަށް ވިދާޅުވީ، އީރާނުން ދުވަހަކުވެސް އިސްވެ ހަނގުރާމައެއް ފަށަން ބޭނުންނުވާ ކަމަށާއި، ނަމަވެސް ގައުމުގެ އިސްތިގުލާލަށް އަންނަ ކޮންމެ ނުރައްކަލަކަށް ހަރުކަށި ރައްދެއް ދޭނެ ކަމަށެވެ.
މަސްރަހު ދިރާސާކުރާ ފަރާތްތަކުން ގަބޫލުކުރާ ގޮތުގައި، އީރާނުގެ މި އިންޒާރަކީ ސަރަހައްދީ ބާރުތަކުން އިސްރާއީލާއި އެމެރިކާގެ އުދުވާންތަކާ ދެކޮޅަށް ތެދުވަމުންދާ ކަމުގެ ހެއްކެކެވެ. އިސްރާއީލުން ހިންގަމުންދާ ލާއިންސާނީ އަމަލުތައް ހުއްޓުވުމުގެ ބަދަލުގައި އެމެރިކާއިން މަސައްކަތް ކުރަމުންދަނީ ހަނގުރާމަ އިތުރަށް ފުޅާކުރުމަށް ކަމަށްވެސް އީރާނުން ތުހުމަތުކުރެއެވެ.
