މިހާރު އޮތް ހާލަތުން، ބޭރުގައި ހުރި ރާއްޖޭގެ ބައެއް އެމްބަސީތައް ބަންދުކޮށް ސަރުކާރުގެ މަތި ލުއި ކުރަން ޖެހޭ ކަމަސް ޕީއެންއެފްގެ ސެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.
މަލީހު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.
އެ ޕޯސްޓުގައި މަލީހު ވަނީ ގައުމުގައި މިހާރު ކަންކަން ހިނގަމުންދާ ގޮތުން ރައްޔިތުންނަށް ތަކުލީފުތަކަކާ ކުރިމަތިލާން ޖެހިދާނެކަމުގެ ކަންބޮޑުވުން ފާޅުކުރައްވާފައެވެ.
އެގޮތުން ހަމަ ޓަސްލާފައި ތެލުގެ އަގު އެސްޓީއޯއިން ބޮޑުކޮށްފައިވަނިކޮށް މަލީހު ވަނީ، މިއީ މަސްވެރިންނާ ކަނޑު ދަތުރުފަތުރު ކުރާ ފަރާތްތަލަށް ސަރުކާރުން ސަބްސިޑީ ދޭންވީ ވަގުތުކަމަށް ވިދާޅުވެފައެވެ. އެހެން ނޫންނަމަ ތަކެތީގެ އަގު ނުކަތާ ވަރަށް ބޮޑުވެ ރައްޔިތުންނަށް ދަތި ދުވަސްތަކެއް ކުރި އޮތްކަަމަށް މަލީހު ވަނީ ހާމަކުރައްވާފައެވެ.
މީގެ އިތުރުން ބޭރުގައި ހުރި ރާއްޖޭގެ ބައެއް އެމްބަސީތައް ބަންދުކޮށް، ސަރުކާރުގެ މަތިލުއިކުރުމަކީ ނުވަތަ ސަރުކާރުގެ ކަރަދުތައް ކުޑަކުރުމަކީ މުހިއްމު ކަމެއްގެ ގޮތުގައި މަލީހު ފާހަގަކުރައްވާފައިވެއެވެ.
މަލީހު މިފަދައިން ވިދާޅުވެފައިވާއިރު މެދުއިރުމަތީގެ ހަނގުރާމައާ ގުޅިގެން ރާއްޖެއަށް ބޮޑެތި ދަތިތަކާ ކުރިމަތިލާން ޖެހިދާނެކަމަށް އިގްތިސޯދީ މާހރިުން ދަނީ ބުނަމުންނެވެ.
