ތައިލެންޑުގެ ފުލުހުންގެ ބެލުމުގެ ދަށުގައި ހުއްޓާ، މަސްތުވާތަކެތީގެ މައްސަލައެއްގައި ހައްޔަރުކުރި ދިވެހި ޒުވާނަކު މަރުވެއްޖެއެވެ.
މި ހާދިސާގައި މަރުވެފައިވަނީ ތ. ގުރައިދޫ، ފަނާރު، އިބްރާހިމް ނަބީހް ނަސީމް އެވެ. އޭނާ ހައްޔަރުކޮށްފައިވަނީ މިދިޔަ މަހުގެ 22 ވަނަ ދުވަހު ތައިލެންޑުގެ ޑޮންމުއެންގް އެއާޕޯޓުންނެވެ.
ދިވެހި ފުލުހުންގެ އިދާރާއިން ވަނީ ނަބީހު މަރުވީ ތައިލެންޑު ފުލުހުންގެ ބަންދުގައި ހުއްޓާކަން ކަށަވަރުކޮށްދީފައެވެ. ނަމަވެސް އޭނާ މަރުވާން ދިމާވި ސަބަބެއް ފުލުހުން އަދި ހާމައެއް ނުކުރެއެވެ.
ތައިލެންޑުގެ ގާނޫނުތައް ބުނާގޮތުން، ފުލުހުންގެ ބަންދުގައި ހުއްޓާ މީހަކު މަރުވެއްޖެނަމަ ނުވަތަ ޝައްކު އުފެދޭ ފަދަ މަރެއްނަމަ އޮޓޮޕްސީ ހެދުން ލާޒިމުކުރެއެވެ. އެހެންކަމުން، ނަބީހުގެ މަރުގެ ހަގީގަތް ހޯދުމަށް އޭނާގެ ހަށިގަނޑުގެ އޮޓޮޕްސީ ހަދާނެ ކަމަށް ބެލެވެއެވެ.
ދިވެހި ފުލުހުން ވިދާޅުވީ، މި މައްސަލައާ ގުޅިގެން ބަލަންޖެހޭ ކަންކަން ކަމާބެހޭ ބޭރުގެ އިދާރާތަކާ ގުޅިގެން މިހާރު ތަހުގީގު ކުރަމުންދާ ކަމަށެވެ.
ތައިލެންޑަކީ "ގޯލްޑަން ޓްރެއިންގަލް" ސަރަހައްދުން އުފައްދާ މަސްތުވާތަކެތި ދުނިޔޭގެ އެކި ގައުމުތަކަށް ފޮނުވުމަށް ޓްރެފިކަރުން ބޭނުންކުރާ މައިގަނޑު އެއް މަގަށްވާއިރު، މީގެ ކުރިންވެސް އެ ގައުމުގައި މަސްތުވާތަކެތީގެ އެކި މައްސަލަތަކުގައި ދިވެހިން ހައްޔަރުކޮށްފައިވެއެވެ. ތައިލެންޑަކީ ގިނަ އަދަދެއްގެ ދިވެހިން ޗުއްޓީއަށާއި ބޭސްފަރުވާއަށް ޒިޔާރަތްކުރާ ގައުމެކެވެ.
