އިސްލާމީ އުއްމަތާއި އީރާނާ ދެކޮޅަށް އެމެރިކާއާއި އިޒްރޭލުން ފަށާފައިވާ ނުބައި އުދުވާނުތަކަށް ރައްދުދިނުމުގެ ގޮތުން، ކުވައިތުގައި ހުރި އެމެރިކާގެ އަސްކަރީ މަރުކަޒުތަކަށް އީރާނުން ވަރުގަދަ ހަމަލާތަކެއް ދީފިއެވެ.
ފާއިތުވި ގަޑިއިރުތަކުގައި ދިން މި ހަމަލާތަކުގައި އީރާނުގެ އަސްކަރީ ގާބިލުކަން ދުނިޔެއަށް ވަނީ ދައްކާލާފައެވެ.
މި އޮޕަރޭޝަންގައި އީރާނުން ބޭނުންކޮށްފައިވަނީ މަޝްހޫރު 'ޝާހެދް-136' ޑްރޯންތަކުގެ އިތުރުން، އެންމެ ފަހުގެ ޓެކްނޮލޮޖީ އެކުލެވޭ 'އަރާޝް-2' މަރުކާގެ ޑްރޯންތަކެވެ. އަރާޝް-2 އަކީ 150 ކިލޯގެ ބަރުދަނުގެ ގޮވާތަކެތި (ވޯހެޑް) އުފުލުމުގެ ގާބިލުކަން ލިބިފައިވާ، އަމާޒަށް ފާހަގަކޮށްލެވޭ ފަދަ ވަރުގަދަ ހަމަލާތަކެއްދޭ އުޅަނދެކެވެ.
މި ހަމަލާތަކަކީ އިސްލާމީ ބިންތަކަށް އަތްގަދަކޮށް، މުސްލިމުންނަށް އަނިޔާވެރިވަމުންދާ އިސްތިއުމާރީ ބާރުތަކަށް ދެވުނު ވަރުގަދަ މެސެޖެކެވެ. އީރާނުގެ މި ފިޔަވަޅަކީ އަމިއްލަ ދިފާއުގައި އަޅާފައިވާ، އަދި ދުޝްމަނުންގެ ކިބައިން ބަދަލުހިފުމުގެ ފެށުމެއްގެ ގޮތުގައި ވަނީ ސިފަކޮށްފައެވެ. މި ހަމަލާތަކާއެކު އެމެރިކާގެ އަސްކަރީ ބާރުތަކަށް ބޮޑެތި ގެއްލުންތަކެއް ލިބިފައިވާ ކަމަށް ރިޕޯޓްތައް ބުނެއެވެ.
