ރާއްޖޭގެ ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށް ބޭއްވުމަށް ސަރުކާރުން ކުރަމުންދާ މަސައްކަތަކީ ގައުމަށް ވެވޭ ބޮޑު ޚިޔާނާތެއްގެ ގޮތުގައި ކުރީގެ ނައިބު ރައީސް އަދި ޕީއެންއެފްގެ ނައިބު ޑރ. މުޙައްމަދު ޖަމީލް އަޙްމަދު ސިފަކުރައްވައިފިއެވެ.
މިއަދު އެކްސްގައި ކުރެއްވި ޕޯސްޓެއްގައި ޑރ. ޖަމީލް ވިދާޅުވީ، ދެ އިންތިޚާބު އެއްކޮށްލުމަކީ ދުސްތޫރީ ފާރަވެރިކަމުގެ ނިޒާމު ގަނޑުބަޑުވެ، ރައްޔިތުންގެ ބާރުވެރިކަން ކުޑަވެގެންދާނެ ކަމެއް ކަމަށެވެ. އަދި ކޮންމެ ގޮތެއް ހަދައިގެންވެސް ވެރިކަމުގެ ބާރުތައް ދެމެހެއްޓުމަށް މަސައްކަތް ކުރުމަކީ ޚުދުމުޚުތާރު ވެރިންގެ ސިފައެއް ކަމަށް އޭނާ ފާހަގަކުރެއްވިއެވެ.
ރައީސް ޑރ. މުޙައްމަދު މުޢިއްޒުގެ ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުވިދާޅުވަމުން ޖަމީލް ވިދާޅުވީ، މި ސަރުކާރަކީ ރައްޔިތުންނަށް ނުއުފުލޭވަރުގެ ބޮޑެތި ޚަރަދުތަކާއި އިގްތިސާދީ ތަކްލީފުތައް ޖައްސާފައިވާ، ނަތީޖާ ނެރެނުދެވޭ ސަރުކާރެއް ކަމަށެވެ. ވެރިއެއްގެ އެންމެ އިސް ވާޖިބަކީ އަމިއްލަ މަސްލަހަތު އިސްކުރުމުގެ ބަދަލުގައި، ގައުމުގެ އިގްތިސާދީ އަދި އިޖްތިމާއީ ހާލަތު ރަނގަޅުކޮށް، އަންނަން އޮތް ޖީލުތަކަށް އަމާން ގައުމެއް ފޯރުކޮށްދިނުން ކަމަށްވެސް އޭނާ ވިދާޅުވިއެވެ.
"ވެރިކަމުގައި ހޭދަކުރާ ކޮންމެ އަހަރަކު އަމިއްލަ މަސްލަހަތަށްޓަކައި ގާނޫނުއަސާސީއަށް ބަދަލު ގެނެސް، ރައްޔިތުން ނޭވާ ހާސްކުރަން އުޅުމަކީ އިޚްލާސްތެރިކަމެއް ނޫން،" ޑރ. ޖަމީލް ލިޔުއްވާފައިވެއެވެ.
ސަރުކާރުން މިހާރު ރާވަމުންދަނީ ކުރިއަށް އޮތް ލޯކަލް ކައުންސިލް އިންތިޚާބާ ދިމާކޮށް، ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމާ މެދު ރައްޔިތުންގެ ފެންނަ ނުފެންނަ ވޯޓެއް (ރިފަރަންޑަމް) ނެގުމަށެވެ. މި ނިންމުމަށް އިދިކޮޅު ފަރާތްތަކުން ދަނީ ކަންބޮޑުވުން ފާޅުކޮށް، މިއީ ޑިމޮކްރެޓިކް ހަމަތަކާ ޚިލާފު ކަމެއް ކަމަށް ބުނަމުންނެވެ.
