ވެރިއެއްގެ އެންމެ މަތިވެރި ސިފައަކަށް ވާން ވާނީ ގައުމަށް އިޚްލާސްތެރިވުން ކަމަށް ކުރީގެ ނައިބު ރައީސް އަދި ޕީއެންއެފްގެ ނައިބު ރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.
ޑރ ޖަމީލު މިފަދައިން ވިދާޅުވެފައިވަނީ ދެ އިންތިހާބު އެއްކޮށްލަން ސަރުކާރުން ކުރަމުންދާ މަސައްކަތާ ދެކޮޅަށް ތެދުވަން ޖެހޭ ކަމަށް ސިޔާސީ އެކްޓިވިިސްޓު ލޫކަސް ޖަލީލު ކޮށްފައިވާ ޕޯސްޓެއް ރީޕޯސްޓުކުރައްވާ ކުރެއްވި އެކްސް ޕޯސްޓެއްގައެވެ.
ޑރ ޖަމީލު ވިދާޅުވެފައިވަނީ، އެއްޖީލަށް ފަހު އަނެއް ޖީލަށް ތިމާއަށް ލިބުނު ރާއްޖެއަށް ވުރެ ރަނގަޅު ރާއްޖެއެއް ފޯރުކޮށް ދިނުމަކީ ވެރިންގެ ގޮތުގައި އޭރަކު ތިބޭ ބައެއްގެ ބޮލުގައި އެޅިފައި އޮންނަ އެންމެ ބޮޑު ޒިންމާ ކަމަށެވެ. އެގޮތުން ރަނގަޅު އިގްތިސާދީ އިޖްތިމާއީ ރައްކާތެރިކަމެއް ގާއިމްކޮށްދިނުމަކީވެސް އޭގެ ތެރޭގައި ހިމެނޭ ކަމެއްގެ ކަމަށް ޑރ ޖަމީލު ވިދާޅުވެފައިވެއެވެ.
ނަމަވެސް މިސަރުކާރަކީ ބިޔަ ބޮޑު، ނަތީޖާ އެއް ނުނެރެވޭ، ނުއުފުލޭވަރުގެ ޚަރަދާ ތަކްލީފު ރައްޔިތުންނަށް ޖައްސާފައިވާ ސަރުކާރެއްކަން ފާހގަަކުރައްވާ ޑރ ޖަމީލު ވަނީ ދުނިޔެ މިދެކޭ އިގްތިސާދީ ޙާލަތުގައި އެކަންތައް ރަނގަޅުކުރަން ޖެހޭ ކަމަށް ވިދާޅުވެފައެވެ.
ދެ އިންތިޚާބު އެއްކޮށްލުމަކީ ބޮޑު ގޯހެއް ކަމަށާ ދުސްތޫރީ ފާރަވެރި ނިޒާމު އޭގެ ސަބަބުން ގަނޑުބަޑުވާނެ ކަމަށްވެސް ޑރ ޖަމީލު ވަނީ ވިދާޅުވެފައެވެ. ރައްޔިތުންނަށް ސީދާ ގޮތް ނިންމަން ލިބޭ ފުރުސަތުތައް ވެސް އެ ފަދަ ނިންމުމަކުން މަދުވެގެންދާނެ ކަން ވެސް އެމަނިކުފާނު ފާހަގަކުރައްވާފައިވެއެވެ.
ވެރިކަމުގައި ހޭދަކުރާ ކޮންމެ އަހަރަކު ޑރ. މުހައްމަދު މުއިއްޒުގެ މަސްލަޙަތަށްޓަކައި ދުސްތޫރުގައި އިރުއިރުކޮޅާ ފައިން ތަޅާ ރައްޔިތުން ނޭވާ ހާސްކުރަން އުޅުމަކީ އިޚްލާސްތެރިކަމެއް ނޫން ކަމަށް ވިދާޅުވެ މަޖާޒީ ފާޑުކިޔުމާ އެކު ޑރ ޖަމީލު ޕޯސްޓު ނިންމަވާލައްވަފާއިވަނީ ކޮންމެ ގޮތެއް ހަދައިގެން ވެރިކަމުގައި އިތުރަށް ހުރެވޭތޯ ބެލުމަކީ ޚުދުމުޚުތާރުވުމުގެ ގޮތުގައި ސިފަކުރައްވަމުންނެވެ.
ޑރ ޖަމީލު މިފަދައިން ވިދާޅުވެފައިވާއިރު ރައީސް މުއިއްޒު ވަނީ އެމަނިކުފާނަކީ ޚުދުމުޚުތާރު ވެރިއެއްގެ ގޮތުގައި ޓެގު އެޅުވޭނެ ބޭފުޅެއް ނޫން ކަމަށް ވދާޅުވެފައެވެ.
