އީރާނުގެ ވައިގެ ސަރަހައްދަށް އިޒްރޭލުން ފޮނުވި ގިނަ އަދަދެއްގެ ޑްރޯންތަކެއް، އެ ގައުމުގެ ވަރުގަދަ ވައިގެ ދިފާއީ ނިޒާމުން ކާމިޔާބުކަމާއެކު ވައްޓާލައިފި ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ހާމަކޮށްފިއެވެ.
މި ހާދިސާގައި އީރާނުގެ އަސްކަރީ ކުޅަދާނަކަން ދައްކުވައިދީފައިވާއިރު، އައި.އާރު.ޖީ.ސީން ބުނި ގޮތުގައި ވައްޓާލި ޑްރޯންތަކުގެ ތެރެއިން އެއް ޑްރޯން ވައްޓާލާފައިވަނީ ސީދާ ވެރިރަށް ތެހެރާންގެ މަތިންނެވެ. މީގެ އިތުރުން، އެ ގައުމުގެ އިރުދެކުނު ބުޝެހްރު ޕްރޮވިންސްގެ ޖާމް އަދި ޚޯރްމޯޖް ޓައުންތަކާ ކައިރިންވެސް ދެ ޑްރޯންއެއް ވައިގެ ތެރޭގައި ގޮއްވާލައި، ބިމަށް ވައްޓާލާފައިވާ ކަމަށް އެ އިދާރާއިން މައުލޫމާތު ދެއެވެ.
އީރާނުގެ ދިފާއީ ބާރުތަކުން ބުނެފައިވަނީ، ގައުމުގެ ސަލާމަތަށް ނުރައްކާވާ ފަދަ ކޮންމެ ހަރަކާތަކަށް ވަގުތުން ރައްދު ދިނުމުގެ ފުރިހަމަ ގާބިލުކަން އެ ގައުމުގެ އަސްކަރިއްޔާގައި އެބަހުރި ކަމަށެވެ. މި ޑްރޯންތައް ވައްޓާލުމުގައި އީރާނުން ބޭނުންކޮށްފައިވަނީ އެ ގައުމުގެ އަމިއްލަ އުފެއްދުންތަކެއް ކަމަށްވާ ޒަމާނީ ވައިގެ ދިފާއީ ޓެކްނޮލޮޖީއެވެ.
މި ހަމަލާތަކުގެ މަގްސަދަކީ އީރާނުގެ މުހިންމު ސަރަހައްދުތަކަށް ގެއްލުން ދިނުން ކަމަށް ބެލެވުނު ނަމަވެސް، އީރާނުގެ ފާރަވެރި އަސްކަރިއްޔާގެ ސަބަބުން އެއްވެސް ގެއްލުމެއް ނުވެ ވަނީ ހަމަލާތައް ނާކާމިޔާބު ކޮށްލާފައެވެ. އީރާނުން ދަނީ މި ޑްރޯންތަކަކީ ކޮން ގައުމަކުން ފޮނުވާލި އެއްޗެއްތޯ ބެލުމަށް އިތުރަށް ތަހުގީގު ކުރަމުންނެވެ.
