އިޒްރޭލާއި އެމެރިކާއިން އިރާނާ ދެކޮޅަށް ހިންގަމުންދާ އުދުވާނީ ޢަމަލުތަކާއި ހަނގުރާމައިގެ ނުރައްކަލާ ގުޅިގެން، ވިލާތުގެ ބާރެއް ކަމަށްވާ ސްވިޓްޒަލޭންޑުން އިރާނުގެ ދިފާޢުގައި ބަސްބުނެ، ބައިނަލްއަޤުވާމީ މައިދާނުގައި ތެދުވެއްޖެއެވެ.
ސްވިޓްޒަލޭންޑުން މިފަދަ ހަރުދަނާ ފިޔަވަޅުތަކެއް އަޅަމުންދާއިރު، ދިވެހިރާއްޖޭގެ ރައީސް މުއިއްޒުގެ ސަރުކާރުން މުސްލިމް ޤައުމެއްގެ ދިފާޢުގައި ބަސްބުނަން ނުކެރި ފަސްޖެހެމުންދާތީ ރައްޔިތުންގެ މެދުގައި ބޮޑެތި ކަންބޮޑުވުންތަކެއް ވަނީ އުފެދިފައެވެ.
މަސްރަޙު ދިރާސާކުރާ ފަރާތްތަކުން ފާހަގަކުރާ ގޮތުގައި، ސްވިޓްޒަލޭންޑުން ވަނީ މެދުއިރުމަތީގެ ހަމަޖެހުމަށްޓަކައި އިރާނުގެ އިސްތިޤުލާލަށް އިޙުތިރާމްކުރުމަށާއި، އިޒްރޭލުގެ ހަމަލާތައް ކުށްވެރިކޮށް ބަޔާންތައް ނެރެފައެވެ. ނަމަވެސް، އިސްލާމީ އުއްމަތުގެ ޙައްޤުގައި ވަކާލާތުކުރާނެ ކަމަށް ބުނެ ވެރިކަމަށް އައި މުއިއްޒު ސަރުކާރުން ފެންނަނީ އެމެރިކާއާއި އިޒްރޭލުގެ ނުފޫޒުގެ ދަށުވެފައިވާ މަންޒަރެވެ.
މި މައްސަލައިގައި ރައްޔިތުންގެ ފަރާތުން އަންނަ ބޮޑު ޕްރެޝަރާ ގުޅިގެން، ސަރުކާރުން ނަމަކަށް ބަޔާނެއް ނެރުނު ނަމަވެސް، އެ ބަޔާނުގައި އިޒްރޭލާއި އެމެރިކާގެ ނަން ސީދާކޮށް ބޭނުންކޮށް ކުށްވެރިކުރުމަށް ވަނީ ނުކުޅެދިފައެވެ. މިއީ މުއިއްޒު ސަރުކާރުގެ ޚާރިޖީ ސިޔާސަތު އޮތީ އިޒްރޭލާއި އެމެރިކާގެ މަސްލަހަތު ހިމާޔަތްކުރުމަށްކަން ހާމަވާ ސާފު ހެއްކެއް ކަމަށް ގިނަ ބަޔަކު ދެކެއެވެ.
އިރާނާ ދެކޮޅަށް ހިންގާ ލާއިންސާނީ ޢަމަލުތަކާ މެދު ވިލާތުގެ ޤައުމުތަކުންވެސް ކަންބޮޑުވުން ފާޅުކުރަމުންދާއިރު، ރާއްޖެ ފަދަ ސައްތައަކުން ސައްތަ މުސްލިމް ޤައުމެއްގެ ވެރިކަމުގައި ހުންނެވި މުއިއްޒު އިސްލާމީ އަޚުވަންތަކަމަށްވުރެ ބޮޑަށް ހުޅަނގުގެ ބާރުތަކަށް ބޯލަނބަމުންދާ ދިއުމަކީ ދިވެހި ތާރީޚުގައިވެސް ފެނިގެންދާ ހިތާމަވެރި މަންޒަރެކެވެ. ރައްޔިތުން ގޮވާލަމުންދަނީ ސިޔާސީ މަންފާއަށްވުރެ ބޮޑަށް އިސްލާމީ އުއްމަތުގެ ދިފާޢުގައި ސާބިތުކަމާއެކު ބަސްބުނުމަށެވެ.
