މިހާރު ހިނގަމުންދާ ހަނގުރާމަ އާއި ކުރިމަތިލުންތައް ނިންމާލާނެ ވަގުތު ކަނޑައަޅާނީ އީރާނުން ކަމަށާއި، އެއީ އެމެރިކާ އާއި އިޒްރޭލަށް ނިންމޭނެ ކަމެއް ނޫން ކަމަށް އީރާނުގެ އަސްކަރިއްޔާގެ އިސް ކޮމާންޑަރަކު ވިދާޅުވެއްޖެއެވެ.
އީރާނުގެ ޚާތަމުލް އަންބިޔާ ސެންޓްރަލް ހެޑްކުއާޓާޒްގެ ކޮމާންޑަރު މޭޖަރ ޖެނެރަލް އަލީ ޢަބްދުﷲ މިފަދައިން ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕް ދެއްވި އިންޒާރުތަކަށް ރައްދުދެއްވަމުންނެވެ. ފްލޮރިޑާގެ ޑޯރަލްގައި ނޫސްވެރިންނާ ބައްދަލުކުރައްވައި ޓްރަމްޕް ވަނީ، ވޭތުވެދިޔަ 10 ދުވަހުގެ ހަނގުރާމައަކީ "ކުރު މުއްދަތުގެ ދަތުރެއް" (ޝޯޓް-ޓާމް އެކްސްކާޝަން) ގެ ގޮތުގައި ސިފަކުރައްވައި، މި ކުރިމަތިލުންތައް ވަރަށް އަވަހަށް ނިމުމަކަށް އަންނާނެ ކަމަށް ވިދާޅުވެފައެވެ.
ޓްރަމްޕްގެ ވާހަކަފުޅުގައި އީރާނަށް ވަރުގަދަ އިންޒާރުތަކެއް ދެއްވަމުން ވިދާޅުވީ، ހޯރްމޫޒް ކަނޑުއޮޅިން މުދާ އުފުލާ އުޅަނދުތަކަށް އީރާނުން ހުރަސްއަޅާ ނަމަ، ދެމުންދާ ހަމަލާތައް މިހާރަށްވުރެ ވަރުގަދަ ކުރާނެ ކަމަށެވެ. އަދި އީރާނުގެ މިސައިލް ގާބިލްކަން މިހާރު 10 އިންސައްތައަށް ވުރެ ދަށަށް ވެއްޓިފައިވާ ކަމަށްވެސް ޓްރަމްޕް ބުނެފައިވެއެވެ.
މޭޖަރ ޖެނެރަލް އަލީ ޢަބްދުﷲ އިތުރަށް ވިދާޅުވީ، ދުޝްމަނުން ދިން ހަމަލާތަކާމެދު އެބައިމީހުން އަމިއްލައަށް ހިތާމަކޮށް ދެރަވާ މިންވަރަށް އީރާނުން ބަދަލުހިފުމުގެ މަސައްކަތް ކުރިއަށް ގެންދާނެ ކަމަށެވެ. "އެމެރިކާއާއި އިޒްރޭލަށް ބޭނުންހާ ވަގުތަކު ހަނގުރާމަ ނިންމައެއް ނުލެވޭނެ. އިސްލާމީ ޖުމްހޫރިއްޔާގެ އެންމެ މަތީ ލީޑަރާއި ސިފައިން ބޭނުންވަނީ ބަދަލުހިފަން،" އީރާނުގެ ދައުލަތުގެ މީޑިއާއަށް ދެއްވި ބަސްދީގަތުމުގައި އޭނާ ވިދާޅުވިއެވެ.
ނޫސްވެރިންގެ ބައްދަލުވުމުގައި ޓްރަމްޕް ވަނީ އީރާނުގެ ޑްރޯން އާއި މިސައިލް އުފައްދާ މަރުކަޒުތައް ނައްތާލުމުގެ މަސައްކަތް ބާރަށް ކުރިއަށްދާކަން ފާހަގަކުރައްވާފައެވެ. އަދި އީރާނުގެ މިސައިލް ގާބިލްކަން މިހާރު 10 އިންސައްތައަށް ވުރެ ދަށަށް ގޮސްފައިވާ ކަމަށްވެސް ޓްރަމްޕް ވިދާޅުވިއެވެ. މީގެ އިތުރުން، "ޓެރަރިސްޓް ނިޒާމަކުން މުޅި ދުނިޔެ ރަހީނުކޮށް، ތެލުގެ ސަޕްލައި ހުއްޓުވަން ކުރާ މަސައްކަތަށް ފުރުސަތެއް ނުދޭނަން،" ކަމަށް ވިދާޅުވެ ޓްރަމްޕް ވަނީ އީރާނަށް ހަރުކަށި އިންޒާރެއް ދެއްވާފައެވެ.
މިދިޔަ ފެބްރުއަރީ މަހުގެ 28 ވަނަ ދުވަހު އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމާ ގުޅިގެން މިހާތަނަށް އީރާނުގެ 5,000 އަށް ވުރެ ގިނަ އަމާޒަށް އެމެރިކާ އާއި އިޒްރޭލުން ވަނީ ހަމަލާދީފައެވެ. މި ހަމަލާތަކުގައި އީރާނުގެ ނިއުކްލިއާ މަރުކަޒުތަކާއި، ތެޔޮ ސާފުކުރާ ކާރުޚާނާތަކުގެ އިތުރުން އާންމުން ދިރިއުޅޭ ސަރަހައްދުތަކަށް ބޮޑެތި ގެއްލުންތަކެއް ލިބިފައިވާކަން ޓްރަމްޕް ވަނީ ހާމަކުރައްވާފައެވެ.
މި ކުރިމަތިލުންތައް އިތުރަށް ވަރުގަދަވަމުންދާއިރު، ދެ ފަރާތުގެ ދެމެދުގައި އޮތް ބަހުގެ ހަމަލާތައް ވެސް މިހާރު ވަނީ އިންތިހާއަށް ހޫނުވެފައެވެ. އީރާނުން ބުނަމުންދަނީ އެ ގައުމުގެ އަސްކަރީ ގާބިލްކަން އަދިވެސް ވަރުގަދަ ކަމަށާއި، ހަނގުރާމައިގެ ކުރިމަގު ނިންމާނީ ސީދާ ތެހެރާނުން ކަމަށެވެ.
