އިންޑިއާގެ ތެޔޮ އުފުލާ ބޯޓުތަކަށް ހޮރްމުޒް ކަނޑުއޮޅިން ދަތުރުކުރުމުގެ ހުއްދަ ދީފައިވާ ކަމަށް ދެކެވޭ ވާހަކަތައް އިރާނުގެ އޮފިޝަލުން ރަސްމީކޮށް ދޮގުކޮށްފިއެވެ. އިރާނުގެ ސަރުކާރުން ބުނެފައިވަނީ، އިންޑިއާގެ ތެޔޮ ޓޭންކަރުތަކަށް އެ ސަރަހައްދުން ދަތުރުކުރުމުގެ އެއްވެސް ލުޔެއް ދިނުމަށް ނިންމާފައި ނުވާނެ ކަމަށެވެ.
އިރާނުގެ އޮފިޝަލުން ހާމަކޮށްފައިވާ ގޮތުގައި، އިންޑިއާގެ އިގްތިސާދަށް މިހާރު ކުރިމަތިވަމުންދާ ގޮންޖެހުންތަކަކީ އެ ގައުމުން ގެންގުޅޭ ހާރިޖީ ސިޔާސަތުތަކުގެ ނަތީޖާއެވެ.
މިގޮތުން، އިންޑިއާގެ އިގްތިސާދު ފުޑެމުންދާއިރު، ތެލުގެ އަގު އިންތިހާއަށް ބޮޑުވެ އޭގެ ނޭދެވޭ އަސަރު އެ ގައުމުގެ އާންމު ދިރިއުޅުމަށާއި ސިނާއަތްތަކަށް ވަރަށް ބޮޑަށް ކުރަމުންދާކަން ފާހަގަކުރެވިފައިވެއެވެ.
މީގެ އިތުރުން، އިރާނުން ބުނެފައިވަނީ އިޒްރޭލުގެ އަނިޔާވެރިކަމަށް ވާގިވެރިވެ، އިރާނާ ދެކޮޅަށް އިންޑިއާއިން ޣައްދާރުވެފައިވާ ކަމަށެވެ. އިސްލާމީ އުންމަތާ ދެކޮޅަށް މަސައްކަތްކުރާ ފަރާތްތަކަށް އެހީތެރިކަން ފޯރުކޮށްދިނުމުގެ ހިތި ނަތީޖާ މިހާރު އިންޑިއާއަށް ފެންނަމުންދާ ކަމަށްވެސް އިރާނުގެ މަސްއޫލުވެރިން ވިދާޅުވިއެވެ.
ހޮރްމުޒް ކަނޑުއޮޅިއަކީ ދުނިޔޭގެ ތެލުގެ ވިޔަފާރީގައި އެންމެ މުހިންމު އެއް މަގު ކަމަށްވާއިރު، އިންޑިއާއަށް މި މަގު ބަންދުވުމަކީ އެ ގައުމުގެ ހަކަތައިގެ ރައްކާތެރިކަމަށް އޮތް ބޮޑު ނުރައްކަލެކެވެ.
އިރާނުން މިފަދަ ހަރުކަށި ފިޔަވަޅެއް އަޅާފައި މިވަނީ، ސަރަހައްދީ ސިޔާސީ މަސްރަހުގައި އިންޑިއާއިން އިޒްރޭލަށް ތާއީދުކޮށް، އިރާނުގެ މަސްލަހަތުތަކާ ދެކޮޅަށް މަސައްކަތް ކުރަމުންދާ ދަނޑިވަޅެއްގައެވެ.
