އިރާނުން އިސްރާއީލަށް އަމާޒުކޮށް ފޮނުވާލި މިސައިލްތަކުގެ ވަރުގަދަ ރާޅެއް، ނަފްތާލީ އެއާ ބޭސް ހިމެނޭ ނެގޭވް ސަރަހައްދަށް އަރައި، އެ ބޭސްއަށް ބޮޑެތި ގެއްލުންތަކެއް ލިބިއްޖެއެވެ.
އިސްރާއީލުގެ މަސްދަރުތަކުން މައުލޫމާތު ދޭ ގޮތުގައި، އިރާނުން ދިން މި ހަމަލާތަކުގައި ނެގޭވް ސަރަހައްދުގައި އޮންނަ އަސްކަރީ މަރުކަޒަށް ވަނީ ވަރަށް ބޮޑަށް އަސަރުކޮށްފައެވެ. މި ހަމަލާއަކީ ފަހުގެ ތާރީޚެއްގައި އިސްރާއީލުގެ އަސްކަރީ މަރުކަޒަކަށް އަމާޒުވި އެންމެ ވަރުގަދަ އެއް ހަމަލާ ކަމަށް ރިޕޯޓުތައް ބުނެއެވެ.
ނަފްތާލީ އެއާ ބޭސްއަކީ އިސްރާއީލުގެ ވައިގެ ސަފުތަކުގެ އެންމެ މުހިންމު އެއް މަރުކަޒެވެ. އެތަނުގައި އިސްރާއީލުގެ އެންމެ ޒަމާނީ އަސްކަރީ އާލާތްތައް ބަހައްޓާފައި ހުރެއެވެ. އޭގެ ތެރޭގައި އެފް-35އައި (F-35I) މަރުކާގެ ޖެޓްތަކާއި، އެފް-15އައި (F-15I) ގެ ފްލީޓަކާއި، ސީ-130ޖޭ ސުޕަ ހަރކިއުލަސް (C-130J Super Hercules) އަސްކަރީ މަތިންދާބޯޓުތަކުގެ ސްކޮޑްރަންއެއް ހިމެނެއެވެ.
މީގެ އިތުރުން، ވައިގެ ތެރޭގައި ތެޔޮ އެޅުމަށް ބޭނުންކުރާ ބޮއިންގް-707 (Boeing 707) މަރުކާގެ މަތިންދާބޯޓުތައްވެސް މި ބޭސްގައި އޮޕަރޭޓް ކުރެއެވެ.
މި ހަމަލާއާ ގުޅިގެން މެދުއިރުމަތީގެ މަސްރަހު އިތުރަށް ގޯސްވެފައިވާއިރު، އިސްރާއީލުގެ އަސްކަރިއްޔާއިން އަންނަނީ ލިބުނު ގެއްލުންތަކުގެ ތަފްސީލު ދެނެގަތުމުގެ މަސައްކަތް ކުރަމުންނެވެ. އިރާނުން ބުނެފައިވަނީ މިއީ އިސްރާއީލުން ހިންގަމުންދާ އުދުވާނުތަކަށް ދިން ރައްދު ހަމަލާއެއް ކަމަށެވެ.
