ޕީޕަލްސް ނޭޝަނަލް ފްރަންޓް (ޕީއެންއެފް) ގެ ނައިބު ރައީސް ޑރ. މުޙައްމަދު ޖަމީލް އަޙްމަދު، ރާއްޖޭގެ މިހާރުގެ އިގްތިސާދީ ޙާލަތާ މެދު ކަންބޮޑުވުން ފާޅުކުރައްވައި ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ޑރ. ޖަމީލް ވިދާޅުވީ، ގައުމެއްގެ ޙާލަތު ވަޒަންކޮށްލެވޭނީ މިހާރު ރާއްޖެ އޮތް ފެންވަރުން ކަމަށެވެ. އެގޮތުން ލޯނު ދައްކަން ލޯނު ނަގަން ޖެހުމާއި، ރިޒާވް ބަހައްޓަން ލޯނު ނަގަން ޖެހުމުގެ އިތުރުން މުދާ ގެންނަން ވެސް ލޯނަށް ބަރޯސާވާން ޖެހުމަކީ ގައުމު ބަނގުރޫޓުވެފައިވާ ކަމުގެ ސާފު ހެއްކެއް ކަމަށް ޖަމީލް ފާހަގަކުރެއްވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް އަމާޒުކުރައްވައި ޖަމީލް ވިދާޅުވީ، ވެރިކަމާ ޙަވާލުވުމުގެ ކުރިން ރައީސް މުޢިއްޒު ހެއްދެވި "ބޮޑުދޮގުތައް" މިހާރު ފަޅާއަރަމުންދާ ކަމަށެވެ. އަދި މިހާރު އެއްވެސް ބޭރުގެ އިދާރާއަކުން ނުވަތަ ގައުމަކުން ރާއްޖޭގެ އިގްތިސާދަށް "ފެހި ސިގްނަލެއް" ލިބެން ނެތް ކަމަށް ވެސް ޖަމީލް ވިދާޅުވިއެވެ.
މީގެ އިތުރުން، ސަރުކާރުން ވަޒީފާ ދީފައިވާ ބައެއް ފަރާތްތަކުން ގައުމުގެ ޙަގީގީ ޙާލަތު ފޮރުވުމަށް މަސައްކަތް ކުރަމުންދާ ކަމަށް ޑރ. ޖަމީލް ތުހުމަތު ކުރެއްވިއެވެ. ރާއްޖެއަކީ ސިންގަޕޫރު ފަދަ ގައުމެއްގެ ގޮތުގައި ސިފަކޮށް، ލީ ކުއާން ޔޫ ފަދަ ލީޑަރުންގެ ނަން ބޭނުންކޮށްގެން ސަރުކާރަށް ޚުޝާމަދު ކުރަމުންދާ ދިއުމަށް އޭނާ ވަނީ ފާޑުވިދާޅުވެފައެވެ.
"މިފެންނަނީ ނާގާބީލު ވެރިން ލިބުނީމަ ގައުމުތައް އުޅޭ ޙާލު،" ޑރ. ޖަމީލް ވިދާޅުވިއެވެ. ޖަމީލް އިތުރަށް ވިދާޅުވީ ގައުމުގެ ޙަގީގަތް ހާމަކުރަން ޖެހޭ ކަމަށާއި، މިހާރު ފެންނަމުންދަނީ ގައުމު އިނދަޖެހިފައިވާ މަންޒަރު ކަމަށެވެ.
