އެމެރިކާއާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައާ ދެކޮޅަށް އަޑުއުފުލުމަށްޓަކައި، އިސްރާއީލުގެ ތެލްއަވީވްގައި ހުންނަ ހަބީމާ މައިދާނަށް ގިނަ އަދަދެއްގެ ބަޔަކު އެއްވެ މުޒާހަރާކޮށްފިއެވެ.
މިއަދު ހަވީރު ކުރިއަށްދިޔަ މި އެއްވުމުގައި ގާތްގަނޑަކަށް 200 އެއްހާ މީހުން ބައިވެރިވެފައިވެއެވެ. އަރަބި-އިސްރާއީލީ ނޫސްވެރިއެއް ކަމަށްވާ ޔަނާލް ޖަބާރީން ސޯޝަލް މީޑިއާގައި ހިއްސާކުރި ވީޑިއޯތަކުން ފެންނަ ގޮތުގައި، މުޒާހަރާގެ ބައިވެރިން ދިޔައީ ހަނގުރާމައާ ދެކޮޅަށް ވަރުގަދަ ޝިއާރުތަކުން އަޑުއުފުލަމުންނެވެ. އެގޮތުން "ސްކޫލް ކުދިންގެ ގަބުރުތަކުގެ މަތީގައި ޑިމޮކްރަސީއެއް ބިނާއެއް ނުކުރެވޭނެ" ކަމަށާއި، އިސްރާއީލުގެ ޕައިލެޓުން ބޮންއެޅުން ހުއްޓާލުމަށް ގޮވާލާފައިވެއެވެ.
މި މުޒާހަރާ ބާއްވާފައި މިވަނީ، ފާއިތުވި ހަފުތާތަކުގައި އިސްރާއީލުގައި ބޭއްވި މިފަދަ އެއްވުންތައް ފުލުހުން ބާރުގެ ބޭނުންކޮށްގެން ރޫޅާލައި، ބައެއް މީހުން ހައްޔަރުކޮށްފައިވާ ނުތަނަވަސް ދަނޑިވަޅެއްގައެވެ.
އިސްރާއީލް ޑިމޮކްރަސީ އިންސްޓިޓިއުޓުން މި މަހުގެ ކުރީކޮޅު ކުރިއަށް ގެންދިޔަ ސާވޭއަކުން ދައްކާ ގޮތުގައި، އެ ގައުމުގެ ޔަހޫދީ އާބާދީގެ 93 އިންސައްތަ މީހުން މި ހަނގުރާމައަށް ތާއީދުކުރެއެވެ. ނަމަވެސް، އަރަބި ދަރިކޮޅުގެ އިސްރާއީލީންގެ ތެރެއިން ހަނގުރާމައަށް ތާއީދުކުރަނީ އެންމެ 26 އިންސައްތަ މީހުންނެވެ. އެ ދަރިކޮޅުގެ 74 އިންސައްތަ މީހުން ތިބީ ހަނގުރާމައާ ދެކޮޅަށެވެ.
އިސްރާއީލުން ގާޒާއާއި ލުބުނާނުގައި ހިންގަމުންދާ ލާއިންސާނީ އަމަލުތަކުގެ ސަބަބުން ބައިނަލްއަގުވާމީ މުޖުތަމައުގެ ފާޑުކިޔުން އެ ގައުމަށް ވަނީ އަމާޒުވެފައެވެ.
