ވަޒީފާއާއި ފައިސާ ބެހިޔަސް ލާސްޓް ލައިން އޮފް ޑިފެންސް ފޫއަޅުވާލަން ޖާގަ ނުދޭނެކަން ސާފުކޮށް ރައްޔިތުން ބުނެފި ކަމަށް ކެންދޫ ދާއިރާގެ ކުރީގެ މަޖިލިސް މެމްބަރު އަދި ގާނޫނީ ވަކީލު އަލީ ހުސެއިން ވިދާޅުވެއްޖެއެވެ.
އަލީ މިފަދައިން ވިދާޅުވީ ނިމިދިޔަ ހޮނިހިރު ދުވަހު ބޭއްވި ތިން އިންތިހާބުންވެސް ސަރުކާރަށް ނާކާޟިޔާބުވެފައިވަނިކޮށް އެކްސްގައި ކުރެއްވި ޕޯސްޓެއްގައެވެ.
އަލީ ވިދާޅުވީ، ރައްޔިތުން ބަދަލުވެއްޖެ ކަމަށާ ވަޒީފާއާއި ފައިސާ ކިތަންމެވަރަކަށް ބެހިޔަސް ލާސްޓް ލައިން އޮފް ޑިފެންސް ފޫއަޅުވާލަން ޖާގަ ނުދޭނެކަން ސާފުކޮށް ރައްޔިތުން ސަރުކާރަށް ބުނެދީފި ކަމަށެވެ.
އަލީ މިފަދައިން ވިދާޅުވެފައިވަނީ ގާނޫނު އަސާސީއަށް އަނެއްކާވެސް އިސްލާހު ގެނެސް މައި ދެ އިންތިހާބު އެއްކޮށްލަން ސަރުކާރުން ކުރި މަސައްކަތް ނާކާމިޔާބުވެފައިވާ ދަނޑިވަޅެއްގައެވެ. އަދި މިއީ ސަރުކާރުން ޖަހާ ބެރަކަށް ރައްޔިތުން އަބަދު ނުނަށާނެކަމުގެ ހެއްކެއް ކަމަށާ ފައިސާއާ މާލިއްޔަތަށްޓަކައި ވޯޓު އެޅުން ރައްޔިތުން ނިމުމަކަށް ގެނެސްފައިވާ ކަމަށް ސިޔާސީ އެކި މީހުން ބުނަމުންދާކަން ވެސް ފާހަގަކޮށްލެވެއެވެ.
