ގައުމުގެ އިގްތިސޯދު ސަލާމަތްކޮށް ތަރައްގީގެ ރަގަޅު މިސްރާބަކަށް ގެންދެވޭނީ ޕީއެންއެފްގެ ރައީސް، ރައީސް އަބްދުﷲ ޔާމީނަށް ކަމަށް ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.
މަލީހު މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.
މަލީހު ވިދާޅުވެފައިވާ ގޮތުގައި، ދިވެހިރާއްޖޭގެ އިޤްތިސާދީ ހާލަތު މިހާރު އޮތް ނުތަނަވަސްކަމުން ބޭރުކޮށް، ގައުމު ހަމައަކަށް އެޅުވޭނެ ހަމައެކަނި ލީޑަރަކީ ރައީސް ޔާމީނެވެ.
އެގޮތުން ރާއްޖޭގެ އިޤްތިސާދަށް ކުރިމަތިވެފައިވާ އޮޅުންބޮޅުންތަކުން ސަލާމަތްވެ، ތަރައްޤީގެ ރަނގަޅު މިސްރާބަކަށް ޤައުމު ގެންދެވޭނެ ފަންވަރާއި ޤާބިލުކަން ހުރީ ހަމައެކަނި ރައީސް ޔާމީންކަން ފާހަގަކުރައްވާ މަލީހު ވިދާޅުވެފައިވަނީ، ޕީއެންއެފަކީ ރާއްޖޭގެ ސިޔާސީ މުސްތަޤްބަލް ކަމަށެވެ. އަދި ޕީއެންއެފް އަކީ ސިޔާސީ ގޮތުން އެންމެ ބޮޑު ހަމަޖެހުމެއް އޮތް ޕާޓީ ކަމަށާއި، އެއީ މިއަދު ދިވެހި ރައްޔިތުންގެ އޮތް ހަމައެކަނި އުންމީދު ކަމަށްވެސް އޭނާ ފާހަގަކުރެއްވިއެވެ.
މަލީހު މިފަދައިން ވިދާޅުވެފައިވާއިރު، ޕީއެންއެފުން މިހާރު ގެންދަނީ ސަރުކާރު ޒިންމާދާރުކުރުވާ ސަރުކާރުގެ ކަންކަން ހަމަމަގަށް އަޅުއްވަން ތަފާތު އެކި ގޮތް ގޮތުން މަސައްކަތްކުރަމުންނެވެ. އެގޮތުން ޖަލްސާތައް ބޭއްވުމުގެ އިތުރުން މަގުމަތީ ހަރަކާތްވެސް އެ ޕާޓީއިން ކުރިއަށް ގެންދެއެވެ.
