"އެމްއެންޑީއެފް އެއަރ ކޯރ" ގެ ނަމުގައި ސިފައިންގެ ވައިގެ ބާރު އިފްތިތާހުކޮށްފިއެވެ.

އެމްއެންޑީއެފުން ނެރުނު ބަޔާނެއްގައި ބުނެފައިވަނީ ދިވެހިރާއްޖޭގެ ސަރަޙައްދާއި، ދިވެހިރާއްޖޭގެ ޚާއްޞަ އިޤްތިޞާދީ ސަރަޙައްދާއި، ރައްޔިތުން ރައްކާތެރިކޮށް ޙިމާޔަތް ކުރުމަކީ ސިފައިންގެ ޚިދުމަތުގެ މައިގަނޑު މަޤްޞަދު ކަމުގައި ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 243 ވަނަ މާއްދާގެ (ހ) ގައި ކަނޑައަޅާފައިވާއިރު، ޤާނޫނު ނަންބަރު 1/2008 (ސިފައިންގެ ޤާނޫނު) ގެ 6 ވަނަ މާއްދާގެ (ހ) ގައި ސިފައިން ބެހިގެންވާ މައިގަނޑު ބައިތަކުގެ ތެރޭގައި ވައިގެ ސަލާމަތީ ކަންކަން ބަލަހައްޓާ ސިފައިންގެ ބާރު ހިމެނޭކަމަށް ކަނޑައަޅާފައިވާކަމަށެވެ.

އެހެންކަމުން ޤާނޫނުއަސާސީއާއި ސިފައިންގެ ޤާނޫނުގައި ކަނޑައަޅާ ބަޔާންކޮށްފައިވާ ފަދައިން ދިވެހި ސިފައިން ތަރުތީބުކޮށް، ދިވެހިރާއްޖޭގެ ކަނޑާއި ވައިގެ ސަރަޙައްދު ސަލާމަތްތެރިކަމާއެކު ބެލެހެއްޓުމުގައި އަމިއްލަ ޤާބިލްކަން ހުރި ބަޔަކަށް ދިވެހި ސިފައިން ހެދުމުގެ މަސައްކަތް ފެށުމަށް ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒު ނިންމަވާފައިވާކަމަށާއި މި ދާއިރާއިން ސިފައިންގެ ޤާބިލުކަން އިތުރުކޮށް ތަރައްޤީކުރުމަށްޓަކައި، ދިވެހިރާއްޖޭގެ ޤައުމީ ދިފާޢީ ބާރުގައި "އެމްއެންޑީއެފް އެއަރ ކޯރ" ގެ ނަމުގައި ސިފައިންގެ ވައިގެ ބާރު އުފައްދަވައި، ރައީސް ހުކުރު ދުވަހު އެ ބާރު އިފްތިތާޙް ކޮށްދެއްވާފައިވާކަމަށްވެސް އެ ބަޔާނުގައި ވަނީ ބުނެފައެވެ.

އެމްއެންޑީއެފުން ބުނިގޮތުގައި "އެމްއެންޑީއެފް އެއަރ ކޯރ" އުފެދުމާއެކު، ވައިގެ ސަލާމަތީ ކަންކަން ބަލަހައްޓާ ސިފައިންގެ ބާރުގެ ޚިދުމަތަށް އެންމެ ފުރަމަތަ ނެރެފައިވަނީ އަންމޭންޑް އޭރިއަލް ކޮމްބެޓް ވެހިކަލް (ޔޫއޭވީ) އެވެ.

ބަޔާނުގައި އިތުރަށް ބުނެފައިވަނީ ދިވެހިރާއްޖެއަކީ 99.7 އިންސައްތަ ކަނޑު އެކުލެވޭ ޤައުމަކަށްވެފައި، ދިވެހީންގެ ދިރިއުޅުމުގެ އެންމެހާ ކަންކަން ކަނޑާ ގުޅިފައިވާއިރު، ޤާނޫނުއަސާސީއާއި ޤާނޫނުތަކުގައި ކަނޑައަޅާ ބަޔާންކޮށްފައިވާ ދިވެހިރާއްޖޭގެ ސަރަޙައްދުތަކަކީ ދިވެހީން އިޤްތިޞާދީ ސިނާޢަތްތައް ތަރައްޤީކޮށް ކުރިއަރުވާ، އިޖުތިމާޢީ ޙަރަކާތްތައް ހިންގާ، މިނިވަންކަމާއެކު އެ މަސައްކަތްތަކުން ނަފާ ހޯދުމަށް އުޅެވޭނެފަދަ ސަލާމަތްތެރި ވެށްޓެއް ޤާއިމް ކުރެވިފައިވާ ތަނެއްގެ ގޮތުގައި ޤާއިމްކޮށް ދެމެހެއްޓުމުގައި ދިވެހިން އަމިއްލަ ފައި މައްޗަށް ތެދުވުމަށް ކުރާ މަސައްކަތުގައި މިއީ ދިވެހިރާއްޖެއަށް ޙާޞިލުކުރެވުނު މުހިންމު ލަނޑުދަނޑިއަކާއި ކާމިޔާބީއެއްކަމަށެވެ.

ދިވެހި ސިފައިންގެ ވައިގެ ޚިދުމަތް ޤާއިމްކުރެވުމުން، ދިވެހިރާއްޖޭގެ ކަނޑުގެ ސަރަޙައްދުތަކުގައި ހިނގާ ޙާދިސާތަކުގައި ދިވެހި ދައުލަތުން އަދާކުރުމަށް ލާޒިމުކުރާ ޒިންމާތަކާއި މަސްއޫލިއްޔަތުތައް މިހާރަށްވުރެ ފުރިހަމައަށް އަދާކުރުމަށް މަގުފަހިވެ، އިންޑިއާ ކަނޑުގެ ސަލާމަތާއި ރައްކާތެރިކަން ކަށަވަރުކުރުމަށް އިންޑިއާ ކަނޑުގެ ޤައުމުތަކާއި، އިންޑިއާ ކަނޑުގައި ޙަރަކާތްތެރިވާ އެހެން ޤައުމުތަކާ ގުޅިގެން ކުރާ މަސައްކަތުގައި ދިވެހިރާއްޖެއަށް މިހާރަށްވުރެ މާނަވީ ދައުރެއް އަދާކުރުމަށްވެސް މަގުފަހިވެގެންދާނެކަމަށް އެމްއެންޑީއެފުން ވަނީ ހާމަކޮށްފައެވެ.