ލާމަރުކާޒީ ނިޒާމު އެއްފަރާތްކޮށް، ހުރިހާ ބާރުތަކެއް މަރުކަޒީ ސަރުކާރަށް ޖަމާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވަމުން ގެންދަވާ މަސައްކަތްތައް ހުއްޓާލުމަށް ޕީޕަލްސް ނޭޝަނަލް ފްރަންޓް (ޕީއެންއެފް) ގެ ސެކްރެޓަރީ ޖެނެރަލް މުޙައްމަދު މަލީހް ޖަމާލް ގޮވާލައްވައިފިއެވެ.
މަލީހް މިފަދައިން ގޮވާލެއްވީ ސަރުކާރުން ރާއްޖޭގެ އެކި ސަރަހައްދުތައް ބެލެހެއްޓުމަށްޓަކައި "އެޑްމިނިސްޓްރޭޓިވް ރީޖަން" ތަކެއް ކަނޑައަޅައި، އެ ތަންތަން ހިންގުމަށް ވަކި އޮފީސްތަކެއް އުފެއްދުމާ ގުޅިގެން އެކަމަށް ފާޑުވިދާޅުވެ އެކްސްގައި ކުރެއްވި ޕޯސްޓެއްގައެވެ.
މަލީހްގެ ޕޯސްޓުގައި ވިދާޅުވެފައިވަނީ، ލާމަރުކާޒީ ނިޒާމު ފުނޑާލައި، ހުރިހާ ބާރުތަކެއް މުށްތެރެއަށް ނެގުމަށް ރައީސް މުޢިއްޒު ކުރައްވާ މަސައްކަތްތަކަކީ ރައްޔިތުން ބަލައިގަންނާނެ ކަމެއް ނޫން ކަމަށެވެ. އަދި ރައްޔިތުން އެމަނިކުފާނު އިންތިޚާބު ކުރީ މިފަދަ ގޮތަކަށް އަމަލުކުރުމަށް ނޫން ކަމަށާއި ނިމިދިޔަ އިންތިޚާބު ހަނދާންކޮށްދެއްވަމުން، ރައްޔިތުންގެ ނިންމުމާ ދެކޮޅަށް މިހާ އަވަހަށް މަސައްކަތް ކުރައްވަނީތޯ މަލީހް ސުވާލު އުފައްދަވާފައިވެއެވެ.
މީގެ އިތުރުން، މަލީހް ވިދާޅުވީ ލާމަރުކާޒީ ނިޒާމަކީ ދިވެހިރާއްޖޭގެ އިދާރީ ހިންގުމުގެ މައިބަދަ ކަމަށާއި، އެ ނިޒާމަށް ބުރޫއަރާ ފަދަ އެއްވެސް ކަމެއް ސަރުކާރުން ކޮށްގެން ނުވާނެ ކަމަށެވެ. އަދި މަރުކަޒީ ނިޒާމަކަށް ގައުމު ރުޖޫޢަކުރުމަށް ކުރާ މަސައްކަތަކީ ފަހަތަށް އެޅޭ ފިޔަވަޅެއްގެ ގޮތުގައި އޭނާ ސިފަކުރެއްވިއެވެ.
ސަރުކާރުން "ސަރަހައްދީ އިދާރާ" ތަކެއް ކަނޑައަޅައި، އެ ސަރަހައްދުތަކަށް ރައީސުލްޖުމްހޫރިއްޔާގެ އޮފީސްތަކެއް ގާއިމުކުރުމަށް ނިންމި ނިންމުމަކީ ކައުންސިލްތަކުގެ ބާރު ކަނޑުވާލުމަށް ކުރާ ކަމެއް ކަމަށް އިދިކޮޅު ފަރާތްތަކުން އަންނަނީ ބުނަމުންނެވެ. އައު ސަރުކާރުގެ މި ނިންމުމާ ގުޅިގެން ސިޔާސީ މަސްރަހުގައި ބޮޑެތި ފާޑުކިޔުންތަކެއް ވަނީ އަމާޒުވެފައެވެ.
