މޯލްޑިވިއަންއިން އެތެރޭގެ ހުރިހާ ރޫޓެއްގައި ޕްރޮމޯޝަނަލް އަގުތައް ތައާރަފް ކޮށްފިކަމަށް ކަމަށް ބުނެ ގިނަ ބަޔަކު އެކަމުގެ އުފާ ފާޅުކުރިއެވެ. ސަރުކާރު ޕްރޮމޯޓުކުރަން ތިބޭ ކުދިންކޮޅު ނިކަން ބާރަށް މިވާހަކަ ދެއްކިއެވެ. އެކި ގޮތް ގޮތުން މިއީ ލިބުނު ކާމިޔާބީއެއްގެ ގޮތުގައި ދައްކަމުން ދިޔައެވެ.

އާދޭހެވެ. ރައީސް އަބްދުﷲ ޔާމީން ވިދާޅުވާ ފަދައިން ރައްޔިތުންނަށް ފައިދާ ހުރި ކަންކަން ވާނަމަ އެކަމާ އުފާ ކުރުން ހައްގެވެ. ނަމަވެސް ސުވާލަކީ އަގު ހެޔޮކުރި ކަމަށް އެ ބުނާ ބުނުން އޮތީ ކިހިނެތް ތޯ ކަމެވެ.

އެގޮތުން ޓިކެޓުގެ އަގު ހެޔޮވީ ކިހިނެއްތޯ ބަލާއިރު އެއީ ވަކި ފްލައިޓުތަކަކުން ދަތުރުކުރާ ނަމަ ލިބޭ އަގެކެވެ. އެހެންކަމުން މިއޮތީ ބޮޑު އޮޅުވަލުމެއް ނޫންތޯއެވެ؟ ދަންވަރު ފްލައިޓަށާ ހަވީރު ފްލައިޓުތަކަށް ޚާއްސަކުރެވިފައި އެ ބުނާ "ހެޔޮ އަގު" ލިބެނީ ވެސް އޮންލައިންކޮށް ޓިކެޓު ނަގާ ފަރާތްތަކަށެވެ. އެހެންކަމުން އޮންލައިން ބުކިން ހަދާ އޮންލައިން ޕޭމަންޓުތ ހަދަން އަހުލުވެރި ނޫން ފަރާތްތަކަށް އެ ބުނާ "ހެޔޮ އަގު" ނުލިބޭނެއެވެ.

މީގައި ދެން އޮތް އަނެއްކަމަކީ ހަވީރުން ފްލައިންޓުން ނުވަތަ ދަންވަރު ފްލައިޓުން ޓިކެޓުގެ އަގު ހެޔޮކޮށް ދަތުރުކުރެވޭއިރު އެއާޕޯޓު އޮންނަ ރަށް ނޫން އެހެން ރަށްތަކަށް ދަތުރު ކުރާ ފަރާތްތަކަށް ޖެހޭ ތަކްލީފެވެ.

އެގޮތުން ނ. މާފަރަށް ދަންވަރު ފްލައިޓުން ދަތުރުކުރާ މީހާއަކީ ނ. މާޅެންދޫއަށް ނުވަތަ އެހެން ރަށަކަށް ދަތުރުކުރާ މީހެއް ނަމަ އެމީހަކު އަނެއްކާވެސް ޖެހޭނީ އުޅަނދަކަށް ފައިސާ ދައްކައިގެން ދަތުރުކުރަން ކަމުގައިވާއިރު އެ ދަތުރުތަކުގެ ފީ އެ ގަޑިތަކުގައި ބޮޑުވުމަކީ އެއްކަލަ "އަގު ހެޔޮ" ވީ ކަމަށް މެޑަލް ޖަހަމުން ސަރުކާރުގެ ވެރިން ގެންދާ ތަންކޮޅު ދަމައިގަންނާނެ ކަމެކެވެ. ޚާއްސަކޮށް ދަންވަރު ފްލައިޓޫން ދަތުރުކޮށްފައި ދާ މިހާ އެއާޕޯޓު އޮންނަ ރަށް ނޫން އެހެން ރަށަކަށް ދަތުރުކުރާ ނަމަ އެމީހަކަށް އޮތީ ދެގޮތެކެވެ. އެއީ ޖެހިގެން އަންނަ ދުވަހު ލޯންޗުން ހެޔޮ އަގުގައި ދިއުމަށް، އެރޭ އެއާޕޯޓު އޮންނަ ރަށެއްގައި މަޑު ކުރުން ނުވަތަ ލޯންޗަށް ބޮޑު އަގު ދީފައި އެރޭ ރަށަށް ދިއުމެވެ.

އެހެންކަމުން މިކިޔާ އަގު ހެޔޮކުރުން ގަނޑު މިދަނީ އަމާ ބުނީތީ ފަރަށް ދާ އުސޫލުންތާއެވެ؟ ރައީސް މުއިއްޒުއެވެ. އަޅެ ފަހެ މަނިކުފާނު އެންމެ ވައުދެއްވެސް މަކަރާ ހީލަތާ އޮޅުވާލުމެއް ނެތި ފުއްދަވާނީ ކޮން އިރަކުންތޯއެވެ؟

ރައްޔިތުންނަށް ފައިދާ ހުރި ކަންކަން ކުރައްވާއިރު ނިކަން ހަލާ ދަނޑީގެ ދެކޮޅު ބެއްލެވިއްޔާ ވަނީ އަޅެ ކިޔެއްތޯއެވެ؟ ކަލާސީންނަށް ނައު ބައު ނުވިނަމަވެސް ނިކަމެތި ރައްޔިތުންނަށް ދަންވަރު ލޯންޗު ދަތުރުކުރުމަކީ ހަމަ ޖީބަށް އނެގުންވެގެން ދާ ކަމެއް ވިއްޔާއެވެ.

ފަތިހު ފްލައިޓަށް ހެޔޮކުރި ބައި، ފަތިހު ކުރަންޖެހޭ ލޯންޗް ދަތުރަށް އިތުރުވުމަކީ ހެޔޮ ބަދަލެއް ކަމަށް ނިންމާނީ ކޮން ހަމަޔަކުން ތޯއެވެ؟