އިސްރާއީލްގެ ނިރުބަވެރި ހަމަލާތަކުގެ ސަބަބުން ހާލުގައި ޖެހިފައިވާ ޣައްޒާގެ ރައްޔިތުންނަށް އިންސާނީ އެހީގެ ގޮތުގައި ކަނޑުމަގުން ގެނައި ފުރަތަމަ ޝިޕްމެންޓް ޣައްޒާއަށް ބާލައިފިއެވެ.

އެމެރިކާގެ ޗެރިޓީއަކުން ހޮނިހިރު ދުވަހު ބުނީ ހަނގުރާމައިގެ ސަބަބުން ހާލުގައި ޖެހިފައިވާ ޣައްޒާގައި ހަރަކާތްތެރިވާ އެ ޓީމުން، ‎‎ކަނޑުގެ އެހީގެ ފުރަތަމަ ޝިޕްމަންޓް އަންލޯޑްކޮށް ނިންމާފައިވާ ކަމަށެވެ.‎

‎ހުރިހާ މުދަލެއް އަންލޯޑްކޮށް ޣައްޒާގައި ބެހުމަށް ތައްޔާރުވަމުން އަންނަ ‎‎ކަމަށާއި އެ އެހީއަކީ ގާތްގަނޑަކަށް 200 ޓަނުގެ ކާބޯތަކެތި ކަމަށް ވޯލްޑް ސެންޓްރަލް ކިޗަން އިން ނެރުނު ބަޔާނެއްގައި ބުނެފައިވެއެވެ.

‎އިރުމަތީ މެޑިޓެރޭނިއަން ހުރަސްކޮށް ކަނޑުމަތީގެ އެހީގެ އާ މަގެއް ފެށުމުގެ ގޮތުން ސައިޕްރަސް އިން ދަތުރުކުރުމަށް 240 ޓަނުގެ ‎‎ކާބޯތަކެތީގެ ދެވަނަ ބޯޓެއްވެސް ހުސްކުރުމަށް އެ ޖަމާއަތުން ދަނީ ތައްޔާރު ކުރަމުންކަންވެސް ވަނީ ހާމަކޮށްފައެވެ.

‎އިންސާނީ އެހީތެރިކަން ފޯރުކޮށްދިނުމުގެ މި މަސައްކަތަކީ ޣައްޒާއަށް އދ.ގެ ފަރާތުންނާއި އެހީތެރިކަން ފޯރުކޮށްދޭ އެހެނިހެން ފަރާތްތަކުގެ ‎‎ފަރާތުން ޣައްޒާއަށް ކުރިމަތިވެފައިވާ ކާބޯތަކެތީގެ ދަތިކަން ކުޑަކުރުމުގެ ގޮތުން ކުރަމުންދާ މަސައްކަތެކެވެ.‎

‎ޝިޕްމަންޓުގެ ތެރޭގައި ބީންސް، ކެރެޓް، ކޭންޑް ޓޫނާ، ޗޮކްލާ، ކޭންޑް ކޯން، ޕާބޮއިލްޑް ރައިސް، ފުށް، ތެޔޮ އަދި ލޮނު ފަދަ ބަލްކް ‎‎ޕްރޮޑަކްޓްތަކުގެ ޕެލެޓްތައް ހިމެނެއެވެ.

‎މީގެ އިތުރުން ދެވަނަ ޝިޕްމަންޓުގައި ޑެލިވަރީކުރުމުގައި އެހީތެރިވުމަށް ފޯކްލިފްޓަކާއި ކެރޭނެއް ވެސް ހިމެނޭނެ ކަމަށް އެ ކުންފުނިން ބުންޏެވެ.‎

‎ހިއުމެނިޓޭރިއަން ގްރޫޕުން ބުނީ އެމީހުންގެ ދެވަނަ ބޯޓާއި ފަޅުވެރިންގެ އުޅަނދަށް ފުރޭނެ ދުވަހެއް އަދި ނޭންގޭ ކަމަށެވެ.‎

‎ސްޕެއިންގެ ޗެރިޓީ އެއް ކަމަށްވާ އޯޕަން އާމްސް އިން އޮޕަރޭޓްކުރާ ފުރަތަމަ އުޅަނދު އައިސްފައިވާކަން އިސްރާއީލުގެ އަސްކަރިއްޔާއިން ‎‎ހުކުރު ދުވަހު ކަށަވަރުކޮށްދީފައިވާއިރު، އެ ސަރަހައްދު ރައްކާތެރިކޮށް ސެކިއުރިޓީ އިންސްޕެކްޝަނެއް ހެދުމަށް ސިފައިން ‎‎ހަރަކާތްތެރިވަމުންދާ ކަމަށް އިޒްރޭލުގެ އަސްކަރިއްޔާއިން ބުނެއެވެ.‎

‎މި އެހީ ފޯރުކޮށްދިނުމަށް ވޯލްޑް ސެންޓްރަލް ކިޗަން އަށް ޖެހުނީ ޣައްޒާ ސިޓީގެ ހުޅަނގު ދެކުނުން ޖެޓީއެއް އެޅުމަށެވެ.‎