މުސްލިމުންނާ ދެކޮޅަށް ދޭ ހަމަލާތައް ހުއްޓުވަން ބައިނަލްއަގުވާމީ މުޖްތަމައުތައް ގުޅިގެން މަސައްކަތް ކުރަން ދިވެހިރާއްޖެއިން ގޮވާލައިފިއެވެ.
ބައިނަލްއަގުވާމީ ގޮތުން ފާހަގަކުރާ އިސްލާމްފޯބިއާއާ ދެކޮޅަށް މަސައްކަތް ކުރުމުގެ ދުވަހާ ގުޅިގެން އދ. މަޖިލީހުގައި ރާއްޖެ ތަމްސީލުކުރައްވަމުން މިފަދައިން ގޮވާލީ، އދ ގެ މަޖިލީހުގައި ބޭއްވި މަތީ ފަންތީގެ ބައްދަލުވުމުގައެވެ.
ރާއްޖެއިން ވަނީ، އިސްލާމްދީނާ ދެކޮޅު އަމަލުތައް ބަލައި ނުގަންނަ އަދި އިސްލާމުންނާ ދެކޮޅަށް މަސައްކަތް ނުކުރާ މުޖްތަމައުއެއް ބިނާ ކުރުމަށް ގޮވާލާފައެވެ.
މީގެ އިތުރުން ރޯދަ މަހުގައި ވެސް އިޒްރޭލުން ފަލަސްތީނުގެ މުސްލިމުންނާ ދެކޮޅަށް ދެމުންދާ ހަމަލާތައް ވެސް ރާއްޖެއިން ކުށްވެރިކޮށްފައި ވެއެވެ.
ރާއްޖޭގެ ފޮރިން މިނިސްޓަރު މޫސާ ޒަމީރު ވިދާޅުވީ މުސްލިމުންނަށާއި މުސްލިމް މުޖުތަމައުތަކަށް އަމާޒު ކޮށް ދޭ ހަމަލާތައް ހުއްޓާލަން ބައިނަލްއަގުވާމީ ކޮމިއުނިޓީ ގުޅިގެން މަސައްކަތް ކުރަން ރާއްޖެއިން ގޮވާލާފައިވާ ކަމަށެވެ.
އިސްލާމްފޯބިއާއާ ދެކޮޅަށް އަޅަންޖެހޭ ފިޔަވަޅުތަކާ ބެހޭ ގަރާރު ވެސް އެ ބައްދަލުވުމުގައި ރާއްޖެއިން ވަނީ ކޯ ސްޕޮންސާ ކޮށްފަ އެވެ. އެ ގަރާރާ އެއްކޮޅަށް 115 ގައުމަކުން ވޯޓުދިނެވެ.
