ހުކުރު ދުވަހުގެ ރެއަކީ ދިވެހިންނަށް ފަޚްރުވެރި ރެއަކަށްވިއެވެ. ރައީސް އަބްދުﷲ ޔާމީން ބޭނުންފުޅުވާ ގޮތަށް ދިވެހިންގެ ކަނޑުގެ ސަރަހައްދު ބަލަހައްޓަން ދިވެހިން ނުކުތީއެވެ. އާދެ ރާއްޖޭގެ މަސް ކަނޑުތަކަށް ޒަމާނުއްސުރެ އަވައްޓެރި ގައުމުތަކުން ފޯރުވަމުން އައި ނުފޫޒުން ސަލާމަތްކުރަން ދިވެހި އަސްކަރިއްޔާއިން ނުކުތީއެވެ.

ތުރުކީ ވިލާތުގެ ބޭކަރު ކުންފުނިން އުފައްދާ ބޭރަކްތާރު ޓީބީ-2 މަރުކާގެ އަސްކަރީ 6 ޑްރޯންއާ އެކު ރާއްޖޭގެ އެއާ ވިންގްއިން ރާއްޖޭގެ މަސް ކަނޑުތައް ބަލަހައްޓަން ފެށުން އިފްތިތާހުކޮށް ހުކުރު ދުވަހުގެ ރޭ ދައްކާލި މަންޒަރަކީ ދިވެހިންނަށް ވާނެ ކަމެވެ.

އެންމެ ދެ މަސް ތެރޭ ޑްރާނޯތަކެއް ދުއްވަން ތަމްރީނުވެ ދިވެހި އަސްކަރިއްޔާ ދިވެހި މަސް ކަނޑުތައް މޮނިޓަރ ކުރަން ހަވާލުވިއިރު އަވައްޓެރި ގައުމަކުން ދީފައިވާ ހެލިކޮޕްތަރަކާ ޑޯނިޔާ މަތިންދާ ބޯޓެއް ދުއްވަން ދިވެހިން ތަމްރީނު ނުކުރެވި އެތައް އަހަރެެއް މި ފާއިތުވަނީ ކީއްވެ ތޯ މިއި ހިތުގައި އުފެދުނު ސުވާލެކެވެ.

2008 ވަނަ އަހަރުން ފެށިގެން ހެލިކޮޕްޓަރަކާ ޑޯނިޔާއެއް ބަލަަހައްޓަން ނަމުގައި އިންޑިއާ އަސްކަރިއްޔާ މި ގައުމަށް ގެނެސް މުޅި ގައުމުގައި އެމީހުންގެ ހަން ފަތުރަން ޖާގަ ދިގެން އަދި ވަކިން ޚާއްސަކޮށް ނިމި ދިޔަ ފަސް އަހަރު ދިވެހިންގެ މިނިވަންކަމާ ސިޔާދަތާ ދީންވެސް ނީލަން ކިޔައިގެން އެމީހުން ރުއްސުމަށް މަސައްކަތްކުރިއިރު އޭރު އިންޑިއާ އައުޓު ގޮވި ބޭފުޅުން ތިއްބެވި ސަރުކާރުން މިކަން ހަމަ މަގަށް އަޅުވަން މަސައްކަތް ނުކުރަނީ ކީއްވެތޯ ހިތުގައި ރިހުމަކާ އެކު ސުވާލުތައް ފުނި ޖެހެއެވެ.

އިންޑިއާ ސިފައިން މި ގައުމުން ބާލާނެ ކަމުގެ ވައުދާ އެކު ފުރަތަމަ 100 ދުވަހުގެ މަގު ޗާޓެއްް ނެރުނުއިރު އިންޑިއާ ސިފައިން ބޭލުމުގެ ނަމުގައި ހަމައެކަނި އެމީހުންގެ ޔުނިފޯމު ބޭލުމަކީ އެއީ ވައުދު ފުއްދުން ކަމުގައި ނުވާނެއެވެ.

އިންޑިއާ ސިފައިންގެ ފުރަތަމަ ބެޗު ފައިބައިފި ކަމަށް ވިދާޅުވެ ސަރުކާރުގެ އިސް ބޭފުޅުންނާ އަދި ސަރުކާރުގެ ދިފާއުގައި ޓްވީޓުކުރައްވާ ކުދިން ވެސް ފަޚްރުވެރިކަމާ އެކު ލިޔަމުން ގެންދާއިރު ހަގިގަތަކީ ކުލަ ހެދުމުގައި ތިއްބަސް އެތިބެނީ އިންޑިއާގެ އަސްކަރިއްޔާގެ ތެރެއިން ތަމްރީނުވެގެން އައިސް ތިބި ސިވިލް މީހުންކަމެވެ.

އެހެންކަމުން އިންޑިއާ ސިފައިން ބާލަނީ ކަމަށް ބުނެ ދޮގު ކަބަރު ފަތުރަމުންދާއިރު އިންޑިއާ އިން ގެނައި އެއްޗެއް ވީމާ އިންޑިއާގެ ބަޔަކު ނޫނި އަތްލުން މަނަލީ ތޯ މިއި އުފެދޭ ސުވާލެކެވެ.

ގައިމު ޑްރޯންތައްވެސް ގެނައީ އިންޑިއާއަށް ވުރެ އެތައް ގުނަ ނިއުކްލިއަރ ގޮތުން ގާބިލު ގައުމަކަށްވާއިރު އެމީހުންވެސް ޑްރޯންތަކާ އެކު އައިސް މިތާ ބަޑަހަ ޖަހަން ނޫޅޭ އިރު އިންޑިއާއިން ހަމަ ހިލާ ހެލިކޮޕްޓަރުންނާ ޑޯނިޔާއިން އަތް ވިއްލާ ރާއްޖެ ދޫކޮށް ދިއުމަށް އެއްބަސްނުވެގެން މިއުޅެނީ ހަމަ އެހާ ދިވެހިން ނާގާބިލްއީ ހެއްޔެވެ.

ރައީސް މުއިއްޒުއެވެ. ދިވެހިންގެ ގާބިލުކަން ޔަގީނުންވެސް ތިޔަ ޑްރޯންތައް ދުއްވަން ތަމްރީނުވީ ބޭފުޅުންނާ އެކު ސާބިތުވެގެން ދިޔައިރު، އިންޑިއާ އިން ހަދިޔާކޮށްފައި އޮތް ކަމަށް ބުނާ ހެލިކޮޕްޓަރާ ޑޯނިޔާ ދުއްވަން ދަސްކުރާން ހާ ގާބިލުކަން ދިވެހިންގެ ގައިގައި ނުހުރެ ނުދާނެކަން ޔަގީންކުރެވޭއިރު އެ ތަމްރީނުތައް ހައްދާ ދިވެހި ސިފައިންނާ އެ އުޅަނދުތައް ހަވާލުނުކުރައްވަނީ ކީއްވެތޯއެވެ؟

މެޑިކަލް އިވެލުއެންސްއަށް ސީ އެމްބިއުލެންސަކާ ޑޯނިޔާއެއް އޮޕަރޭޓުކުރާ ކަމަށް ވިދާޅުވާއިރު އެ އުޅަނދުތައް ވެސް އޮޕަރޭޓުކުރަނީ ހަމަ ދިވެހި ބިމަށް އުފަން ދިވެހި ދަރިންނެވެ.

އެ ހުރިހާ ކަމެއްގެ ގާބިލުކަން ދިވެހިންނަށް ލިބިގެންވާއިރު އިންޑިއާއިން ހަދިޔާކުރި ހެލިކޮޕްޓަރަކާ އަދި ޑޯނިޔާއެއްގެ ކޮންޓްރޯލު ދިވެހިންނަށް ނުނެގިގެން މިއުޅެނީ ކިއްވެތޯއެވެ؟

ދިވެހިންގެ ކަންކަން ނިންމަން ދިވެހިންނާ ހަވާލުކުރައްވާށެވެ. ބޭރުގެ އަސްކަރިއްޔާއެއް ހެލިކޮޕްޓަރުތަކަކާއި މަތިންދާބޯޓު ބެލެހެއްޓުމަށް މަދަނީ ހެދުމުގެ ބަޔަކު ބައި ތިއްބަންޖެހެނީ ކޮން މަޖުބޫރުކަމެއް އޮވެގެންތޯ މިއީ އުފެދޭ ސުވާލެކެވެ.

ކޮންމެ ވެސް ބޭފުޅަކު ނިކަން ރައީސް އާ މި ސުވާލުކުރައްވަބައްލަވާށެވެ. އަހާ ފޯރަމްގެ ތެރެއިން ނަމަހީ ވެސްއެވެ.