ކުރީގެ ތިން ރައީސުން ކަމަށްވާ، ރައީސް އަބްދުﷲ ޔާމީން، ރައީސް މުހައްމަދު ނަޝީދު އަދި ރައީސް އިބްރާހިމު މުހައްމަދު ސޯލިހު ގުޅިގެން ނޫސްވެރިންނާ އަދި ޚިޔާލުފާޅުކުރުމުގެ ހައްގު އަނބުރާ އިޔާދަ ކުރަން ކުރާ މަސައްކަތުގެ ތެރެއިން އެކުލަވާލި މަންދޫބުންގެ ކޮމިޓިގެ ފުރަތަމަ ބައްދަލުވުން ކާމިޔާބުކަމާ އެކު ބާއްވައިފިއެވެ.
މަންހައްޓަން ބިޒްސް ހޮޓެލުގައި ކުރިއަށް ދިޔަ އެ ބައްދަލުވުމަށް ފަހު މަންދޫބުންގެ ޓީމުން ވަނީ ކުރު ބްރީފިންއެއް ދީފައެވެ. އެގޮތުން ހޯމަ ދުވަހު އެ ކޮމިޓީގައި ކުރިއަށް ދިޔަ މަޝްްވަރާތަކަށް ފަހު ގައުމު މިހާރު ދާ މިސްރާބު ރަނގަޅު ކުރުމަށް އިދިކޮޅު ފަރާތްތައް އެއްކޮށް ވަރަށް ރަނގަޅު މަސައްކަތްތަކެއް ކުރެވޭނެ ކަމުގެ އުންމީދު ވަރަށް ބޮޑު ކަމަށް، ރައީސް ނަޝީދު ޔަމްސީލު ކުރައްވާ އެއް މެމްބަރު، ފައްޔާޒު އިސްމާއިލް ވިދާޅުވެފައިވެއެވެ.
ބައްދަލުވުމުގައި ދެން ކުރިއަށްދާނެ ގޮތްތަކާ ބެހޭ ގޮތުން މަޝްވަރާތަކެއް ކުރެވުނު ކަމަށާ، ގުޅިގެން ހަރަކާތްތައް ބާއްވާާނެ ގޮތުގެ ތަފްސީލު ދުވަހުން ދުވަހަށް މީޑިއާތަކަށް ދެވޭނެ އިންތިޒާމު ވަރަށް އަވަހަށް ހަމަޖައްސާނެ ކަމަށް ވެސް އޭނާ ވިދާޅުވިއެވެ.
މި ހަފްތާގެ ތެރޭގައި ނޫސްވެރިންގެ ބައްދަލުވުމެއް ބޭއްވުމަށް ވެސް ހަމަޖެހިފައި ވާާ ކަމަށް އެ ކޮމިޓީއިން ހާމަކޮށްފައިވެއެވެ.
