ރައްޔިތުންނާ ސިއްރުން މި ސަރުކާރުން އިންޑިއާއާއެކު ޑީލް ހަދަމުންދާ ކަމަށް ރައީސް އަބްދުﷲ ޔާމީންގެ އިސް ވަކީލް ޑރ. މުހައްމަދު ޖަމީލް އަހްމަދު ވިދާޅުވެއްޖެއެވެ.

ދަރަންޏަށް ލުޔެއް ހޯދަން ރައީސް މުއިއްޒު، އިންޑިއާގެ ކިބައިން އެދިވަޑައިގަތް ކަން ހާމަކޮށް އެ ގައުމުގެ ނޫހެއްގައި ލިޔެފައިވާ ހަބަރެއް ހިއްސާކޮށް ކުރައްވާ އެކްސްގައި ކުރެއްވި ޕޯސްޓެއްގައި ޑރ. ޖަމީލު ވަނީ، މި ޖެހުނީ ކޮންތާކުތޯ ސުވާލު ކުރައްވާ އިންޑިއާގެ ބޮޑުވަޒީރަށާއި އިންޑިއާ ރައްޔިތުންނަށް ފުރައްސާރަކޮށް މި ސަރުކާރުގެ ވަޒީރުން ފާޅުގައި ހިންގި ހުތުރު އަމަލަށް ފަހު އިންޑިއާގެ ފައިބުޑަށް ވެއްޓި ރައީސް މުއިއްޒު މިއަދު އާދޭސް ކުރަމުންދާ ކަމަށް ވިދާޅުވެފައެވެ.

ރައީސް މުއިއްޒުގެ އެ އަމަލުފުޅު، ޑރ. ޖަމީލު ސިފަކުރައްވާފައިވަނީ، ރައްޔިތުންނަށް ސިއްރުން އިންޑިއާއި އެކު ޑީލެއް ހެދުމުގެ ގޮތުގައެވެ.

ދަރަންޏަށް ލުޔެއް ހޯދަން ރައީސް މުއިއްޒު، އިންޑިއާގެ ކިބައިން އެދިވަޑައިގަތް ކަން ހާމަކޮށް އެ ގައުމުގެ ނޫހެއްގައި ލިޔެފައިވަނީ، އިންޑިއާގެ ނޫސްތަކުގައި އެ ވާހަކަތައް ލިޔެފައި ވަނީ ދިވެހި ނޫހަކަށް ރައީސް މުއިއްޒު ދެއްވާފައިވާ ބަސްދީގަތުމެއް ގައި އެ މޭރުމުން ވާހަކަފުޅު ދައްކަވާފައިވާ ވަނިކޮށެވެ.

އިންޑިއާއާ ވަރަށް ދުރު ސިޔާސަތެއް ގެންގުޅޭ ކަމަށް އެ ގައުމާއި ވާދަވެރީން ވެސް ދެކޭ ރައީސް މުއިއްޒު ވަނީ ދަރަނި ދެއްކުމުގައި އިންޑިއާ އިން ލުއި ގޮތްތަކަކަށް އެދިވަޑައިގަންނަވާ ކަމަށް ވިދާޅުވެފައެވެ. ރައީސް ސޯލިހްގެ ސަރުކާރުން ނަގާފައިވާ ބޮޑެތި ލޯނުތައް ދެއްކުމުގައި ފަސޭހަ ގޮތްތަކެއް އެ ގައުމުން ހަމަޖައްސައިދޭނެ ކަމަށް ޔަގީން ކުރައްވާ ކަމަށް ވެސް ރައީސް މުއިއްޒު ވިދާޅުވިއެވެ.

މީގެ އިތުރުން އިންޑިއާ އަކީ ދިވެހީންގެ އެންމެ ގާތް އެކުވެރިޔާ ކަމަށާ އެކަން ބަދަލުނުވާނެ ކަމަށާ އަދި ދެ ގައުމުގެ ގުޅުން ހީނަރުވާފަދަ އެއްވެސް ވާހަކަފުޅެއް އެމަނިކުފާނު ވެސް އަދި ސަރުކާރުން ވެސް ދައްކާފައި ނުވާނެ ކަމަށް ރައީސް މުއިއްޒު ވިދާޅުވެފައިވެއެވެ.