ރައްޔިތުންގެ މަޖިލީހުގެ ބިލެތްދޫ ދާއިރާގެ މެމްބަރު އަޙުމަދު ޙަލީމަށް ފ. ފީއަލީ ޕީއެންސީ މެމްބަރުން ހުރަސްއަޅައިފިއެވެ.
މިކަން ހިނގާފައިވަނީ 20 ވަނަ ރައްޔިތުންގެ މަޖިލިސް އިންތިޚާބާ ދިމާކޮށް މެމްބަރު ހަލީމް ކެމްޕެއިން ކުރެއްވުމަށް ހޮނިހިރު ދުވަހު ފީއައްޔަށް ވަޑައިގަތުމުންނެވެ.
ނަން ހާމަނުކުރުމަށް އެދި ޗެނަލް 13 އަށް މައުލޫމާތު ދިން ފަރާތުން ބުނީ، މެމްބަރު ހަލީމަށް ހުރަސްއަޅާފައިވާ ފަރާތްތަކުގެ ތެރޭގައި މި ސަރުކާރުން ފީއަލީ ޞިއްޙީ މަރުކަޒުގެ ސީނިއަރ އެޑްމިނިސްޓްރޭޓަރ ހެލްތު ސަރވިސްގެ މަގާމަށް ހަމަޖައްސާފައިވާ މުޙައްމަދު ޝިފާއު އާއި ފީއަލީ ޒުވާނުންގެ މަރުކަޒު ހިންގުމަށް ހަމަޖައްސާފައިވާ މުޙައްމަދު ޢާމިރުވެސް ހިމެނޭކަމަށެވެ.
ހުރަސްއެޅުމުގައި އިސްކޮށް ހަރަކާތްތެރިވެ އެ ފަރާތްތަކުން ވަނީ ކެމްޕެއިން ހަރަކާތްވެސް ކުރިޔަށް ގެންދިޔުމަށް ފުރުސަތު ނުދީފައެވެ.
ނަމަވެސް ފުލުހުން ވަނީ ފަހުުން ޕީއެންސީގެ ސަޕޯޓަރުން ހުއްޓުވާފައެވެ.
މެމްބަރު ހަލީމްގެ ކެމްޕެއިންގައި އިސްކޮށް އުޅުއްވާ ފަރާތެއް ބުނީ ސަރުކާރު ހިންގާ މައި ޕާޓީ "ޕީއެންސީ" ގެ މެމްބަރުންގެ އެ އަމަލަކީ އެއްވެސް ވަރަކަށް ބަލައިގަނެވޭނެ އަމަލެއް ނޫންކަމަށެވެ. ހަމަހަމަކަމާއެކު ކެމްޕެއިން ކުރުމުގެ ފުރުސަތު ހުރިހާ ފަރާތްތަކަށްވެސް އޮންނަންވާނެކަމަށްވެސް އެ ފަރާތުން ވަނީ ބުނެފައެވެ.
