ވެރިކަން ހޯދުމަށް ޓަކައި ކުރި މަސައްކަތުގެ ތެރެއިން ކޮންމެ ބަޔަކުވެސް ރައްޔިތުންގެ ވިސްނުމާ ކުޅެލުމަށް ދެއްކި ވާހަކަތައް ވަރަށް ބައިވަރެވެ. އަޑަށް ތަފާތު ބަނޑި ބަނޑި ލެއްވުމަށްފަހު، ތަފާތު ޖަޒުބާތުތައް ގެނެސް ރައްޔިތުން އެ މީހުންގެ ދަލުގައި ޖައްސުވަން އެ މީހުން އެއިރު ވެސް އައީ ތަފާތު ވާހަކަތައް ދައްކަމުންނެވެ.

އެގޮތުން މަރުތަކަށް އިންސާފު ހޯދައިދިނުމަކީ ހުރިހާ ދިމާ ދިމާލަކުންވެސް ދެއްކި ވާހަކަތަކެކެވެ. މިއަދު ދެން ރާގު ބަދަލުކުރި ނަމަވެސް މެއެވެ.

ކައިރި މަޒީއަކަށް ޖެހިލާމާ ބަހީއެވެ. އެގޮތުން 2022 ވަނަ އަހަރުގެ އޮކްޓޯބަރު މަހުގެ ތެރެއަށް ޖެހިލަމާ ހިނގާށެވެ. މުޅި ރާއްޖެ ގުގުމާލީ ތުހުމަތެއްގައި ބަންދު ކުރި މީހަކު ފުލުހުންގެ އިހުމާލުން ނިޔާވި ޚަބަރާއެކުއެވެ

އަބްދުﷲ ރަޝީދެއް ނިޔާވެއްޖެއެވެ. ތުހުމަތު އަމާޒުވަނީ ފުލުހުންނަށެވެ. ފުލުހުންގެ ބެލުމުގެ ދަށުގައި ހުރީ ކުރެވުނު ތުހުމަތަކަށެވެ. ނަމަވެސް ފުލުހުންގެ ބެލުމުގެ ދަށުގައި ހުރީ ކުރެވުނު ތުހުމަތަކަށެވެ. ކުށެއް ސާބިތު ނުވާހާ ހިނދަކު އެމީހަކީ މައުސޫމު މީހެކެވެ. ނަމަވެސް ހޯޑެއްދޫއަށް އުފަން އަބްދުﷲ ރަޝީދު (މާޓީ) ނިޔާވެގެން ދިޔައީ ބޭސް ފަރުވާއަށް އެދި އާދޭސްކުރަމުން ދަނިކޮށެވެ. މަންޒަރު ދުށް މީހުން އެކަމަށް ހެކި އެބަދެއެވެ.

ނަމަވެސް ވީ އިހުމާލު ފޮރުވަން އޭރުގެ ސަރުކާރުން ފުލުހުން މެދުވެރިކޮށް ސީންއެއް ކްރިއޭޓުކުރުމަށް މަސައްކަތް ފެށިއެވެ. އާއިލާއާ ދެކޮޅަށް ހަށިގަޑު ޕޯސްމޯޓަމް ހަދަން ފޮނުވިއެވެ. މަރުުވުމަށް ފަހު މަސްގަނޑަކީ އާއިލާ އާ ވާރުތަވެރިންގެ މިލްކުކަކަށް ވާއިރު މާޓީގެ ހަށިގަޑު އާއިލާއަށް ދޫކޮށްލުމަށް ހުކުމް ކޮށްލަން ވެސް ކޯޓަށް ނުކެރުނެވެ.

ފުލުހުންގެ އިހުމާލުން އަބްދުﷲ ރަޝީދު ނިޔާވި ކަމަށް ޕޮލިސް އިންޓަރގިރިޓީ ކޮމިޝަނުން މައުލޫމާތު ދިން ކަމަށް އޭރު އިދިކޮޅު ކޯލީޝަންގެ އެއް ޕާޓި އަދި މިއަދު ސަރުކާރު ހިންގާ ޕާޓީ ޕީއެންސީގެ އޭރުގެ ރައީސް މިއަދު އެ ޕާޓީގެ ޗެއަރޕާސަން އަދި މި ސަރުކާރުގެ އެންމެ އިސް ވަޒީރު މަނިކުފާނު ވިދާޅުވިއެވެ.

2023 ވަނަ އަހަރުގެ ޖަނަވަރީ 09 ވަނަ ދުވަހުގެ ރޭ ޕީޕިއެމް/ޕީއެންސީއިން ބޭއްވި ޖަލްސާއެއްގައި އަދުރެ އެ ވާހަކަ ނިކަން ކަރަށް ބާރުލާފައި ވިދާޅުވިއެވެ. އަދި މާޓީއަށް އެވެރިންގެ ވެރިކަމެއްގައި އިންސާފު ހޯދައިދޭނެ ކަމަށް ވެސް ވައުދުވިއެވެ.

މި ވައުދު ރައީސް މުހައްމަދު މުއިއްޒު މާޓީގެ އުފަން ރަށް، ހޯޑެއްދޫއަށް ރިޔާސީ އިންތިހާބުގެ ތެރޭގައި ކުރެއްވި ދަތުރުފުޅުގައި ތަކުރާރު ކުރެއްވިއެވެ. މާޓީގެ މަސައްކަތުން ނިންމާފައި ހުރި ޖަގަހަ ހުޅުވުމުގެ ރަސސްމިއްޔާތަށް ފަހު މާޓީގެ މަންމަ އާ ހަވާސާއިން ބޭރުން ބައްދަލުކުރައްވާ ރައީސް މުއިއްޒު އެރުވި ޔަގީންކަމަކީ އެ މަރުގައި އިހުމާލު އެބައޮތް ކަމާ އަދި އެކަން އެމަނިކުފާނުގެ ސަރުކާރެއްގައި ވަރަށް ރަގަޅަށް ތަހުގީގުކޮށް ޒިންމާވާ ފަރާތްތައް އިންސާފުގެ ކުރިމައްޗަށް ހާޒިރުކުރާނެ ކަމަށެވެ. އެތަނުގައި ހާޒިރުވެ ހުރި މީހެއްގެ ހައިސިއްޔަތުން ހުދު އަޅުގަޑު މިކަމަކަށް ހެކިވަމެވެ.

ކަންމިހެން ހުރިއިރު ސަރުކާރު ފުރޮޅި ޕީޕީ/ޕީއެންސީއަށް ވެރިކަން ލިބި އަދު ހުރިހާ ބާރެއް ތަހުގީގުކުރުމުގެ ތެރެއިން ލިބުމުން ފެނިގެން ދިޔައީ ކުރި ސަރުކާރުން ހިންގާފައި އޮތް ތަހުގީގެއްގެ މައްޗަށް މައްސަލަ ނިންމަން އުޅޭ ފަދަ މަންޒަރު ތަކެކެވެ.

އެގޮތުން ވަޒީރުން މަޖިލީހުގެ ތަޅުމަށް ހާޒިރުކޮށް ވަޒީރުންނާ ސުވަލުކުރުމުގެ މަރުހަލާގެ ތެރެއިން މާޓީގެ މަރާއި ގުޅޭގޮތުން ދާޚިލީ ވަޒީރާއި މަޑަވެލި ދާއިރާގެ މެންބަރު ހުސައިން ފިރުޝާ ސުވާލު ކުރެއްވުމުން ވިދާޅުވެފައިވަނީ މައްސަލައިގައި ދައުވާ ކުރަން ފޮނުވިކަމަށް މައުލޫމާތު ލިބިފައިވަނީ މީޑިއާތަކުން ކަމަށާއި، އެ މައްސަަލައިގެ ރިޕޯޓް ހިއްސާ ކުރުމަށް ޕޮލިސް އިންޓަރގިރިޓީ ކޮމިޝަންގައި އެދިފައިވާނެ ކަމަށެވެ.

މިހާ ހިސާބުން އުފެދޭ ސުވާލަކީ ފުލުހުންގެ ތެރެއިން ކުރީ ސަރުކާރުން ކުރި ތަހުގީގެއްގެ މައްޗަށް އެކަނި ބަރޯސާވެ ފުލުހުންގެ އިހުމާލު ނެތް ކަމަށް މި ސަރުކާރުގެ ވަޒީރު ވިދާޅުވީ ކީއްވެތޯކަމެވެ.

އައު ސަރުކާރެއް އައުމުން މި ފަދަ ބޮޑެތި އިހުމާލުތަކަކީ އަލުން ބަލާ ދިރާސާކުރަން ޖެހޭ ކަންކަމަށް ނުވަނީތޯއެވެ؟ އެހެން ކަމަށް ވާނަމަ އިންތިހާބުގެ ތެރޭގައި މާޓީގެ މަންމައަށް ރައީސް މުއިއްޒު ވެވަޑައިގެންނެވީ ހޮޅި ވައުދެއް ކަމަށް ނިންމަންވީތޯއެވެ؟

މާޓީއަކީ ވެސް މަންމަ އަކާ ބައްޕައެއްގެ ދަރިއެކެވެ. ރެޑް ބެލޫންސް ޖަހާ އޭނާގެ އާއިލާ މީހުން ޓްވީޓުކޮށް މަގު މައްޗަށް ބެނަރތައް ހިފައިގެން ނުނިކުތަސް އެއީވެސް ދިވެހި ރައްޔިތެކެވެ. ތުއްތު ދަރިންތަކެއްގެ ބައްޕައެކެވެ. އަދި މަރުވެގެން ދިޔައިރުވެސް މައުސޫމް މީހެކެވެ.

އެއްވެސް މީހެއްގެ މަރަކީ ސިޔާސީ ކަމަކަށް ހަދައިގެން ނުވާނެ އެވެ. އެކަމަކު މިއަދު ފެންނަ މަންޒަރުން ބުނެދެނީ މުޅިން އެހެން ވާހަކަ އެކެވެ.

މައްސަލައާ ގުޅިގެން ފުލުހުންގެ އޮޕަރޭޝަނަލް މައްސަލަތަކެއް ހުރިތޯ މިހާތަނަށް ބެލި ބެލުމުން ނެތް ކަމަށް ވިދާޅުވިއިރު އެކަމުގެ ތަހުގީގު ހިންގާފައި އޮތީ ނިކަން ދޯދިޔާކޮށް ކަމަށް ބުނެ އެ މަރު ސިޔާސީ ގޮތުން ބޭނުންކޮށް ބޭނުން ފުދުނީމާ ކަމެއް ނުވާ ކަމަށް ހަދަން މި މަސައްކަތްކުރުމުން އެމްޑީޕީއެކޭ އަދުގެ ސަރުކާރެކޭ ތަފާެއް ނެތް ނޫންތޯއެވެ؟

މި ފެންނަމުން ދަނީ އަތްމައްޗަށް ބާރުތައް އަރާ، އިންސާފު ނުލިބިވާ މިފަދަ މައްސަލަތަކަށް އިންސާފު ހޯދައިދޭން މަގު ފަހިކޮށްދިނުމުގެ ބަދަލުގައި އެކަންކަމުން ބޯދަމައިގަންނަން މަސައްކަތްކުރާ ތަނެެވެ. މިހެން ދެންނެވުމުން އަނެއްކާވެސް މުޅި ސަރުކާރު އެއްކޮށް ޑިފެންސަށް ފައިބާނެ ތޯއްޗެކެވެ. ނަމަވެސް ހަގީގަތް ނުފޮރުވޭނެއެވެ. ވަގަކަށް ހާސް ދުވަހޭ ވެރިއަކަށް އެއް ދުވަހޭ ބުނާ އުސޫލުންނެވެ.

ރައްޔިތުންނަށް ނޭނގޭ ޖަވާބުތަކެއް، ނުލިބޭ ޖަވާބުތަކެއް ހުރިއިރު، އެ ޖަވާބުތަކެއް އަދިވެސް ފުލުހުން ގެ ފަރާތުންވެސް އަދި ހޯމް މިނިސްޓަރުގެ ފަރާތުންވެސް ނުލިބުމަކީ އެއީ ވެސް އިހުމާލެކެވެ. އާއިލާއެއްގެ މައި ތަނުބު އެ އާއިލާއެއްގެ ޅަފަތުގައި ބައެއްގެ އިހުމާލުން ދުނިޔެ ދޫކުރުމަކީ ކޮން ބަޔަކށް ކެތް ކުރެވޭނެ ކަމެއް ބާއެވެ؟ އެހެންކަމުން އާދައިގެ ކަމެއް ކަމަށް ބަލާ މިފަދަ ކަންކަން އޮއްބާލަން މަސައްކަތްކުރުމަކީ ކޮންމެ ސަރުކާރެއް އޮތްކަމުގައި ވީ ނަމަވެސް ނިކަން ޒިންމާދާރުކޮށް ކުރާ ކަންކަމެވެ.

އިންސާފުގެ ދޮލަނގު ވިއްކައިގެން ވެރިކަމަށް އަރާ އެ ދޮލަނގަށް ދޮގު އަޅާއި ފުރަން ފެށީމާ ދެން ފެންނަނީ ނުފޯރާ ފޮތިން ފޫގެޅީމާ ވާ ގޮތެވެ.