ރާއްޖޭގައި ނަޞާރާ ދީން ފަތުރަން އުޅުނު ދެ ފަތުރުވެރިއަކު ފުލުހުންގެ ބެލުމުގެ ދަށަށް ގެންގޮސްފިއެވެ.

ހުޅުމާލޭ ފޭސް 2 ގަ ދެ ބިދޭސީއަކު މެއިލްބޮކްސްތަކަށް ނަސޯރާ ދީން ދިވެހި ބަހަށް ތަރުޖަމާކޮށްފައިވާ ވެބްސައިޓް ލިންކް ހިމެނޭ ބިޒްނަސް ކާޑު ތަކެށް އަޅަމުން ދާތަނުގެ ފޮޓޯތަކެއް ސޯޝަލް މީޑިއާގައި ދަނީ ދައުރުވަމުންނެވެ.

ޗީފް ސްޕްރިންޓެންޑެންޓް އޮފް ޕޮލިސް އަޙްމަދު ޝިފާން އެކަމާ ގުޅިގެން އެކްސްގައި މިއަދު ވިދާޅުވީ އެ ދެ މީހުން ހުޅުމާލޭ ފޭސް 2 ގައި ހުންނަ ޕޮލިސް ސްޓޭޝަނަށް ގެންގޮސްފައިވާ ކަމަށެވެ. ޝިފާން ވިދާޅުވީ އެ ދެ މީހުންނަކީ ޖަރުމަންވިލާތަށް ނިސްބަތްވާ ދެ އަންހެނުން ކަމަށެވެ.

ދިވެހި ރައްޔިތުންގެ ދީނީ އެއްބައިވަންތަކަން ހިމާޔަތް ކުރުމުގެ ގާނޫނު(ގާނޫނު ނަންބަރު 6/1994) ބުނާގޮތުން އިސްލާމްދީން ނޫން އެހެން ދީންތަކުގެ މީހުން އަޅުކަން ކުރާތަންތަން ހެދުމާއި އިސްލާމްދީން ނޫން އެހެން ދީންތަކުގެ ޝިއާރު ކަމަށް ބެލެވޭ ތަކެތި ވިއްކުމާ ގެންގުޅުމަކީ އިޝްތިހާރު ކުރުމަކީ މަނާކަމެކެވެ. އަދި އިސްލާމްދީން ނޫން އެހެން ދީންތައް ކުރިއެރުވުމަށް މަސައްކަތް ކުރުމަކީ މަނާކަމެއް ކަމުގައި އެ ގާނޫނުގައިވެއެވެ.