އޮޅަމުން އެއް ފަހަރުކަމެއް ކުރެވިދާނެއެވެ. އެއީ އިންސާނީ ތޮބިއަތެވެ. ނަމަވެސް އެއްކަމެއް ނުވަތަ އޮޅުމަކުން އެއް ބަޔަކަށް ގެއްލުމެއް ދިނުން ނުވަތަ އެއްބަޔަކާ މަސްލަހަތު އޮތް ކަމަކަށް ފުށު އެރުން އެއީ އޮޅުމެކޭ ހީކުރުމަކީ ވެސް ހެދޭނެ ބޮޑު ގޯހެއްކަން ޔަގީނެވެ.

އެގޮތުން ވަކި ގައުމަކަށް އޮޅިގެން ވަކި ގައުމެއްގެ ކަންކަމަށް އަތް ބޭނުން ނުވަތަ ވަކި ގައުމަކާ ގުޅުން ހުރި ކަންކަމުގައި އޮޅުން އެރުން އެއީ އިއްތިފާގަކަށް ނުވާނެކަން ޔަގީނެވެ. އަދި އަމުދުން ތަންދޮރު އނެގޭ އެންމެ ޑިމޮކްރެޓިކު ކަމަށް ދައުވާ ބަޔަކަށް އެހެން އެކަންކަން ކުރެވިގެން ނުވާނެއެވެ.

އިންޑިއާ އިން ރާއްޖޭގެ ކަންކަމާ ބަސް ބުނެ އުޅުމަކީ ދިވެހިން އެއްވެސް އިރެއްގައި ރުހޭނެ ކަމެއް ނޫންކަން ހާމަވާއިރު އިންޑިއާއިން ރާއްޖެއަށް އަތްގަދަ ކުރަން މަސައްކަތްކުރުން އަދި އަމުދުން ބަލައި ނުގަނެވޭނެއެވެ.

ދައްކަން މިއުޅެނީ ކޮން ވާހަކައެއް ކަމާ މެދު ތިޔަ ބޭފުޅުން ހިތުގައި ފަހަރުގައި ސުވާލު އުފެދިދާނެއެވެ. އާދެ މި ރިޕޯޓުގައި ދައްކަން މިއުޅެނީ އިންޑިއާއަށް ގިނަ އޮޅުންތަކެއް އަރާ ރާއްޖޭގެ ކަންކަމުގައި ގޯސްކޮށް ކަންކަން ކުރާ ވާހަކައެވެ.

2018 ވަނަ އަހަރު ރައީސް އަބްދުﷲ ޔާމީން ގާއިމުކޮށްދެއްވި ކޯޑްއެފް ރަންވޭގައި ރައީސް އިބްރާހިމު މުހައްމަދު ޞާލިހުގެ ސަރުކާރުގައި އެ ރަންވޭ އަދި ނުހުޅުވާ އޮއްވާ އިންޑިއާގެ މަތިންދާ ބޯޓަކުން ޖެއްސީ އޮޅުމަކުން ކަމަށް ބުނެ ފުއްދާލީއެވެ. ދިވެހިންގެ ކިބައިން މައާފަށް އެދުމެއް އެހެންކަމެއް ނެތެވެ.

އޭގެ ފަހުން އެ ފަސް އަހަރަކީ އިންޑިއާއިން ބޭނުންކަމެއް ބޭނުން ގޮތަކަށް ރާއްޖޭގައި ކުރަމުން ދިޔަ ފަސް އަހަރެވެ. އޭރު ބައެއް ފަހަރު ރާއްޖެއަކީ އިންޑިއާގެ އަވަށެކޭ ވެސް ހިވާ ފަހަރު އާދެއެވެ. އިންޑިއާގެ ބާރު ރާއްޖޭގައި އޭރު އޮތް މިންވަރު ބޮޑުކަމުންނެވެ.

އިންޑިއާއަކީ ކޮންމެ ސަރުކާރެއް އޮތް ނަމަވެސް ރާއްޖެއަށް އަތްގަދަ ކުރުމަށް އެކި ޑީލުތައް ކުރަން މަސައްކަތް ކުރާ ބައެވެ. އެކަން އެމީހުންނަށް ކާމިޔާބުނުވީ ރައީސް އަބްދުﷲ ޔާމީންގެ ސަރުކާރުގައެވެ.

އޭގެ ފަހުން އެމްޑިޕީ ސަރުކާރުގައި އެމީހުން ދިޔައީ މިތާ ރާޖުކުރަމުންނެވެ. އެމީހުންގެ އަސްކަރިއްޔާގެ ހަން މުޅި ގައުމުގައި ފަތުރާލީ އޭރުގެ ސަރުކާރާ އެކު ހެދި ސިއްރު ޑީލުތަކުގެ ތެރެއިންނެވެ. ރާއެްޖޭގެ މިނިވަންކަމާ އިސްތިގުލާލު ނުރައްކަލަށް ހުށަހެޅި އެކަމާ ދެކޮޅަށް ދިވެހިން ނުކުތީ އެހާ ހިސާބުންކަން މިއި އެންެމެން ދަންނަ އެކަމަކު ބައެއް މީހުން ގަބޫލުކުރަން ބޭނުންނުވާ ކަމެކެވެ.

ކަން އެހެންވުމާ އިންޑިއާގެ އަސްކަރިއްޔާ މިގައުމުން ބޭލުމަށް ދިވެހިންގެ ހީރޯ ރައީސް ޔާމީން ފެއްޓެވި އިންޑިއާ އައުޓު ކެމްޕެއިނާ އެކު އޭރު އިންޑިއާ ސަރުކާރުގެ ދުއްތުރާ ދިވެހިންނަށް ޖެހިދާނެކަމާ މެދު އެތައް ބަޔަކު ކަންބޮޑުވިއެވެ. ނަމަވެސް ވެރިކަން ބަދަލުވުމުން އެކަންކަން ހައްލުވެގެންދާނެ ކަމަށް ގިނަ ބަޔަކު ގަބޫލުވެސް ކުރިއެވެ.

ނަމަވެސް ކަންވީ އެހެންތޯ މިއަދު ސުވާލު އުފެދެއެވެ. އިންޑިއާ އައުޓުކުރަންށާ އެއްކޮށް ރައްޔިތުން ހޮވި ސަރުކާރަކުން ފެނިގެން ދަނީ އިންޑިއާ ސަރުކާރުގެ ފައި ބުޑަށް ވެއްޓެމުންދާ މަންޒަރޭ ބުނަން ހިތުގައި ރިހުމަކާ އެކު ބުނަން މަޖްބޫރުވެއެވެ.

އިންޑިއާ ސިފައިން ބޭލުމުގެ ނަމުގައި އިންޑިއާ ސިފައިންގެ ޔުނިފޯމު ބާލާ އެޅުވީ ދިވެހިން ލޮލުގައި އަދުނެކެވެ. ދެން އޮތީ އިންޑިއާގެ ޖެއްސުން ދިވެހި މަސްވެރިންނަށް ފޯރި ފޯރުމުގެ ވާހަކައެވެ. އިންޑިއާގެ ހަތިޔާރު އެޅި ސިފައިން ދިވެހި މަސް ދޯނިތަކަކަށް އަރާ ދިވެހިންނަށް ބިރު ދެއްކީ ދިވެހިންގެ އިމުގެ ތެރެއިންނެވެ. މިއީ ޑިޕްލޮމެސީއަށް ބަލާއިރު ވަރަށް ބޮޑު ކުށެކެވެ. އެއީ ދިވެހިން ދިިވެހިންގެ މަސް ކަނޑުތަކުގައި ރައްކަލެއް ނެތުމުންނެވެ. ދިވެހިންގެ އިގްތިސޯދީ ސަރަހައްދަށް ވަދެ ގަނެ ދިވެހިންތަކަކަށް ހަތިޔާރުން ވިރު ދެއްކުމަކީ އެއީ ޑިޕްލޮމެސީއަށް ބަލާއިރު ސަފީރު ހާޒިރުކޮށް ސުވާލުކޮށް މައާފަށް ވެސް އެދެން ޖެހޭ ވަރު ކުށަކަށް ވުމުންނެވެ.

ނަމަވެސް ފެނިގެން ދިޔައި ކަންވީ ގޮތް ސާފުކުރަން ލިޔުމުން ހުށަހެޅުމުން ވެސް އިންޑިއާއިން އެއަށް ޖަވާބުނުދިނުމެވެ. އޭގެ ފަހުންވެސް ދިވެހި ސަރުކާރުގެ އެކަމުގެ ރަސްމީ ބަހެއް ނުލިބި އޮއްވާ މަޖިލީހަށް ދިފައީ ވަޒީރު ހާޒިރު ކުރުމުން ދެއްވި ޖަވާބަކީ އެއީ އިންޑިއާއަށް އޮޅިގެން ކުރެވުނު ކަމެއް ކަމަށެވެ.

އަސްތާއެވެ. މިވަރުން ހަމަ ގަބޫލުކޮށް ފުއްދާލީ އެއީ ނިކަމެތި ރައްޔިތުންތަކަކަށް ކުރިމަތިވި ކަމަކަމަށް ވުމުން ތޮއެވެ؟ އެ ދޯނިތަކުގައި ސިޔާސީ ގަޮތުން މަންފާއެއް ލިބޭނެ ގޮތެއް ނެތުމުންތޯއެވެ؟ މަސްވެރި ވަޒީރުވެސް ހަމަ މި ޖަވާބާ އެކު ހިނިތުންވެލައްވާ އެކަން ގަބޫލުކުރެއްވީތޯއެވެ؟

އިންޑިއާގެ ސެޓެލައިޓުތަކަށް ނޫނީ އަސްކަރި މަނަވަރުތަކަކަށް މޯބައިލް ފޯނުތަކެއްގެ ސިގްނަލް ލިބިގެން ވެސް އެމީހުންނަށް އެރެންވާނީ އެމީހުންގެ އިމުގެ ތެރޭގައި ތިބި ނަމައެވެ. ދިވެހިން ތިބީ ދިވެހިންގެ މާ ކަނޑުގައެވެ. ދިވެހިންގެ ގޭގައެވެ. އެހެންކަމުން އޮޅިގެން ކަމަށްބުނެ ބަޑި ޖަހާ އެއިން މަސްވެރިޔަކު މަރާލި ނަމަވެސް ހަމަ ގަބޫލުކުރާނީ އެހެން އެކަން ވީ ކަމަށް ބާއެވެ؟

ރާއްޖޭގެ ކަންކަމުގައި އިންޑިއާއަށް އަރާ އޮޅުންތައް ގިނަވާއިރު މިވަރުން ދާކަމުގައި ވަނީ ނަމަ އެމްޑީޕިއިން ހިތްވަރު ދިގެން އެމީހުން އަރާ ރާއްޖެ ހިފާފައިވެސް "މާފު ކަރުނާ ހަމްލޮގޯކޮ އެކް ބޫލް ހޯގައީ" އޭ ބުނުމުން ހަމަ ގަބޫލުކުރާނީ ތޯ، މިއީ އެހެންވީމާ މިއަދު އުފައްދަން ޖެހޭ ސުވާލެކެވެ.

ދިވެހިންގެ ރައްކާތެރިކަމާ ސަލާމަތް ކަށަވަރުކޮށްދޭން އޮތީ ދިވެހި ސަރުކާރު ކަމުގައި ވާއިރު އެރި އޮޅުމަކުން އެވަރު ބޮޑު ކަމެއް ހިނގަދާނެކަމަށް ގަބޫލުކުރުމަކީ ހާދަހާވާ ދޯދިޔާކޮށް ދިވެހި ސަރުކާރުން ކުރި ކަމެކެވެ. ބުލީކުރުން ބަލައި ނުގަންނާނެ ކަމަށް ރައީސް މުހައްމަދު މުއިއްޒު ވިދާޅުވިއިރު ބިރު ދެއްކުން ބަލައިގަންނަ އަނެއްކާ އޯކޭ ވީބާއެވެ؟