ހުކުރު ދުވަހު މުޅި ރާއްޖެއަށް ކުރި ވިއްސާރާގައި އެންމެ ގިނައިން ވާރޭ ވެހުނީ ވެރިކަން ކުރާ ސިޓީ މާލެއަށް ކަމަށް މޫސުމާ ބެހޭ ގައުމީ އިދާރާއިން ހާމަކޮށްފިއެވެ.

މެޓު އޮފީހުން ހާމަކޮށްފައިވާ ގޮތުގައި ހުކުރު ދުވަހު މާލެއަށް 159.3 މިލިމީޓަރު، ހުޅުލެއަށް 143.4 މިލިމީޓަރު އަދި ހުޅުމާލެއަށް 105.4 މިލިމީޓަރުގެ ވާރޭ ވެހިފައިވެއެވެ. މާލެ, ހުޅުލެ އަދި ހުޅުމާލޭގެ އިތުރުން އިއްޔެ ދެން އެންމެ ގިނައިން ވާރޭ ވެހުނީ އދ. މާމިގިލި، އއ. ތޮއްދޫ ކ. ކާށިދޫ އަދި ގދ. ތިނަދޫއަށެވެ. އެ ރަށްތަކަށް 68.3 މިލިމީޓަރާއި، 53.3 މިލިމީޓަރާ ދެމެދުގެ މިންވަރަކަށް ވާރޭ ވެހިފައިވެއެވެ.

ހުކުރު ދުވަހު ރާއްޖޭގެ އެކި ހިސާބުތަކަށް ކުރި ވިއްސާރައިގައި މާލޭގެ އިތުރުން ތ. ގުރައިދޫ, ދިޔަމިގިލި, ލ. މާމެންދޫ އަދި ދ. ކުޑަހުވަދޫ ގައި ފެން ބޮޑޫވެ ގެއްލުންތައް ވަނީ ލިބިފައެވެ.

އެގޮތުން ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)އިން އެކްސްގައި ކުރި ޕޯސްޓެއްގައި ހާމަކޮށްފައިވާ ގޮތުގައި މާލޭގައި ފެންބޮޑުވެ އެހީއަށް އެދުނު 144 ގޭގެ ތެރެއިން 132 ގެއަކަށް މިހާތަނަށް އެހީތެރިކަން ފޯރުކޮށްދީފައިވާކަމަށެވެ.

އެންޑީއެމްއޭއިން ކުރި އެކްސް ޕޯސްޓުގައި އިތުރަށް ވިދާޅުވެފައިވަނީ، 91 ގެއެއްގައި ވަނީ ވެލިބަސްތާ ޖެއްސިފައި ވާއިރު، 8 ގެއެއްގެ 57 މީހުންނަށް ވަގުތީ ބޯހިޔާވަހިކަމާއި ކެއިން ބުއިން ހަމަޖައްސާފައިވާކަމުގައެވެ. އެންމެ ބޮޑަށް ގެއްލުން ލިބިފައިވަނީ މާލޭގެ ގެތަކަށެވެ.

ހުކުރު ދުވަހުގެ ރެއިން ފެށިގެން ރޭ ދަންވަރާ ހަމައަށް ހުއްޓުމެއް ނެތި މާލެ އާއި ރާއްޖޭގެ ބައެއް ސަރަހައްދުތަކަށް ދިޔައީ ވާރޭ ވެހެމުންނެވެ. އޭގެ ސަބަބުން މާފަންނު އަވަށުގެ ބޮޑު ސަރަހައްދެއްގައި ވަރަށް ބޮޑަށް ފެން ބޮޑުވި އެވެ. އެހެންވެ އެ ސަރަހައްދުގެ މަގުތައް ވެސް ބަންދުކުރި އެވެ. އަދި މާލޭގެ އެހެން ބައެއް ސަރަހައްދުތަކާއި ބޮޑެތި މަގުތަކުގައި ވެސް ފެން ބޮޑުވިއެވެ.