ރައީސުލްޖުމްހޫރިއްޔާގެ ރަސްމީ ގެކޮޅު ކަމުގައިވާ މުލިއާގޭގެ މަރާމާތަށް ދިޔަ ހަރަދުތަކުގެ ތަފްސީލް ހާމަކުރަން އިންފޮމޭޝަން ކޮމިޝަނަރުގެ އޮފީސް (އައިކޮމް)އިން އަންގައިފިއެވެ.
އައިކޮމް އިން އެ މައުލޫމާތު ހާމަކުރުމަށް ރައީސް އޮފީހަސް އަންގާފައިވަނީ، މައުލޫމާތު ހޯދައި ލިބިގަތުމުގެ ގާނޫނުގެ ދަށުން، މުލިއާގެ މަރާމާތަށް ދިޔަ ހަރަދު ހޯދުމަށް އޮންލައިން ނޫސް "ދައުރު"ން ރައީސް އޮފީހަށް ހުށަހެޅި މައްސަލައިގެ އަޑުއެހުންތައް ނިންމާ އިއްވި ހުކުމްގައެވެ.
މިދިޔަ ޑިސެމްބަރު މަހު އެ ތަފްސީލުތައް ހޯދަން "ދައުރު" ނޫހުން ހުށަހެޅުމުން ގާނޫނުގައި ބުނާ މުއްދަތު ފާއިތުވެގެން ގޮސް މުއްދަތު އިތުރުކުރިތާ އެތައް ދުވަހެއް ވީއިރު ވެސް އެ މައުލޫމާތު ރައީސް އޮފީހުން ދީފައެއް ނުވެއެވެ.
އެހެންކަމުން އެ މައްސަލަ އައިކޮމްއަށް ހުށަހެޅުމުން، ބުރާސްފަތި އެ މައްސަލައިގައި ވަނީ އަޑުއެހުމެއް ބާއްވާފައެވެ. އަޑު އެހުމުގައި އިންފޮމޭޝަން ކޮމިޝަނަރު އާހިދު ރަޝީދު ވިދާޅުވީ 'ދައުރު'ން ހޯދަން އެދުނު މައުލޫމާތަކީ، ގާނޫނުގެ ދަށުން ނުދީ ހިފެހެއްޓޭނެ މައުލޫމާތެއް ނޫން ކަމަށެވެ.
އެހެންވެ އެ އަޑުއެހުމުގައި އާހިދު ވަނީ، ތިން ދުވަސް ތެރޭ އެ މައުލޫމާތު ރައީސް އޮފީހުން ދިނުމަށް އަންގާފައެވެ.
މީގެ ކުރިން ތިން ފަހަރެއްގެ މަތިން މި އަޑުއެހުން ތާވަލް ކުރުމުން އެ އަޑުއެހުމުގައި ރައީސް އޮފީހުން ބައިވެރިވެފައެއް ނުވާތީ އަޑުއެހުންތައް ކުރިއަށް ނުގެންދެވި މައްސަލަ އޮތީ މަޑު ޖެހިފައެވެ.
ކޮންމެ ފަހަރަކު ވެސް ރައީސް އޮފީހުން އަންގަމުން ދަނީ އަޑުއެހުމުގައި ބައިވެރިވެވެން ނެތް ކަމަށް ކަމަށް އައިކޮމްއިން ހާމަކޮށްފައިވެއެވެ.
ޝަކުވާ ހުށަހެޅިތާ 30 ދުވަސް ފާއިތުވެފައިވާއިރު، ގާނޫނުގެ ދަށުން 30 ދުވަހުގެ ތެރޭގައި މައްސަލަ ނިންމަން ޖެހޭތީ ދެން އިތުރަށް ލަސްކުރެވެން ނެތުމުން، އާހިދު ބުރާސްފަތި ދުވަހު މި ނިންމުން ނިންމާފައި ވަނީ ރައީސް އޮފީހުގެ ބައިވެރިވުމެއް ނެތިކަން ފާހަގަކޮށްލެވެއެވެ.
މުލިއާގެ މަރާމަތު ކުރަން ފެށީ، ރައީސް މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ފަހު، އެމަނިކުފާނު އެ ގެއަށް ބަދަލުވުމުގެ ކުރިންނެވެ. އޭގެ ކުރިން އެ މަނިކުފާނު ދިރިއުޅުއްވަމުން ގެންދެވީ، އަމިއްލަ ގެކޮޅު ކަމުގައިވާ މ. ދިމްޔާތުގަ އެވެ.
