2023 ވަނަ އަހަރު ޖުޑީޝަލް ސާވިސް ކޮމިޝަން- ޖޭއެސްސީއަށް ހުށަހެޅުނު ޝަކުވާގެ އަދަދު ދަށްވެއްޖެއެވެ.

ކޮމިޝަންގެ ތަފާސްހިސާބުތަކުން ދައްކާ ގޮތުގައި 2022 ވަނަ އަހަރާއި އަޅާބަލާއިރު 2023 ވަނަ އަހަރު އެ ކޮމިޝަނަށް ހުށަހެޅި މައްސަލައިގެ އަދަދު 19.5 އިންސައްތައަށް ދަށަށް ޖެހިފައިއެވެ. 2022 ވަނަ އަހަރު އެ ކޮމިށަނަށް 390 ޝަކުވާ ހުށަހަޅާފައިވާއިރު 2023 ވަނަ އަހަރު ޖޭއެސްސީއަށް ހުށަހަޅާފައިވަނީ 314 ޝަކުވާއެވެ.

މި ޝަކުވާ ތަކުގެ ތެރެއިން 83.4 އިންސައްތަ މައްސަލަ އެއީ ނޮން ޖުޑިޝަލް މީސްކޮންޑަކްޓް މައްސަލަތަކުގެ ގޮތުގައި ކަނޑައަޅާފައިވާއިރު 8.3 އިންސައްތަ މައްސަލަ ވަނީ ތަހުގީގުކޮށްފައިއެވެ. އަދި 7.0 އިންސައްތަ މައްސަލަ ހުރީ ރިވިއުގައިއެވެ.

2023 ވަނަ އަހަރުގެ ޑިސެމްބަރު މަހުގެ 31 ވަނަ ދުވަހުގެ ނިޔަލަށް ޖޭއެސްސީއިން ވަނީ ޖުމްލަ 35 މައްސަލައެއް ބަލާ ނިންމާފައިއެވެ.

ނިމިދިޔަ އަހަރު ވަނަ އަހަރު ޖޭއެސްސީގައި މަސައްކަތް ކުރި އަންހެން ގާޒީންގެ އަދަދުވެސް ވަނީ އިތުރުވެފައިއެވެ. އެގޮތުން 2022 ވަނަ އަހަރާއި އަޅާބަލާއިރު 2023 ވަނަ އަހަރު އެ ކޮމިޝަންގައި މަސައްކަތް ކުރި އަންހެން ގާޒީންގެ އަދަދު 2.3 އިންސައްތައަށް އިތުރުވެފައިވާކަމަށް ޖޭއެސްސީގެ އަހަރީ ތަފާސްހިސާބުތަކުން ވަނީ ހާމަވެފައިއެވެ.

ނިމިދިޔަ އަހަރު ޖޭއެސްސީގައި ޖުމްލަ 28 އަންހެން ގާޒީން މަސައްކަތް ކޮށްފައިވާއިރު 2022 ވަނަ އަހަރު އެ ކޮމިޝަންގައި މަސައްކަތް ކޮށްފައިވަނީ ޖުމްލަ 23 އަންހެން ގާޒީންނެވެ. އަދި 2021 ވަނަ އަހަރު އެ ކޮމިޝަންގައި މަސައްކަތްކޮށްފައިވަނީ 20 އަންހެން ގާޒީންނެވެ. އެ ކޮމިޝަންގައި ނިމިދިޔަ އަހަރު ޖުމްލަ 149 ފިރިހެން ގާޒީން މަސައްކަތް ކޮށްފައިވެއެވެ.