އިއްޔެވެސް މާލޭގެ އެކި ސަރަހައްދުތަކުން ގިނަ އަދަދެއްގެ ކުނި ނަގައިފިއެވެ.

މާލެސިޓީ ކައުންސިލުން އެކްސްގައި ކޮށްފައިވާ ޕޯސްޓެއްގައި ބުނެފައިވަނީ އިއްޔެ އެކަނިވެސް މާލޭގެ މަގުމަތިން 350 ކިލޯގެ 16 ޕިކަޕު، 1.5 ޓަނުގެ 6 ޕިކަޕު، 2 ޓަނުގެ 2 ޕިކަޕު އަދި 10 ޓަނުގެ 2 ޕިކަޕުގެ ކުނި ނަގާފައިވާ ކަމަށެވެ.

އެއީ ޖުމުލަ 38.6 ޓަނުގެ ކުނި ކަމަށްވެސް ސިޓީ ކައުންސިލުން ވަނީ ބުނެފައެވެ.

މިދިޔަ ހަފްތާގައި އެކަނިވެސް މާލޭގެ މަގުމަތިން ވަނީ 300 ޓަނަށް ވުރެ ގިނަ ކުނި ނަގާފައިވާ ކަމަށް އެ ކައުންސިލުން ވަނީ ބުނެފައެވެ.

ރޯދަ މަސް ފެށުނުއިރު ގޭގޭގައި ގެންގުޅޭ ސާމާނު އައު ކޮށް ބާވެފައި ހުރި ސާމާނު ވަނީ މަގުތަކަށާއި ހަނި ގޯޅިތަކަށް ނެރެފައެވެ.

މާލޭގެ މަގުތަކަށް ގިނަ އަދަދަކަށް ކުނި އަޅާފައި އޮތުމުން މާލެސިޓީ ކައުންސިލުން ކުނި ނެގުމުގެ މަސައްކަތް ފެށިއެވެ.

އަދި އޭގެފަހުން ކޮންމެ ދުވަހަކުވެސް މަގުތަކަށް ނެރެފައިހުންނަ ކުނިތައް ނެގުމުގެ މަސައްކަތް ސިޓީ ކައުންސިލުން އަންނަނީ ކުރަމުންނެވެ.