2023 ވަނަ އަހަރުގެ ރިޔާސީ އިންތިހާބުގެ ކެމްޕެއިންގެ ފަހުކޮޅު އެމްޑީޕީން މޯލްޑިވިއަން މެދުވެރިކޮށް ކުރި ދަތުރުތަކަށް ދައްކަން ޖެހޭ 5.6 މިލިއަން ރުފިޔާ ނުދައްކައިގެން މޯލްޑިވިއަނުން ސިވިލް ކޯޓަށް މައްސަލަ ހުށަހަޅައިފިއެވެ.

އެ މައްސަލަ ސިވިލް ކޯޓަށް މޯލްޑިވިއަނުން ހުށަހެޅީ އިއްޔެއެވެ.

މައުލޫމާތުލިބުން ގޮތުގައި މޯލްޑިވިއަނުން މައްސަލަ ހުށަހެޅީ އެމްޑީޕީ އަށް އެތައް މުއްދަތެއް ދީގެން ވެސް ފައިސާ ނުދެއްކުމުގެ ސަބަބުންނެވެ.

އެ ފައިސާއަކީ މިދިޔަ އަހަރުގެ ސެޕްޓެމްބަރު މަހުން ފެށިގެން އޮކްޓޯބަރު މަހުގެ ނިޔަލަށް އެމްޑީޕީން މޯލްޑިވިއަން މެދުވެރިކޮށް ނެގި ޓިކެޓާ، ޗާޓަރ ދަތުރުތަކަށް ހޭދަވި ފައިސާ ކަމަށް ވެސް މޯލްޑިވިއަނުން ބުނެއެވެ.

މިދިޔަ އަހަރުގެ ސެޕްޓެމްބަރު 23 ވަނަ ދުވަހުން ފެށިގެން އޮކްޓޯބަރު 2 ގެ ނިޔަލަށް އެމްޑީޕީން ނަގާފައިވާ ޓިކެޓާއި ޗާޓަރ ދަތުރުތަކަށް ޖުމްލަ ދައްކަން ޖެހޭ 5.6 މިލިއަން ރުފިޔާ އެބަހުރިކަމަށްވެސް މޯލްޑިވިއަނުން ދައުވާކުރެއެވެ.

އެގޮތުން ބައެއް ދުވަސް ދުވަހު މިލިއަނަކަށް ވުރެ ގިނަ ރުފިޔާގެ ދަތުރުކޮށްފައިވާކަމަށްވެސް ވެއެވެ.

މޯލްޑިވިއަނުން ފޮނުވާފައިވާ ސިޓީގައިވާ ގޮތުން ނަމަ، އެ މުއްދަތުގައި ކުރި ދަތުރުތަކުގެ ތެރެއިން އެއް ދުވަހުގެ ތެރޭގައި އެންމެ ގިނައިން ފައިސާ ދައްކަން ޖެހުނީ ސެޕްޓެމްބަރު 26 ގައެވެ.

އެގޮތުން 1،073،756ރ. އެމްޑީޕީން ދައްކަން ޖެހޭ އިރު، ޖެހިގެން އައި ދުވަހު 1،029،298ރ. ދައްކަން ޖެހެއެވެ.

އަދި ސެޕްޓެމްބަރު 29 ގައި ވެސް 858،254ރ. ދައްކަން ޖެހިފައިވެއެވެ.

ޓިކެޓާއި ޗާޓަރ ދަތުރުތައް އެމްޑީޕީއަށް ހަމަޖައްސާފައި ވަނީ ހިދުމަތް ދޭތާ 48 ގަޑިއިރު ތެރޭ ފައިސާ ދައްކާ ގޮތަށް ކަމަށްވެސް މޯލްޑިވިއަނުން ބުނެފައިވެއެވެ.

ފައިސާ ދައްކަން އެމްޑީޕީ އަށް އައިލެންޑް އޭވިއޭޝަނުން އެންމެ ފަހުން ދިން މުއްދަތަކީ މިދިޔަ ފެބްރުއަރީ މަހުގެ 18 ގެ ކުރިންކަމަަށް ވެސް އެ ކުންފުނިން ވަނީ މައުލޫމާތުދީފައެވެ.