ޖިންސީ ފުރައްސާރަކުރިކަމުގެ ތުހުމަތު ކުރެވުނު އެމްއެމްޕީއާރްސީގެ ޑީއެމްޑީ ބައްސާމް ސަސްޕެންޑް ކުރިކަމަށް ބުނެ އެމްއެމްޕީއާރްސީން ހެދީ ދޮގެއް ކަމަށް ޗެނަލް 13 އިން ޝާއިއު ކުރުމުން އެ ކުންފުނީގެ މެނޭޖިންގް ޑިރެކްޓާރ ފާތިމަތު ތައުފީގް (ކުޑީ) ޚަބަރު ޝާއިއުނުކޮށް ކެތްތެރިވާން އެދިއްޖެއެވެ.

ފާތިމަތު ތައުފީގް މިފަދައިން ވިދާޅުވެފައިވަނީ އެކްސްގައި އޭނާ ކުރެއްވި ޕޯސްޓެއްގައެވެ.

އެ ޕޯސްޓްގައި އޭނާ ވަނީ ޗެނަލް 13 ގެ ނިއުސް ހެޑް މަރިޔަމް އިސާދާ ކެތްތެރިވާން އެދިފައެވެ.

ޖިންސީ ފުރައްސާރަ ކުރި ކަމުގެ ތުހުމަތުތައް ބައްސާމްގެ މައްޗައް ކުރެވެން ފެށުނުތާ ދެ ހަފްތާ ފަހުން ދަންވަރު ވަގުތެއްގައި އެމްއެމްޕީއާރްސީން ބަޔާނެއް ވަނީ ނެރެފައެވެ. ނުރަސްމީ ގަޑިއެއްގައި ސަރުކާރު ކުންފުންޏަކުން ބަޔާން ނެރުމުން ވެސް ގިނަ ފަރާތްތަކުގެ ފާޑުކިޔުން އެ ކުންފުނީގެ އެމްޑީ ފާތިމަތު ތައުފީގަށް ވަނީ އަމާޒުވެފައެވެ.

އެ ބަޔާނުގެ ވާހަކަ ފާތިމަތު ވަނީ ފާހަގަކުރައްވާފައެވެ.

ޖިންސީ ފުރައްސާރަ ފަދަ ސިޔާސީ މައްސަލަތައް "އެންޓަޓެއިންމެންޓަކަށް" ހަދައިގެން ސިޔާސީ ފިތުނަ އުފެއްދުމަށް ބޭނުން ނުކުރުމަށް ފާތިމަތު ތައުފީގް ފާހަގަކޮށްފައިވާއިރު ނޫސްވެރިންނަށް ސައްހަ މައުލޫމާތު ފޯރުކޮށްދޭން އެމްޑީ އެއްވެސް ވަރަކަށް އުޅުއްވާ މަންޒަރެއް ނުފެނެއެވެ.

"ތަހުގީގު ކުރިއަށް ދާ މައްސަލައަކަށް ވާތީ އެމްއެމްޕީއާރްސީއިން ވެސް ޚުދު އަޅުގަނޑު ވެސް ނޯންނާނެ އިތުރު ސްޓޭޓްމެންޓެއް ވެސް ކޮމެންޓެއް ވެސް އެއްވެސް މީޑީއާއަކާ ހިއްސާކޮށްފައެއް." މިފަދައިން ވިދާޅުވެ ފާތިމަތު ވަނީ ބައެއް މީޑިޔާތަކަށް އޭނާ ދިން މައުލޫމާތު ދޮގުކޮށްފައެވެ.

އެތައް ފަހަރެއްގެ މަތިން ޗެނަލް 13 އިން ވަނީ ފާތިމަތު ތައުފީގަށް ގުޅޭތޯ މަސައްކަތްކޮށް،ފޯނަށް ޖަވާބު ނުދިނުމުން މެސެޖްވެސް ކޮށްފައެވެ. އެއްވެސް އިރެއްގައި ފޯނު ނުނެގުނުތާ މެސެޖަށް ޖަވާބު ދާރީވެސް ވެފައި ނެތް ކަން ފާހަގަކޮށްލެވެއެވެ.

ޖިންސީ ފުރައްސާރަ ކުރިކަމަށް ބުނެ ބައްސާމަށް ސޯޝަލް މީޑިޔާގައި ގިނަ ފަރާތްތަކުން ތުހުމަތު ކުރަމުން އަންނަ އިރު އެމްއެމްޕީއާރްސީން ބުނަނީ މައްސަލަ ތަހުގީގް ކުރަމުން އަންނަކަމަށެވެ. ތަހުގީގުގެ އެއްވެސް މައުލޫމާތެއްވެސް ހިއްސާކޮށްފައިނުވެއެވެ.

މި މައްސަލަ އަކީ ސީރިއަސް މައްސަލައަކަށް ވެފައި އެކަން ކުރި ފަރާތްތަަކަށް ފިޔަވަޅު އެޅުމުގައި އަވަސް ވެގަންނަންޖެހޭއިރު އެމްއެމްޕީއާރްސީން އަންނަނީ މި ކަން އާދައިގެ ކަމަކަށް ހަދަމުންނެވެ.

އެމްޑީއެއްގެ މަގާމްގައި އަންހެނަކު ހުންނައިރުވެސް ޖިންސީ ފުރައްސާރައިގެ މައްސަލަ އެއް ތަހުގީގު ކުރުމުގައި ފަރުވާކުޑަކުރަމުން އަންނާތީ ފާތިމަތު ތައުފީގަށް ގިނަ ފަރާތްތަކުން އަންނަނީ ފާޑުކިޔުން އަމާޒުކުރަމުންނެވެ.