ޕީއެންއެފް ޖަލްސާ ބޭއްވުމަށް ހުރަސްއެޅުމަށްފަހު ރައީސް ޑރ މުހައްމަދު މުއިއްޒު ގެންދަވަނީ ބުހުތާނު ދޮގުތަކެއް ހަދަމުން ކަމަށް ރައީސް އަބްދުﷲ ޔާމީންގެ އިސް ގާނޫނީ ވަކީލް އަދި ޕިއެންއެފްގެ ވަގުތީ ސެނެޓް މެމްބަރ ޑރ.މުހައްމަދު ޖަމީލް އަހުމަދު ވިދާޅުވެއްޖެއެވެ.

ރޭގެ ހާދިސާ އާ ގުޅުވާ ރައީސް މުއިއްޒު ދޮގު ހަދަމުން ގެންދަވާތީ ޑރ.ޖަމީލް ވަނީ އެކްސްގައި ޕޯސްޓެއް ކުރައްވާފައެެވެ.

ފުލުހުން ޖަލްސާއަށް ހުރަސްއެޅީ އެމަނިކުފާނުގެެ އަމުރާ ކަނޑައެޅިގެން ހިލާފަށް ކަމަށް ރައީސް މުއިއްޒު ވަނީ ވިދާޅުވެ އިތުރުފުޅު ހައްދަވާފައެވެ.

އެހެންކަމުން ޑރ ޖަމީލް ވިދާޅުވީ ކަނޑައެޅިގެން ޑެމޭޖް ކޮންޓްރޯލް ކުރެވޭތޯ ރައީސް މުއިއްޒު ބުހުތާނު ދޮގުތަކެއް ހައްދަވަމުންދާ ކަމަށާއި ސަރުކާރުން ކަންތައް ކުރީ ދުރާލާ ރާވައިގެން ކަމަށެވެ.

ޑރ ޖަމީލް ވިދާޅުވީ ޕީއެންއެފް އުފެއްދުމުގެ ޖަލްސާއާ ގުޅިގެން ރައީސް މުއިއްޒު ވާހަކަ ދައްކަވަން މަޖްބޫރުވީ ކަމަށެވެ.

ސަބަބަކީ ރައްޔިތުން އަދި މުޅި ރާއްޖޭގެ ސިޔާސީ ވެރިންގެ ނުރުހުން އޮތް މިންވަރު ފެނިގެން ކަމަށް ވެސް ޑރ ޖަމީލް ވަނީ ވިދާޅުވެފައެވެ.

އޭގެއިތުރުން ޑރ ޖަމީލް ވިދާޅުވީ ރައީސް މުއިއްޒުގެ ވާހަކަތަކަށް ކިރިޔާވެސް ބުރަދަނެއް ލިބޭނީ ހޯމް މިނިސްޓަރު އަލީ އިހްސާން އާއި އެޑިއުކޭޝަން މިނިސްޓަރ ޑރ. އިސްމާއީލް ޝަފީއު މަގާމުން ވަކިކުރުމުން ކަމަށެވެ.

ސަރުކާރުން ހުއްޓުމެއްނެތި ހުރަސްއެޅުމުންވެސް ޕީއެންއެފް ވަނީ އިފްތިތާހްކޮށްފައެވެ.