އޭޕްރިލް މަހުގެ 10 ވަނަ ދުވަހުގެ ރޭ ގަޑިން 20:19 ހާއިރު މއ.ރަބީއު ވިލާގައި އަލިފާނުގެ ހާދިސާ އެއް ހިނގައިގެން އުޅޭކަމުގެ ރިޕޯޓް އެމްއެންޑީއެފް އަށް ލިބުމާއެކު އަލިފާން ނިވުމުގެ މަސައްކަތް އެމްއެންޑީއެފުން ވަނީ ކޮށްފައެވެ.

އެގޭގައި އަލިފާނުގެ ހާދިސާ ހިނގީ ކަމާބެހޭ ފަރާތްތަކުގެ އިހުމާލުންކަމަށް ގިނަ ފަރާތްތަކުން އަންނަނީ ބުނަމުންނެވެ. ގޭގެ ހާލަތު ވަރަށް ގޯސް ކަމަށް ގޭގެ ވެރިން ވަނީ އެތައް ފަހަރެއްގެ މަތިން އެކި އެކި އިދާރާތަކަށް އަންގާފައެވެ. ނަމަވެސް އަޅާލާފައިނުވެއެވެ.

މިކަމުގެ ހަގީގަތް ޗެނަލް 13 އަށް އެ ގޭގެ އެއް ވެރިޔާ ސަދާ ވަނީ ކިޔައިދީފައެވެ.

"2015 ވަނަ އަހަރުން ފެށިގެން ގޭގަ ދިރިއުޅުނު މީހުންތައް ގެއިން ނިކުންނަން ފެށީ، ގެޔަކީ ވަރަށް ދުވަސްވެފައި ހުރި ގެޔެއް. ބައްޕަ ވަރަށް ބުރަ މަސައްކަތުން މޫދުން ވެލި ނަގައިގެން އަޅާފަ ހުރި ގެޔެއް އެޔަކީ. ގެ އިންނާނީ ދެ ފަޅި އަކަށް. އެއް ފަޅި ބައްޕަ ހަދާފައި އެހުރީ 1980 ގެ އަހަރެއްގައި އަނެއްފަޅި، އެއީ އަލިފާން ރޯވި ފަޅި، އެ ފަޅި ހަދާފައި އެހުރީ 1990 ގެ އަހަރެއްގައި. އަކިރިންނާ ވެލިން ހަދާފަހުރި ގެޔެއް ދެން އެހާ ދުވަސްވީމާ ހަލާކުވާން ފެށީ"

ސަދާ ކިޔައިދިނީ ރަބީއުވިލާގެ ހާލަތު ގޯސްވާން ފެށީ 2015 ވަނަ އަހަރުން ފެށިގެން ކަމަށެވެ. އަދި އޭނާގެ ބައްޕަ އާއި މަންމަ ނިޔާވުމާއި ގުޅިގެން ހުރިހާ ދަރިން މަޑު މަޑުން އެކި ތަންތަނަށް ދިރިއުޅުން ބަދަލު ކުރީއެވެ. ނަމަވެސް ރަބީއުވިލާގެ ހާލަތު ވަރަށް ގާތުން އަބަދުވެސް ހުރިހާ ކުދިން ބަލަމުން އައި ކަމަށް ސަދާ ބުންޏެވެ.

"އެގޭގައި އެއްވެސް މީހަކު މިހާރު ނުއުޅޭތާ ވެދާނެ 3-2 އަހަރު. ދެން ގެ އެއްކޮށް ހަލާކު ވީމާ ކިހިނަކުން އުޅޭނީ. އެތާ އުޅޭއިރު ހީވާނީ ގެ ދެންމެ ދެންމެހެން ބޮލައް ވެއްޓިދާނޭ، އެހާ ކަރަންޓުގެ މައްސަލައާއި ފެނުގެ މައްސަލަ ޖެހޭ. އުޅެވޭ ވަރު ނުވެފައި ހުރީ. އަޅުގަނޑުމެން ވެސް އެގެއިން ނިކުމެގެން މިއުޚެނީ މިހާރު ކުއްޔަށް މާލޭގައި. ދެން ތިބޭ ހުރިހާ ކުދިން އުޅެނީ ހުޅުމާލޭގަޔާ އެކި އެކި ތަންތަނުގައި"

އެގޭގައި އެއްވެސް މީހަކު ނުއުޅޭތާ 3-2 އަހަރުވެއްޖެ ކަމަށް ސަދާ މައުލޫމާތުދިނެވެ.

މާލޭ ސިޓީ ކައުންސިލަށް އެތައް ފަހަރެއްގެ މަތިން މައްސަލަ ހިފައިގެން ދެވުނު ކަމަށާއި ކަންތައް ކުރީ ވަރަށް ވެސް ގޯސްކޮށް ކަމަށް އެ ފަރާތުން ވަނީ ބުނެފައެވެ. އެ ގޭގައި ދިރި ނުއުޅުނަސް އެ ގެ ހުންނަ މަގަކީ އެތައް ބަޔަކު ހިނގާ މަގަކަށް ވާއިރު، ގެއިން ބައެއް ވެއްޓި މީހަކަށް އަނިޔާ ވެދާނެތީ އެ ގެ ތަޅާދިނުމަށް އެތައް ފަހަރެއްގެ މަތިން ބުނެވުނު ކަމަށްވެސް ގޭގެ ވެރިޔާ ބުންޏެވެ.

"އޭރު މާލެ ސިޓީ ކައުންސިލްގެ މޭޔަރަކަށް ހުންނެވީ މިހާރުގެ ރައީސް. ރައީސް މުއިއްޒު. އަޅުގަނޑާ ދައްތަ އާއި ދެމީހުން ބައްދަލުވެސް ކުރިން މުއިއްޒުއާ. ގޭގެ ހުރިހާ ވާހަކައެއް ވެސް ކިޔައިދިނިން. އެކަމަކުވެސް އެއްވެސް ކަހަލަ އެދެވޭ ޖަވާބެއް ނުދިން. އަޅާވެސް ނުލި. ދެން ހައުސިންގ މިނިސްޓްރީންނާ ސިޓީ ކައުންސިލްގެ އިދާރާތަކަށް ދުވެ ދުވެ ވަރުބަލިވެފަ އަޅުގަނޑުމެން ހުރީ. ސިޓީ ކައުންސިލުން ބުނީ ކަރަންޓާ ފެނާ ބިލު ދައްކާށޭ. ކީކޭތޯ ދެން އަޅުގަނޑު ބުނާނީ. އެތަނުގެ ކަރަންޓާ ފެނަ ކަނޑާލާފައި ހުންނައިރުވެސް އެމީހުން އެތަނުން ކަރަންޓާ ފެނާ ނަގާތީތާ ބިލަށް އަރާނީ"

ސަދާ ކިޔައިދިނީ ރައީސް މުއިއްޒު މާލޭ ސިޓީ ކައުންސިލްގެ މޭޔަރަކަށް ހުންނަވާ ވީ އިހުމާލުގެ ވާހަކައެވެ. އެގޭގައި އެއްވެސް މީހަކު ނޫއުޅޭކަމަށް ބުނާއިރުވެސް އެ ސަރަހައްދު މީހުންނަށް އެގެޔަށް މީހުން ވަންނަ މަންޒަރު ފެނެއެވެ.

"އެތަނަށް ފަހުން ވަންނަން ފެށީ މަސްތުވާތަކެތި ބޭނުންކުރާ ޕާޓޭއިން. އެމީހުން އެ ގޭގެ ދޮރު ޗެއިނު އަޅާ ބަންދުކޮށްފައި ހުއްޓާ ހަލާކުކޮށްލައިގެން ވަދެ އެތާ ސަކަރާތް ޖަހަނީ. ނުކުރާކަށް ކަމެއް އެތާ ނެތީ. މަސްތުވާތަކެތި ބޭނުންކުރުމާ، އެތަނުގައި އެ ރައްކާކޮށްގެން ގެންގުޅުމާ، އެ ވިއްކުމާ. މިހެން ގޮސް ބައިވަރު. އަދި ނުވީތާކަށް ވައްކަން ކޮށްގެން ގެންނަ އެއްޗެހިވެސް އެތާ ހުންނަނީ ބަހައްޓާފަ."

ރަބީއުވިލާއަށް ވަދެގެން އެތާ ފަހުން އުޅުނީ އެގޭގެ އެއްވެސް މީހެއް ނޫންކަމަށާއި އެއީ މަސްތުވާތަކެތީގެ އަވައިގައި ޖެހިފައި ތިބޭ ބައެއް ކަމަށް ސަދާ ކިޔައިދިނެވެ.

"ބޭބެ އުޅޭނީ ލަންކާގައި، ދެން އަބަދުވެސް މިކޮޅަށް އައިސްފަ ބަލާނެ ރަބީއު ވިލާގެ ހާލަތު. އެގެޔަށް ދާންވެސް ދާނެ. ދެން ރޯދައިގެ ކުރިން އެގެޔަށް ދިޔަތަނާ މި ފެނުނީ އެތށާ އެތެރޭ މަސްތުވާތަކެތި ބޭނުން ކުރަން ތިއްބާ. ބޭބެ ވަގުތުން ފުލުހުންނަށް ރިޕޯޓް ކުރި. ފުލުހުން އަޅާވެސް ނުލި. ބޭބެ ރިޕޯޓް ކުރީމަ އެމީހުން ބޭބެގައިގަ ތަޅާ ލާނަމޭ ބުނީމާ ދެން އަހަރެމެން ބުނީ ބަހައްޓަން"

ފުލުހުންނަށް މައްސަލަ ރިޕޯޓް ކުރީމާ ފުލުހުން އަޅާވެސް ނުލި ވާހަކަ ސަދާ ކިޔައިދިނީ ވަރަށްވެސް ހިތާމައާއެކުގައެވެ.

"ހަމަގައިމުވެސް އެ ގެޔަކު ކަރަންޓެއްވެސް ފެނެއްވެސް ނުހުންނާނެ. ދެން ރޯވާންވީ ސަބަބެއް ނޭނގުނު. ބޮޑަށް ބެލެވެނީ އެތަނުގައި އެ އުޅުނު ޕާޓޭން ކޮންމެ ވެސް ކަމެއް ކުރަނިކޮށް ރޯވީ ކަމަށް"

ސަދާ ބުނިގޮތުގައި ރޯވީ އެތަނުގައި އުޅޭ ބައެއް ކަމެއް ކުރުމުގެ ތެރެއިންނެވެ.

ރޯވެ، ނިމުނީމާ ވެރިޔާ ވަޑައިގަތީ ކުޅި ސަމާ ބަލާށެވެ. ގައިމު އޭރުވެސް އެކަމަށް ހައްލެއް ގެނައި ނަމަ މިއަދު އެގެޔަށް އެހެން ނުވީސްއެވެ. ބައެއްގެ ހަނދާންތަކެވެ. މީހެއްގެ މިންނެތް ބުރަ މަސައްކަތެވެ. ވީރާނާވެ އެދިޔައީ ބަޔަކު އަޅާ ކަހާވެސް ނުލީމައެވެ.