ރައްޔިތުންގެ މަޖިލީހުގެ އިންތިހާބަށް ހަފްތާއަކަށް ވެފައިވަނިކޮށް ފ. ނިލަންދޫއިން ގޯތި ދޫކުރަން ސަރުކާރުން ނިންމައިފިއެވެ.

ނިލަންދޫ ކައުންސިލުން ކުރި އިއުލާނުގައި ބުނީ މި މަހު ތިނެއްގައި ބޭއްވި އެ ކައުންސިލްގެ ޖަލްސާގައި، އެ ރަށުން ދިރިއުޅުމަށްޓަކައި ބަންޑާރަ ގޯތި ދޫކުރަން ފާސްކޮށް، މިދިޔަ މަހު 30 ގައި ގެޒެޓްކޮށްފައިވާ ގޯތި ދޫކުރުމާ ބެހޭ އުސޫލަށް ބައެއް އިސްލާހުތައް ގެނެސް، އެ ބަދަލުތަކާ އެކު އަލުން އިއުލާންކުރީ ކަމަށެވެ.

އެގޮތުން ދޫކުރަން ނިންމާފައިވަނީ 129 ގޯތި ކަމަށާ ޕޮއިންޓް ދިނުމުގައި އިސްކަން ދޭނީ ރަށުގައި ދިރިއުޅޭ މީހުންނަށް ކަމަށް އިއުލާންގައި ވެއެވެ. ދޫކުރާ ގޯތީގެ ސައިޒަކީ 2،000 އަކަފޫޓްގެ 96 ގޯތި އަދި 2،800 އަކަފޫޓުގެ 33 ގޯއްޗެވެ.

އެ އިއުލާނުގައި ބުނި ގޮތުގައި، ގޯތިތައް ދޫކުރަނީ ރަށުގެ ހުޅަނގު ފަރާތުން ހިއްކާފައިވާ ސަރަހައްދުން 96 ގޯއްޗާއި ނިލަންދޫ "ވެލި" ގޭގެ ކުރިމަތިން އޮތް ސަރަހައްދުން ފަސް ގޯއްޗާއި ނިލަންދޫ "ހުވަނދު" ގޭގެ ކުރިމަތިން އޮތް ސަރަހައްދުން ހަތަރު ގޯއްޗާއި ނިލަންދޫ "ހިމިތި" ގޭގެ އަތިރިން އޮތް ސަރަހައްދުން 24 ގޯއްޗެވެ.

ނިލަންދޫން ގޯއްޗަށް ކުރިމަތިލުމަށް ފޯމު ހުށަހެޅުމުގެ ފުރުސަތު މިއަދުން ފެށިގެން އަންނަ މަހު 30 ގެ ނިޔަލަށް ވަނީ ހުޅުވާލައިފަ އެވެ.

ނިލަންދޫއިން ގޯތި ދޫކުރަން ނިންމާ އިއުލާންކޮށްފައި މިވަނީ މަޖިލިސް އިންތިހާބަށް ހަފްތާއަކަށްވެފައިވަނިކޮށެވެ. އަދި ގިނަ ބަޔަކު ދެކޭ ގޮތުގައި މިއީ އިންތިހާބަށް ނުފޫޒު ފޯރުވުމަށްޓަކައި ސަރުކާރުގެ އިސް މަގާމުތަކުގައި ތިބި ގިނަ ނިލަންދޫ މީހުންގެ ރޭވުމުގެ މަތިން ހިންގާ ޖަރީމާއެކެވެ.

ރައީސް މުހައްމަދު މުއިއްޒުގެ ކޮއްކޯފުޅު މަޖިލިސް އިންތިހާބުގައި ވާދަކުރަނީ ނިލަންދޫ ދާއިރާއަށްކަމަށްވުމުން އެ ދާއިރާއަށް ސަރުކާރުން ގެންދަނީ ތަރައްގީގެ ޕްރޮޖެކުޓުތަކާ އަދިވެސް އެެހެނިހެން ގޮތް ގޮތުން ނުފޫޒު ފޯރުވަމުންނެވެ.