އިދިކޮޅު އެމްޑީޕީގެ ޕާލަމެންޓަރީ ގްރޫޕުން އިސްނަގައިގެން ރައީސް އަބްދުﷲ ޔާމީންގެ އިސްތިއުނާފީ މައްސަލައިގެ ހުކުމް ލަސްވާ މައްސަލަ ހުށަހެޅިއިރު ސަރުކާރުން އިސްވެ ރައީސް ޑރ. މުހައްމަދު މުއިއްޒުއަށް އެމައްސަލަ ޖޭއެސްސީއަށް ހުށަނޭޅުނީ ކީއްވެގެންތޯ ރައީސް ޔާމީން ސުވާލު އުފައްދަވައިފި އެވެ.

އެމްޑީޕީ ޕީޖީ ލީޑަރު އަދި ރައްޔިތުންގެ މަޖިލީހުގެ ރައީސް މުހައްމަދު އަސްލަމް އިސްވެ ހުންނަވައި ނިމިދިޔަ ހަފްތާގައި ވަނީ ރައީސް ޔާމީންގެ ހުކުމް ލަސްވަމުންދާ މައްސަލަ ޖޭއެސްސީއަށް ހުށަހަޅުއްވައިފަ އެވެ. މިކަމަށް ސަރުކާރު ހިންގާ ޕީއެންސީގެ ލީޑަޝިޕްގެ ބޭފުޅުން ވަނީ ވަރަށް ބޮޑަށް ފާޑު ވިދާޅުވެފަ އެވެ. އަދި އެމްޑީޕީން އުޅެނީ ޖުޑިޝަރީއަށް ނުފޫޒު ފޯރުވަން ކަމަށްވެސް ސަރުކާރުގެ ބައެއް ވަޒީރުން ވަނީ ވިދާޅުވެފަ އެވެ.

ޕީޕަލްސް ނެޝަނަލް ފްރަންޓް، ޕީއެންއެފްގެ ޖަގަހަ ޖަލްސާއެއްގައި ވާހަކަފުޅު ދައްކަވަމުން ރައީސް ޔާމީން ރޭ ވަނީ މިކަމާއި ގުޅޭގޮތުން ވާހަކަފުޅު ދައްކަވައިފަ އެވެ. އެގޮތުން ވިދާޅުވީ ރައީސް މުއިއްޒު އަބަދުވެސް ވިދާޅުވަނީ ރައީސް ޔާމީނަށް ހެޔޮއެދި ވަޑައިގަންނަވާ ކަމުގައި ކަމަށެވެ. އެހާ ހެޔޮ އެދިވަޑައިގަންނަވާނަމަ އެމަނިކުފާނު އިސްވެ ހުންނަވައި ޖޭއެސްސީއަށް މައްސަލަ ހުށަނޭޅުއްވީ ކީއްވެތޯ ރައީސް ޔާމީން ސުވާލު އުފެއްދެވި އެވެ.

މީގެ އިތުރުން ރައީސް ޔާމީން ވިދާޅުވީ ކުރީގެ ސަރުކާރު އޮތް ދުވަސްވަރު ރައީސް ޔާމީން މިނިވަން ކުރުމަށް ކުރި މުޒާހަރާތަކުގައި ފުލުހުން ހައްޔަރު ކުރަންޖެހޭ މީހުންވެސް އަންގަނީ ޕީޕީއެމްގައި އޭރު ތިއްބެވި ލީޑަޝިޕްގެ ބޭފުޅުންގެ ތެރެއިން ބޭފުޅަކު ކަމަށެވެ. އެހެންކަމުން މިއަދު ރައީސް ޔާމީންގެ އަނބިކަނބަލުން މެޑަމް ފާތިމަތު އިބްރާހީމް އާއި ދަރިކަލުން ޒޭން އަބްދުﷲ ޔާމީން މުޒާހަރާއަށް ނުނިކުމެގެން ސަރުކާރުގެ އިސްވެރިން ފާޑު ކިޔާއިރު އެމީހުން އެދުވަހު ނިކުތްނަމަ އެންމެ ފުރަތަމަ ފުލުހުން ހައްޔަރު ކުރާނީވެސް އެމީހުން ކަން ރަނގަޅަށް އެނގިވަޑައިގަންނަވާކަމަށް ރައީސް ޔާމީން ވިދާޅުވި އެވެ.

އެމަނިކުފާނު ވިދާޅުވި ގޮތުގައި މިއަދު ރާއްޖެ ދަންނަ އެއް ހަގީގަތަކީ ސިޔާސީ މީހަކު ކޮންމެ ސަބަބަކާއި ހުރެނަމަވެސް ކޯޓަށް ވަންނަން ޖެހިއްޖެ ކަމުގައި ވަނީނަމަ އެމީހެއްގެ ދުވަސް އެދިޔައީ ކަމުގައި ކަމަށެވެ. ޖިނާއީ ކުށެއް މީހެއްގެ މައްޗަށް ސާބިތުވަނީ އެކަށީގެންވާ ޝައްކެއް ނެތް މިންވަރަށް އެކަމެއް ކަށަވަރު ކުރުމުން ކަމުގައި ވީނަމަވެސް މިއަދު ސިޔާސީ މީހުންނާއިމެދު ކޯޓުގައި ކަން ހިނގަނީ އެގޮތަށް ނޫންކަމަށްވެސް ވިދާޅުވި އެވެ. އަދި މިއީ ގާނޫނު ހަދާ މަޖިލީހާއި ޖުޑިޝަރީއަށްވެސް އޮތް ބޮޑު ލަދު ހުތުރެއްގެ ގޮތުގައި އެމަނިކުފާނު ސިފަކުރެއްވި އެވެ.