ރައީސް ޑރ. މުހައްމަދު މުއިއްޒު، ދައުލަތުގެ ފައިސާއިން އެމަނިކުފާނުގެ އަމިއްލަ އެކައުންޓަށް ގިނަ އަދަދެއްގެ ފައިސާތަކެއް ޖަމާކުރިކަމުގެ އިންޓެލިޖެންސް ރިޕޯޓުތަކެއް ސޯޝަލް މީޑިއާގައި ލީކުކޮށްލައިފި އެވެ.

2012 ވަނަ އަހަރުން 2018 ވަނަ އަހަރަށް ރައީސް މުއިއްޒު ހައުސިންގް މިނިސްޓަރުކަން ކުރެއްވި ދުވަސްވަރު ހިންގާފައިވާ މުއާމަލާތްތަކަކާއި ގުޅޭ ރިޕޯޓުތަކެއް ލީކުކޮށްލީ ކާކުކަން ނޭނގޭގޮތަށް ސަރުކާރަށް ފާޑުކިޔަމުންދާ "ހަސަން ކުރުސީ" ގެ އެކްސް އެކައުންޓުންނެވެ. ލީކުކޮށްލި ލިޔެކިޔުންތަކުގައި ރައީސްގެ އެކައުންޓަށް ޖަމާވި ފައިސާތަކާ ގުޅޭގޮތުން އެމްއެމްއޭގެ ފައިނޭންޝިއަލް އިންޓެލިޖެންސް (އެފްއައިޔޫ) އަދި ފުލުހުންގެ އިންޓެލިޖެންސުން އެކުލަވާލާފައިވާ ދެ ރިޕޯޓެއް ހިމެނެ އެވެ.

ޗެނަލް13 އިން މި ލިޔުންތަކުގެ ސައްހަކަށް ކަށަވަރުކުރަން ކުރި މަސައްކަތުން މިއީ 2018 ވަނަ އަހަރު އެކުލަވާލާފައިވާ ރިޕޯޓެއްކަން ވަނީ އެނގިފަ އެވެ. އަދި މިއީ ސައްހަ ލިޔުންތަކެއްކަންވެސް ވަނީ ކަށަވަރުވެފަ އެވެ.

ހައުސިންގް މިނިސްޓަރުކަމުގައި ހުންނަވައިގެން މާފަންނުގައި ބޮޑު ގެސްޓު ހައުސްއެއް އިމާރާތްކޮށް ނިންމުމުން ރައީސް މުއިއްޒުއަށް ކޮރަޕްޝަންގެ ތުހުމަތުތަކެއް މީގެ ކުރިންވެސް އަމާޒުވި އެވެ. ރޭ ލީކުކޮށްލި ލިޔުންތަކާއިއެކު އެ ތުހުމަތުތަކަށް މިވަނީ ބާރު ލިބިގެން ގޮސްފަ އެވެ.

ލީކުކޮށްފައިވާ އެފްއަައިޔޫގެ ރިޕޯޓުގެ ތިރީގައި ރައީސް މުއިއްޒުއާ ގުޅުވައި ރެޑް ފްލެގް އިންޑިކޭޓާސްގެ ގޮތުގައި ސީރިއަސް 10 ނުކުތާއެއް ބަޔާންކޮށްފައިވެ އެވެ. އެ 10 ނުކުތާއަކީ؛

1-    ޕޮލިޓިކަލީ އެކްސްޕޯޒްޑް ޕާސަން (ޕީއީޕީ) ނުވަތަ ސިޔާސީ ފަރާތްތަކާއި އަދި އެ ފަރާތްތަކުން ކޮންޓްރޯލް ކުރާ ކުންފުނިތަކާ ގިނަ މުއާމަލާތްތަކެއް ކުރުން

2-    އެމްބެޒެލްމެންޓް ނުވަތަ ހިޔާނާތްތެރިވުން

3-    ފޮރުވުމަށްޓަކައި ލޭޔަރުކޮށް ސްޓްރަކްޗާ ކޮށްފައިވާ ޓްރާންސެކްޝަން ޕެޓާން

4-    ފަންޑުތަކުގެ އަސްލު ފޮރުވުމަށް ރަސްމީ ނިޒާމުތައް ބޭނުންކުރުން

5-    ބޭންކަށް ސައްހަ ތެދު މައުލޫމާތު ނުދިނުން

6-    ވަރަށް ގިނައިން އެއްވެސް ސަބަބެއް ބަޔާންކުރުމެއް ނެތި ނަގުދު ފައިސާ ޖަމާކޮށް ނެގުން

7-    ސަރުކާރުގެ ޕްރޮޖެކްޓުތައް ހިންގަން ދިން ކުންފުނިތަކުން ފައިސާ ލިބިފައިވުން

8-    ގިނަ އަދަދެއްގެ ނަގުދު ފައިސާ ގެންގުޅުން

9-    ދިމްޔާތު ޕްރައިވެޓް ލިމިޓެޑްގެ ފައިދާ ލިބުން

10-                        ނުހައްގު މުއްސަދިކަން

މީގެ ކުރިންވެސް ރައީސް މުއިއްޒުއާއި ގުޅޭ މިފަދަ މައުލޫމާތުތަކެއް ވަނީ ހާމަވެގެން ގޮސްފަ އެވެ. ޗެނަލް13 އަށް އެނގިފައިވާ ގޮތުގައި ދައުލަތުގެ ފައިސާއިން ރައީސް ވަނީ އެތައް ބިލިއަން ރުފިޔާއެއް އެމަނިކުފާނުގެ އަމިއްލަ އެކައުންޓަށް ޖަމާކޮށްފަ އެވެ. އެފައިސާ ޑރ. މުއިއްޒުގެ އެކައުންޓަށް ޖަމާކުރީ އެމަނިކުފާނު ހައުސިންގް މިނިސްޓަރަކަށް ހުންނެވި ދުވަސްވަރު ބޮޑެތި މަޝްރޫއުތައް ހިންގަން ހަވާލުކުރި ކުންފުނިތަކުންނެވެ. 2015 އިން 2018 އަށް ރައީސް ހިންގި ކޮރަޕްޝަންގެ އަގު އެތައް ބިލިއަން ރުފިޔާއަކަށް އަރާކަމުގެ މައުލޫމާތުވެސް ވަނީ ލިބިފަ އެވެ.